૬. થેય્યસત્થસિક્ખાપદં

૪૦૭. છટ્ઠે ‘‘પટિયાલોક’’ન્તિ એત્થ આલોકસદ્દેન સૂરિયો વુત્તો ઉપચારેન. સૂરિયો હિ પુરત્થિમદિસતો ઉગ્ગન્ત્વા પચ્છિમદિસં ગતો, તસ્મા સૂરિયસઙ્ખાતસ્સ આલોકસ્સ પટિમુખં ‘‘પટિયાલોક’’ન્તિ વુત્તે પચ્છિમદિસાયેવ ગહેતબ્બાતિ આહ ‘‘પચ્છિમં દિસન્તિ અત્થો’’તિ. કમ્મિકાતિ કમ્મે યુત્તા પયુત્તા.

૪૦૯. રાજાનન્તિ એત્થ રઞ્ઞો સન્તકં ‘‘રાજા’’તિ વુચ્ચતિ ઉપચારેન, અથ વા રઞ્ઞો એસો ‘‘રાજા’’તિ કત્વા રઞ્ઞો સન્તકં ‘‘રાજા’’તિ વુચ્ચતિ. થેય્યન્તિ થેનેત્વા ‘‘સક્કચ્ચ’’ન્તિઆદીસુ (પાચિ. ૬૦૬) વિય નિગ્ગહીતાગમો હોતિ. રાજાનં, રઞ્ઞો સન્તકં વા થેય્યં થેનેત્વા ગચ્છન્તીતિ અત્થો. ઇતિ ઇમમત્થં દસ્સેન્તો આહ ‘‘રાજાનં વા થેનેત્વા’’તિઆદિ.

૪૧૧. ચતૂસુ વિસઙ્કેતેસુ દ્વીહિ અનાપત્તિ, દ્વીહિ આપત્તિયેવાતિ. છટ્ઠં.