૬. વત્તાદિકણ્ડનિદ્દેસો

૯૬. ઉપજ્ઝાચરિયવત્તઞ્ચ, ગમિકાગન્તુકમ્પિ ચ;

સેનાસનાદિવત્તઞ્ચ, કાતબ્બં પિયસીલિના.

૯૭. હત્થપાસે ઠિતો કિઞ્ચિ, ગહિતબ્બં દદે તિધા;

ગહેતુકામો ગણ્હેય્ય, દ્વિધાયં સમ્પટિગ્ગહો.

૯૮. સઙ્ઘાટિમુત્તરાસઙ્ગં, તથા અન્તરવાસકં;

‘‘એતં ઇમં અધિટ્ઠામિ’’, તથા ‘‘પચ્ચુદ્ધરામિ’’તિ.

૯૯. ‘‘ઇમં ઇમાનિ એતાનિ, એતમ્પિ ચીવર’’ન્તિ વા;

‘‘પરિક્ખારચોળાની’’તિ, તથા ‘‘પચ્ચુદ્ધરામિ’’તિ.

૧૦૦. ‘‘એતં ઇમં અધિટ્ઠામિ, પત્તં પચ્ચુદ્ધરામિ’’તિ;

એવં પચ્ચુદ્ધરેધિટ્ઠે, ચીવરાદિં યથાવિધિ.

૧૦૧. સઞ્ચરિત્તં વિના સેસા, સચિત્તા ગરુકન્તિમા;

અચ્છિન્નં પરિણતં હિત્વા, નિસ્સગ્ગિયમચિત્તકં.

૧૦૨. પદસોધમ્મં દુવે સેય્યા, ઇત્થિયા ધમ્મદેસના;

દુવે સેનાસનાનીપિ, સિબ્બનં ચીવરસ્સપિ.

૧૦૩. પવારિતં સુરાપાનં, પઞ્ચસન્નિધિઆદિકં;

જોતિનુજ્જાલનઞ્ચેવ, કપ્પબિન્દુમનાદિકં;

ગામપ્પવેસનન્તેતે, પાચિત્તીસુ અચિત્તકા.

૧૦૪. પકિણ્ણકેસુ ઉદ્દિસ્સ-કતં હિત્વાઞ્ઞમંસકં;

એકત્થરણપાવુરણં, એકમઞ્ચે તુવટ્ટનં;

એકતો ભુઞ્જનઞ્ચાપિ, નચ્ચગીતાદિસત્તપિ.

૧૦૫. અકાયબન્ધનઞ્ચાપિ, પત્તહત્થકવાટકં;

અચિત્તકમિદં સબ્બં, સેસમેત્થ સચિત્તકં.

૧૦૬. વીતિક્કમનચિત્તેન, સચિત્તકમચિત્તકં;

પઞ્ઞત્તિજાનનેનાપિ, વદન્તાચરિયા તથા.

૧૦૭. પુબ્બકરણાદિકં કત્વા, ઉપોસથપ્પવારણં;

નવધા દીપિતં સબ્બં, કાતબ્બં પિયસીલિના.

૧૦૮. સમ્મજ્જની પદીપો ચ, ઉદકં આસનેન ચ;

ઉપોસથસ્સ એતાનિ, પુબ્બકરણન્તિ વુચ્ચતિ.

૧૦૯. છન્દપારિસુદ્ધિઉતુક્ખાનં, ભિક્ખુગણના ચ ઓવાદો;

ઉપોસથસ્સ એતાનિ, પુબ્બકિચ્ચન્તિ વુચ્ચતિ.

૧૧૦. ઉપોસથો યાવતિકા ચ ભિક્ખૂ કમ્મપ્પત્તા,

સભાગાપત્તિયો ચ ન વિજ્જન્તિ;

વજ્જનીયા ચ પુગ્ગલા તસ્મિં ન હોન્તિ,

પત્તકલ્લન્તિ વુચ્ચતિ.

૧૧૧. પુબ્બકરણપુબ્બકિચ્ચાનિ સમાપેત્વા દેસિતાપત્તિકસ્સ સમગ્ગસ્સ ભિક્ખુસઙ્ઘસ્સ અનુમતિયા પાતિમોક્ખં ઉદ્દિસિતું આરાધનં કરોમ.

૧૧૨. પારિસુદ્ધિઅધિટ્ઠાન-સુત્તુદ્દેસવસા તિધા;

ગણપુગ્ગલસઙ્ઘા ચ, તં કરેય્યું યથાક્કમં.

૧૧૩. ચાતુદ્દસો પન્નરસો, સામગ્ગી દિનતો તિધા;

દિનપુગ્ગલકત્તબ્બા-કારતો તે નવેરિતા.

૧૧૪. તયો તયોતિ કત્વાન, દિનપુગ્ગલભેદતો;

તેવાચીદ્વેકવાચીતિ, નવ વુત્તા પવારણા.

૧૧૫. કત્તિકન્તિમપક્ખમ્હા, હેમં ફગ્ગુનપુણ્ણમા;

તસ્સ અન્તિમપક્ખમ્હા, ગિમ્હં આસાળ્હિપુણ્ણમા;

વસ્સકાલં તતો સેસં, ચતુવીસતુપોસથા.

૧૧૬. ચાતુદ્દસા છ એતેસુ, પક્ખા તતિયસત્તમા;

ઞેય્યા પન્નરસા સેસા, અટ્ઠારસ ઉપોસથા.

૧૧૭. ‘‘છન્દં દમ્મિ, છન્દં મે હર, છન્દં મે આરોચેહી’’તિ છન્દં દાતબ્બં.

૧૧૮. ‘‘પારિસુદ્ધિં દમ્મિ, પારિસુદ્ધિં મે હર, પારિસુદ્ધિં મે આરોચેહી’’તિ પારિસુદ્ધિ દાતબ્બા.

૧૧૯. ‘‘પવારણં દમ્મિ, પવારણં મે હર, પવારણં મે આરોચેહિ, મમત્થાય પવારેહી’’તિ પવારણા દાતબ્બા.

૧૨૦. આપત્તિદેસકેન ‘‘અહં, ભન્તે, સમ્બહુલા નાનાવત્થુકા આપત્તિયો આપજ્જિં, તા તુમ્હમૂલે પટિદેસેમી’’તિ વત્વા પટિગ્ગણ્હન્તેન ‘‘પસ્સસિ, આવુસો, તા આપત્તિયો’’તિ વુત્તે ‘‘આમ, ભન્તે, પસ્સામી’’તિ વત્વા પુન પટિગ્ગણ્હન્તેન ‘‘આયતિં, આવુસો, સંવરેય્યાસી’’તિ વુત્તે ‘‘સાધુ, સુટ્ઠુ, ભન્તે સંવરિસ્સામી’’તિ તિક્ખત્તું વત્વા દેસેતબ્બં.

૧૨૧. વેમતિં આરોચેન્તેન ‘‘અહં, ભન્તે, સમ્બહુલાસુ નાનાવત્થુકાસુ આપત્તીસુ વેમતિકો, યદા નિબ્બેમતિકો ભવિસ્સામિ, તદા તા આપત્તિયો પટિકરિસ્સામી’’તિ તિક્ખત્તું વત્વા આરોચેતબ્બં.

૧૨૨. ‘‘અજ્જ મે ઉપોસથો ‘પન્નરસો, ચાતુદ્દસો’તિ વા અધિટ્ઠામી’’તિ તિક્ખત્તું વત્વા પુગ્ગલેન અધિટ્ઠાનુપોસથો કાતબ્બો.

૧૨૩. દ્વીસુ પન થેરેન ‘‘પરિસુદ્ધો અહં આવુસો, ‘પરિસુદ્ધો’તિ મં ધારેહી’’તિ તિક્ખત્તું વત્તબ્બં. નવકેનપિ તથેવ વત્તબ્બં. ‘‘ભન્તે, ધારેથા’’તિ વચનં વિસેસો.

૧૨૪. તીસુ પન ‘‘સુણન્તુ મે આયસ્મન્તા, અજ્જુપોસથો પન્નરસો, યદાયસ્મન્તાનં પત્તકલ્લં, મયં અઞ્ઞમઞ્ઞં પારિસુદ્ધિઉપોસથં કરેય્યામા’’તિ ઞત્તિં ઠપેત્વા પટિપાટિયા વુત્તનયેન પારિસુદ્ધિઉપોસથો કાતબ્બો.

૧૨૫. ‘‘અજ્જ મે પવારણા ‘ચાતુદ્દસી, પન્નરસી’તિ વા અધિટ્ઠામી’’તિ તિક્ખત્તું વત્વા એકેન પવારેતબ્બં.

૧૨૬. દ્વીસુ પન થેરેન ‘‘અહં, આવુસો, આયસ્મન્તં પવારેમિ દિટ્ઠેન વા સુતેન વા પરિસઙ્કાય વા, વદતુ મં આયસ્મા અનુકમ્પં ઉપાદાય, પસ્સન્તો પટિકરિસ્સામી’’તિ તિક્ખત્તું વત્વા પવારેતબ્બં. નવકેનાપિ તથેવ વત્તબ્બં. ‘‘ભન્તે’’તિ વચનં વિસેસો.

૧૨૭. તીસુ વા ચતૂસુ વા પન ‘‘સુણન્તુ મે આયસ્મન્તા, અજ્જ પવારણા પન્નરસી, યદાયસ્મન્તાનં પત્તકલ્લં, મયં અઞ્ઞમઞ્ઞં પવારેય્યામા’’તિ ઞત્તિં ઠપેત્વા થેરેન ‘‘અહં, આવુસો, આયસ્મન્તે પવારેમિ દિટ્ઠેન વા સુતેન વા પરિસઙ્કાય વા, વદન્તુ મં આયસ્મન્તા અનુકમ્પં ઉપાદાય, પસ્સન્તો પટિકરિસ્સામી’’તિ તિક્ખત્તું વત્વા પવારેતબ્બં. નવકેહિપિ તથેવ પટિપાટિયા પવારેતબ્બં. ‘‘ભન્તે’’તિવચનં વિસેસો.

૧૨૮. ચતૂહિ અધિકેસુ પન ‘‘સુણાતુ મે આવુસો સઙ્ઘો, અજ્જ પવારણા પન્નરસી, યદિ સઙ્ઘસ્સ પત્તકલ્લં, સઙ્ઘો પવારેય્યા’’તિ ઞત્તિં ઠપેત્વા વુડ્ઢતરેન ‘‘સઙ્ઘં, આવુસો, પવારેમિ દિટ્ઠેન વા સુતેન વા પરિસઙ્કાય વા, વદન્તુ મં આયસ્મન્તો અનુકમ્પં ઉપાદાય, પસ્સન્તો પટિકરિસ્સામી’’તિ તિક્ખત્તું વત્વા પવારેતબ્બં. નવકેહિપિ તથેવ પટિપાટિયા ‘‘સઙ્ઘં, ભન્તે, પવારેમિ દિટ્ઠેન વા સુતેન વા પરિસઙ્કાય વા, વદન્તુ મં આયસ્મન્તો અનુકમ્પં ઉપાદાય, પસ્સન્તો પટિકરિસ્સામી’’તિ તિક્ખત્તું વત્વા પવારેતબ્બં.

મૂલસિક્ખા નિટ્ઠિતા.

નમો તસ્સ ભગવતો અરહતો સમ્માસમ્બુદ્ધસ્સ