૮. વાસેટ્ઠસુત્તવણ્ણના

૪૫૪. જાતિં સોધેતુકામા હોન્તીતિ સહવાસીનં બ્રાહ્મણાનં કિરિયા પરાધેન વા અસારુપ્પત્તેન વા જાતિયા ઉપક્કિલેસં આસઙ્કાય તં સોધેતુકામા હોન્તિ. મન્તે સોધેતુકામા હોન્તીતિ મન્તવચને આચરિયમતિચોદનાય અઞ્ઞેન વાક્યેન કેનચિ કારણેન સંસયે ઉપ્પન્ને તં સોધેતુકામા હોન્તિ. અન્તરાતિ વેમજ્ઝે, અઞ્ઞત્થેવા અન્તરાસદ્દોતિ તસ્સ અઞ્ઞા કથાતિ વચનં અવગન્તબ્બં. ખન્તીમેત્તાનુદ્દયાદિગુણસમ્પન્નો એવ ‘‘સીલવાતિ ગુણવા’’તિઆહ. તેહિ સીલસ્સ વિસ્સજ્જનકાલેપિ ‘‘સીલવા’’તિ વુચ્ચતિ. સમ્પન્નસીલત્તા વા તેહિ સમન્નાગતો એવ હોતીતિ આહ ‘‘સીલવાતિ ગુણવા’’તિ. આચારસમ્પન્નોતિ સાધુ આચારવત્તો.

૪૫૫. સિક્ખિતાતિ તેવિજ્જાનં સિક્ખિતા તુમ્હે, ન દાનિ તુમ્હેહિ કિઞ્ચિ કત્તબ્બં અત્થીતિ અત્થો. પટિઞ્ઞાતાતિ પટિજાનિત્વા ઠિતા.

વેદત્તયસઙ્ખાતા તિસ્સો વિજ્જા અજ્ઝયન્તીતિ તેવિજ્જા. તેનાહ ‘‘તિવેદાન’’ન્તિ. તયો વેદે અણન્તિ અજ્ઝયન્તીતિ બ્રાહ્મણા, તેસં. યં એકં પદમ્પિ અક્ખાતં, તં અત્થતો બ્યઞ્જનતો ચ કેવલિનો અધિયિનો અપ્પપયોગેન. નિટ્ઠાગતમ્હાતિ નિપ્ફત્તિં ગતા અમ્હા તેવિજ્જાય સકસમયસ્સ કથને.

મનોકમ્મતો હિ વત્તસમ્પદાતિકારણૂપચારેનાયમત્થો વુત્તોતિ આહ – ‘‘તેન સમન્નાગતો હિ આચારસમ્પન્નો હોતી’’તિ.

ખયાતીતન્તિ વડ્ઢિપક્ખે ઠિતન્તિ અત્થો. સુક્કપક્ખપાટિપદતો પટ્ઠાય હિ ચન્દો વડ્ઢતીતિ વુચ્ચતિ, ન ખીયતીતિ. વન્દમાના જના નમક્કારં કરોન્તિ.

અત્થદસ્સનેનાતિ વિવરણેન દસ્સનપરિણાયકટ્ઠેન લોકસ્સ ચક્ખુ હુત્વા સમુપ્પન્નં.

૪૫૬. તિટ્ઠતુ તાવ બ્રાહ્મણચિન્તાતિ – ‘‘કિં જાતિયા બ્રાહ્મણો હોતિ ઉદાહુ ભવતિ કમ્મુના’’તિ અયં બ્રાહ્મણવિચારો તાવ તિટ્ઠતુ. જાતિદસ્સનત્થં તિણરુક્ખકીટપટઙ્ગતો પટ્ઠાય લોકે જાતિવિભઙ્ગં વિત્થારતો કથેસ્સામીતિ તેસં ચિત્તસમ્પહંસનત્થં દેસેતબ્બમત્થં પટિજાનાતિ. તત્થ અઞ્ઞમઞ્ઞા હિ જાતિયોતિ ઇદં કારણવચનં, યસ્મા ઇમા જાતિયો નામ અઞ્ઞમઞ્ઞં વિસિટ્ઠા, તસ્મા જાતિવિભઙ્ગં બ્યાકરિસ્સામીતિ.

યસ્મા ઇધ ઉપાદિન્નકજાતિ બ્યાકાતબ્બભાવેન આગતા, તસ્સા પન નિદસ્સનભાવેન ઇતરા, તસ્મા ‘‘જાતિવિભઙ્ગં પાણાન’’ન્તિ પાળિયં વુત્તં. તેસં તેસં પાણાનં જાતિયોતિ અત્થો. એવન્તિ નિદસ્સનં કથેત્વા નિદસ્સિતબ્બે કથિયમાને. તસ્સાતિ વાસેટ્ઠસ્સ. કામં ‘‘તેસં વોહં બ્યક્ખિસ્સ’’ન્તિ ઉભોપિ માણવે નિસ્સાય દેસના આગતા, તથાપિ તત્થ તત્થ ‘‘એવં, વાસેટ્ઠ, જાનાહી’’તિઆદિના વાસેટ્ઠમેવ આલપન્તો ભગવા તમેવ ઇમિના નિયામેન પમુખં અકાસિ. તેન વુત્તં ‘‘તસ્સાતિ વાસેટ્ઠસ્સા’’તિ. જાતિભેદો જાતિવિસેસો, જાતિયા ભેદો પાકટો ભવિસ્સતિ નિદસ્સનેન વિભૂતભાવં આપાદિતેન પટિઞ્ઞાતસ્સ અત્થસ્સ વિભૂતભાવાપત્તિતો. આમ ન વટ્ટતીતિ કમ્મનાનતાય એવ ઉપાદિન્નનાનતાય પટિક્ખેપપદમેતં, ન બીજનાનતાય અનુપાદિન્નનાનતાય પટિક્ખેપપદન્તિ દસ્સેતું ‘‘કમ્મં હી’’તિઆદિ વુત્તં. તસ્સત્થો – તંતંયોનિખિપનમત્તં કમ્મસ્સ સામત્થિયં, તંતંયોનિનિયતા પન યે વણ્ણવિસેસા, તે તંતંયોનિસિદ્ધિયાવ સિદ્ધા હોન્તીતિ તં પન યોનિખિપનકમ્મં તંતંયોનિવિસિટ્ઠ-વિસેસાભિભૂતાય પયોગનિપ્ફત્તિયા, અસંમુચ્છિતાય એવ વા પચ્ચયભૂતાય ભવપત્થનાય અભિસઙ્ખતમેવાતિ વિઞ્ઞાતબ્બપચ્ચયવિસેસેન વિના ફલવિસેસાભાવતો એતં સમીહિતકમ્મં પત્થનાદીહિ ચ ભિન્નસત્તિતં વિસિટ્ઠસામત્થિયં વા આપજ્જિત્વા ચક્ખુન્દ્રિયાદિવિસિટ્ઠફલનિબ્બત્તકં જાયતિ, એવં યોનિખિપનતંયોનિનિયતવિસેસાવહતા હોતીતિ. થેરેન હિ બીજનાનતા વિય કમ્મનાનતાપિ ઉપાદિન્નકનાનતાય સિયા નુ ખો પચ્ચયોતિ ચોદનં પટિક્ખિપિત્વા પચ્ચયવિસેસવિસિટ્ઠા કમ્મનાનતા પન પચ્ચયોતિ નિચ્છિતન્તિ દટ્ઠબ્બં.

નાનાવણ્ણાતિ નાનપ્પકારવણ્ણા. તાલનાળિકેરાદીનં લોકે અભિઞ્ઞાતતિણજાતિભાવતો વિસેસેન ગય્હતિ અભિઞ્ઞાતસોતનયેન. જાતિયા બ્રાહ્મણોવાતિ અટ્ઠાનપયુત્તો એવ-સદ્દો, જાતિયાવ બ્રાહ્મણો ભવેય્યાતિ યોજના. ન ચ ગય્હતીતિ તિણરુક્ખાદીસુ વિય બ્રાહ્મણેસુ જાતિનિયતસ્સ લિઙ્ગસ્સ અનુપલબ્ભનતો, પિવનભુઞ્જનકથનહસનાદિકિરિયાય બ્રાહ્મણભાવેન એકન્તિકલિઙ્ગનિયતાય મન્તજ્ઝેનાદિં વિના અનુપલબ્ભનતો ચ. વચીભેદેનેવાતિ આહચ્ચવચનેનેવ.

કીટે પટઙ્ગેતિઆદીસુ જાતિનાનતા લબ્ભતિ અઞ્ઞમઞ્ઞલિઙ્ગવિસિટ્ઠતાદસ્સના. કુન્થા કીટકા, ખજ્જખાદકા કિપિલ્લિકા. ઉપ્પતિત્વાતિ ઉડ્ડેત્વા ઉડ્ડેત્વા. પટભાવં ગચ્છન્તીતિ વા પટઙ્ગા, ન ખુદ્દકપાણકા કીટા નામ. તેસમ્પિ કીટકાનં.

કાળકાદયોતિ કલન્દકાદયો.

ઉદરંયેવ નેસં પાદા ઉદરેનેવ સમ્પજ્જનતો.

સઞ્ઞાપુબ્બકો વિધિ અનિચ્ચોતિ દસ્સેન્તો ‘‘ઉદકે’’તિ આહ યથા ‘‘વીરસ્સ ભાવો વીરિય’’ન્તિ.

પત્તસમુદાયે પક્ખસદ્દોતિ ‘‘પત્તેહિ યન્તી’’તિ વુત્તં. ન હિ અવયવબ્યતિરેકેન સમુદાયો અત્થિ.

સઙ્ખેપેન વુત્તો ‘‘જાતિવસેન નાના’’તિઆદિના. એત્થ પદત્થે દુબ્બિઞ્ઞેય્યં નત્થીતિ સમ્બન્ધમત્તં દસ્સેતું ‘‘તત્રાયં યોજના’’તિઆદિ વુત્તં. ‘‘ન હિ બ્રાહ્મણાનં એદિસં સીસં હોતિ, ખત્તિયાનં એદિસન્તિ નિયમો અત્થિ યથા હત્થિઅસ્સમિગાદીન’’ન્તિ ઇદમેવ વાક્યં સબ્બત્થ નેતબ્બં. તં સંઙ્ખિપિત્વા દસ્સેન્તો ‘‘ઇમિના નયેન સબ્બં યોજેતબ્બ’’ન્તિ આહ.

તસ્સાતિ યથાવુત્તનિગમનવચનસ્સ અયં યોજના ઇદાનિ વુચ્ચમાના યોજના વેદિતબ્બા.

૪૫૭. વોકારન્તિ વોકરણં, યેન વિસિટ્ઠતાય ન વોકરીયતિ જાતિભેદોતિ અત્થો. તેનાહ ‘‘નાનત્ત’’ન્તિ.

ગોરક્ખાદિઉપજીવનેન આજીવવિપન્નો, હિંસાદિના સીલવિપન્નો, નિક્ખિત્તવત્તતાદિના આચારવિપન્નોતિ. સામઞ્ઞજોતના વિસેસે નિવિટ્ઠા હોતીતિ આહ ‘‘ગોરક્ખન્તિ ખેત્તરક્ખ’’ન્તિ. ‘‘ગોતિ હિ પથવિયા નામ’’ન્તિ. તેહિ તેહિ ઉપાયેહિ સિક્ખિતબ્બટ્ઠેન સિપ્પં, તત્થ કોસલ્લં. પરેસં ઈસનટ્ઠેન હિંસનટ્ઠેન ઇસ્સો, સો અસ્સ અત્થીતિ ઇસ્સો યોધાજીવિકો, ઇસ્સસ્સ કમ્મં પહરણં, ઉસું સત્તિઞ્ચ નિસ્સાય પવત્તા જીવિકા ઇસ્સત્તં. તેનાહ ‘‘આવુધજીવિક’’ન્તિ. યં નિસ્સાય અસ્સ જીવિકા, તદેવ દસ્સેતું ‘‘ઉસુઞ્ચ સત્તિઞ્ચા’’તિ વુત્તં.

બ્રહ્મં વુચ્ચતિ વેદો, તં અણતિ જાનાતીતિ બ્રાહ્મણો, જાનનઞ્ચ પોરાણેહિ બ્રાહ્મણેહિ વિહિતનિયામેન બ્રાહ્મણેહિ કતોપસમેન અનુટ્ઠાનતપેન યથા ‘‘આજીવસીલાચારવિપન્નો નત્થી’’તિ બ્રાહ્મણધમ્મિકેહિ લોકિયપણ્ડિતેહિ ચ સમ્પટિચ્છિતો, તથા પટિપજ્જનમેવાતિ આહ ‘‘એવં બ્રાહ્મણસમયેન…પે… સાધેત્વા’’તિ. એવં સન્તેતિ એવં આજીવસીલાચારવિપન્નસ્સ અબ્રાહ્મણભાવે સતિ ન જાતિયા બ્રાહ્મણો હોતિ, ગુણેહિ પન આજીવસીલાચારસમ્પત્તિસઙ્ખાતેહિ બ્રાહ્મણો હોતિ, તસ્મા ગુણાનંયેવ બ્રાહ્મણભાવકરણતો ચતુવણ્ણવિભાગે યત્થ કત્થચિ કુલે જાતો યો સીલાદિગુણસમ્પન્નતાય ગુણવા, સો વુત્તલક્ખણેન નિપ્પરિયાયતો બાહિતપાપતાય બ્રાહ્મણોતિ અયમેત્થ બ્રાહ્મણભાવે ઞાયોતિ, એવં ઞાયં અત્થતો આપન્નં કત્વા. નન્તિ તમેવ યથાવુત્તં ઞાયં. યો બ્રાહ્મણસ્સ સંવણ્ણિતાયાતિ માતુયા ઉભતોસુજાતતાદિકુલવણ્ણેન સંવણ્ણિતાય પસત્થાય યથારૂપાય બ્રાહ્મણસ્સ માતા ભવિતું યુત્તા, તથારૂપાય માતરિસમ્ભૂતો. એતેન ચતુન્નં યોનીનં યત્થ કત્થચિ વિસેસનિટ્ઠા કતા. તેનાહ ‘‘તત્રાપિ વિસેસેના’’તિ. એવં સામઞ્ઞતો વિસેસનિટ્ઠાવસેન ‘‘યોનિજં મત્તિસમ્ભવ’’ન્તિ પદસ્સ અત્થં વત્વા ઇદાનિ સામઞ્ઞજોતનં અનાદિયિત્વા વિસેસજોતનાવસેનેવ અત્થં વત્તું ‘‘યાચાય’’ન્તિઆદિ વુત્તં. પરિસુદ્ધઉપ્પત્તિમગ્ગસઙ્ખાતા યોનિ વુત્તાતિ અનુપક્કુટ્ઠભાવેન પરિસુદ્ધઉપ્પત્તિમગ્ગસઙ્ખાતા યા ચાયં યોનિ વુત્તાતિ સમ્બન્ધો. તતોપિ જાતસમ્ભૂતત્તાતિ તતો યોનિતો જાતત્તા માતાપેત્તિસમ્પત્તિતો સમ્ભૂતત્તા.

વિસિટ્ઠત્તાતિ સમુદાયભૂતા મનુસ્સા રાગાદિના વિસિટ્ઠત્તા. રાગાદિના સહ કિઞ્ચનેનાતિ સકિઞ્ચનો. તથેવ રાગાદિસઙ્ખાતેન પલિબોધનટ્ઠેન સહ પલિબોધેનાતિ સપલિબોધો. સબ્બગહણપટિનિસ્સગ્ગેનાતિ ઉપાદાનસઙ્ખાતસ્સ સબ્બસ્સ ગહણસ્સ પટિનિસ્સજ્જનેન. યસ્મા બાહિતપાપો અત્તનો સન્તાનતો બહિકતપાપો, તસ્મા તમહં બ્રૂમિ બ્રાહ્મણન્તિ અત્થો વત્તબ્બો. એવરૂપો એતિસ્સા કથાય ઉપદેસો નાનપ્પકારતો વિભત્તો, તસ્મા તત્થ તત્થ વુત્તનયેનેવ વેદિતબ્બો.

૪૫૮. ગહિતદણ્ડેસૂતિ પરેસં દણ્ડેન વિહેઠનં અનિધાય આદિન્નદણ્ડેસુ.

૪૫૯. કિઞ્ચિ ગહણન્તિ તણ્હાગાહાદીસુ કિઞ્ચિ ગાહં.

યેન કામભવેન માનુસકેહિ પઞ્ચહિ કામગુણેહિ યુઞ્જતિ, તં માનુસકં યોગં. ‘‘માનુસકં યોગ’’ન્તિ એત્થ ચ એકદેસં ગહેત્વા વુત્તં, એસ નયો ‘‘દિબ્બયોગ’’ન્તિ એત્થાપિ. સબ્બયોગવિસંયુત્તન્તિ પદદ્વયેન વુત્તેહિ સબ્બકિલેસયોગેહિ વિપ્પયુત્તં.

રતિન્તિ અભિરતિં આસત્તિં. કુસલભાવનાયાતિ કાયભાવનાદિ કુસલધમ્મભાવનાય ઉક્કણ્ઠિતં. વીરિયવન્તન્તિ વીરિયસબ્ભાવેન વીરં નિદ્દિસતિ, વીરભાવો હિ વીરિયન્તિ.

સુન્દરં ઠાનન્તિ નિબ્બાનં. સુન્દરાય પટિપત્તિયા અરિયપટિપત્તિયા.

નિબ્બત્તિન્તિ પરિયોસાનં. અતીતેતિ અતીતકોટ્ઠાસે. કિઞ્ચનકારકોતિ પલિબોધહેતુભૂતો.

અસેક્ખે સીલક્ખન્ધાદિકે મહન્તે ગુણે. પઞ્ચન્નં મારાનં વિજિતત્તા વિજિતવિજયં.

૪૬૦. ઇદં અજાનન્તાતિ ‘‘જાતિયા બ્રાહ્મણો’’તિ ઇદં લોકસમઞ્ઞામત્તન્તિ અજાનન્તા. યે બ્રાહ્મણેસુ નામગોત્તં નામ તતિયં દિટ્ઠાભિનિવેસં જનેન્તિ, સાવ નેસં દિટ્ઠિ. કતં અભિસઙ્ખતન્તિ પરિકપ્પનવસેનેવ કતં ઠપિતં તદુપચિતં, ન હેતુપચ્ચયસમાયોગેન. સમુચ્ચાતિ સમ્મુતિયા. કા પન સા સમ્મુતીતિ આહ ‘‘સમઞ્ઞાયા’’તિ, લોકસમઞ્ઞાતેનાતિ અત્થો. સમ્મા પન પરમત્થતો અજાનન્તાનં નામગોત્તં એવં કપ્પેતીતિ આહ ‘‘નો ચે’’તિઆદિ. તં પન અસન્તમ્પિ પરમત્થતો સન્તતાયેવ અભિનિવિસન્તિ, તેસમયં દોસોતિ દસ્સેતું ‘‘એવં પકપ્પિત’’ન્તિઆદિ વુત્તં. તેનાહ ભગવા – ‘‘જનપદનિરુત્તિં નાભિનિવેસેય્યા’’તિ (મ. નિ. ૩.૩૩૧). અજાનન્તા નોતિ એત્થ નો-સદ્દો અવધારણત્થો – ‘‘ન નો સમં અત્થિ તથાગતેના’’તિઆદીસુ (ખુ. પા. ૬.૩) વિયાતિ આહ ‘‘અજાનન્તાવ એવં વદન્તી’’તિ.

નિપ્પરિયાયન્તિ ભાવનપુંસકનિદ્દેસો, નિપ્પરિયાયેન ઉજુકમેવાતિ અત્થો, ન પુબ્બે વિય ‘‘યો હિ કોચી’’તિ પરિયાયવસેન. ‘‘ન જચ્ચા’’તિ ગાથાય પુબ્બદ્ધેન જાતિવાદં પટિક્ખિપન્તો પચ્છિમદ્ધેન કમ્મવાદં પતિટ્ઠપેન્તો. તત્થાતિ તિસ્સં ગાથાયં. ઉપડ્ઢગાથાય વિત્થારણત્થન્તિ ઉપડ્ઢગાથાય અત્થં વિત્થારેતું ‘‘કસ્સકો કમ્મુના’’તિ વુત્તં. તત્થ પુરિમાય ચતૂહિ પાદેહિ, પચ્છિમે દ્વીહિ દ્વિન્નમ્પિ સાધારણતો અત્થો વિત્થારિતો. તત્થ કસિકમ્માદીતિ આદિ-સદ્દેન સિપ્પકમ્મવાણિજાદિ સઙ્ગહો.

પટિચ્ચસમુપ્પાદપધાનવચનવિઞ્ઞેય્યો પચ્ચયો પટિચ્ચસમુપ્પાદસદ્દસ્સ અત્થો પચ્ચયુપ્પન્નાપેક્ખાય હોતીતિ આહ – ‘‘ઇમિના પચ્ચયેન એતં હોતી’’તિ. યં પનેત્થ વત્તબ્બં, તં વિસુદ્ધિમગ્ગે (વિસુદ્ધિ. ૨.૫૭૦) તંસંવણ્ણનાયઞ્ચ (વિસુદ્ધિ. મહાટી. ૨.૫૭૦) વુત્તનયેન વેદિતબ્બં. સમ્માનાવમાનારહકુલેતિ સમ્માનારહે ખત્તિયાદિકુલે, અવમાનારહે ચણ્ડાલાદિકુલે કમ્મવસેન ઉપપત્તિ હોતિ કમ્મસ્સ વિપચ્ચમાનોકાસકરતાય વિના તાદિસાય ઉચ્ચનીચકુલનિબ્બત્તિયા અભાવતો. અડ્ઢદલિદ્દતાદિ અઞ્ઞાપિ હીનપણીતતા.

કમ્મુનાતિ ચેત્થ યથા લોકપજાસત્તસદ્દેહિ એકો એવત્થો વુત્તો, એવં સેસસદ્દેહિપિ, અધિપ્પાયવિસેસો પન તત્થ અત્થીતિ દસ્સેતું ‘‘પુરિમપદેન ચેત્થા’’તિઆદિ વુત્તં. નાયં લોકો બ્રહ્મનિમ્મિતો કમ્મેન ઉપ્પજ્જનતો. ન હિ સન્નિહિતકારણાનં ફલાનં અઞ્ઞેન ઉપ્પત્તિદિટ્ઠિ યુજ્જતિ. તેનાહ ‘‘દિટ્ઠિયા પટિસેધો વેદિતબ્બો’’તિ. યં પનેત્થ વત્તબ્બં તં વિસુદ્ધિમગ્ગસંવણ્ણનાદીસુવુત્તનયેન વેદિતબ્બં. તથા લોકસ્સ પઠમુપ્પત્તિ ન બ્રહ્મુનાતિ ‘‘કમ્મુના હિ તાસુ તાસૂ’’તિઆદિ વુત્તં. તતિયેન ‘‘અયં લોકો આદિતો પભુતિ પભવકમ્મુના વત્તતી’’તિ વુત્તમત્થં નિગમેતિ.વુત્તસ્સેવત્થસ્સ સૂચનઞ્હિ નિગમનં. તં પન નિયમત્થં હોતીતિ આહ ‘‘કમ્મેનેવ બદ્ધા હુત્વા પવત્તન્તિ, ન અઞ્ઞથા’’તિ. ચતુત્થેન પદેન. યાયતોતિ ગચ્છતો. નિબ્બત્તતોતિ નિબ્બત્તન્તસ્સ. પવત્તતોતિ પવત્તન્તસ્સ.

ધુતધમ્મા વિસેસતો તણ્હાય સન્તત્તવસેન વત્તન્તીતિ આહ ‘‘તપેનાતિ ધુતઙ્ગતપેના’’તિ. મેથુનવિરતિ વિસેસતો બ્રાહ્મણાનં બ્રહ્મચરિયન્તિ સા ઇધ બ્રહ્મચરિયેનાતિ અધિપ્પેતાતિ આહ ‘‘બ્રહ્મચરિયેનાતિ મેથુનવિરતિયા’’તિ. એતેનાતિ ઇમિના ‘‘તપેના’’તિઆદીહિ ચતૂહિ પદેહિ વુત્તેન. સેટ્ઠેનાતિ ઉત્તમેન. સંકિલેસવિસુદ્ધિયા પરિસુદ્ધેન. બ્રહ્મન્તિ બ્રહ્મભાવં સેટ્ઠભાવં. સો પનેત્થ અત્થતો બ્રાહ્મણભાવોતિ આહ ‘‘બ્રાહ્મણભાવં આવહતી’’તિ.

બ્રહ્મા ચ સક્કો ચાતિ સક્કગરુકાનં સક્કો સક્કેનપિ ગરુકાતબ્બતો, બ્રહ્મગરુકાનં બ્રહ્મા બ્રહ્મુનાપિ ગરુકાતબ્બતો. વિજાનતન્તિ પરમત્થબ્રાહ્મણસ્સ વિસેસં જાનન્તાનં વિઞ્ઞૂનં. અવિઞ્ઞુનો હિ અપ્પમાણં. તેનાહ – ‘‘પણ્ડિતાન’’ન્તિ. સેસં સુવિઞ્ઞેય્યમેવ.

વાસેટ્ઠસુત્તવણ્ણનાય લીનત્થપ્પકાસના સમત્તા.