૫. પકિણ્ણકનિદ્દેસો

૫૩. સઙ્ઘિકં ગરુભણ્ડં યો, દેતિ અઞ્ઞસ્સ ઇસ્સરો;

થુલ્લચ્ચયં યથાવત્થું, થેય્યા પારાજિકાદિપિ.

૫૪. કુસાદિમયચીરાનિ, કમ્બલં કેસવાલજં;

સમયં વિના ધારયતો, લૂકપક્ખાજિનક્ખિપં.

૫૫. સત્થકમ્મે વત્થિકમ્મે, સં નિમિત્તઞ્ચ છિન્દતો;

થુલ્લચ્ચયં મનુસ્સાનં, મંસાદિભોજનેપિ વા.

૫૬. કદલેરકક્કદુસ્સાનિ, પોત્થકં સબ્બનીલકં;

સબ્બપીતાદિકઞ્ચાપિ, ધારયન્તસ્સ દુક્કટં.

૫૭. હત્થિસ્સુરગસોણાનં, સીહબ્યગ્ઘચ્છદીપિનં;

તરચ્છસ્સ ચ મંસાદિં, ઉદ્દિસ્સકતકમ્પિ ચ.

૫૮. અનાપુચ્છિતમંસઞ્ચ, ભુઞ્જતો દુક્કટં સિયા;

યાતાનુપુબ્બં હિત્વાન, દકતિત્થાદિકં વજે.

૫૯. સહસા વુબ્ભજિત્વાન, પવિસે નિક્ખમેય્ય વા;

વચ્ચપસ્સાવકુટિકં, વિના ઉક્કાસિકં વિસે.

૬૦. નિત્થુનન્તો કરે વચ્ચં, દન્તકટ્ઠઞ્ચ ખાદયં;

વચ્ચપસ્સાવદોણીનં, બહિ વચ્ચાદિકં કરે.

૬૧. ખરેન ચાવલેખેય્ય, કટ્ઠં પાતેય્ય કૂપકે;

ઊહતઞ્ચ ન ધોવેય્ય, ઉક્લાપઞ્ચ ન સોધયે.

૬૨. દકકિચ્ચં કરોન્તસ્સ, કત્વા ‘‘ચપુચપૂ’’તિ ચ;

અનજ્ઝિટ્ઠોવ થેરેન, પાતિમોક્ખમ્પિ ઉદ્દિસે.

૬૩. અનાપુચ્છાય પઞ્હસ્સ, કથને વિસ્સજ્જનેપિ ચ;

સજ્ઝાયકરણે દીપ-જાલને વિજ્ઝાપનેપિ ચ.

૬૪. વાતપાનકવાટાનિ, વિવરેય્ય થકેય્ય વા;

વન્દનાદિં કરે નગ્ગો, ગમનં ભોજનાદિકં.

૬૫. પરિકમ્મં કરે કારે, તિપટિચ્છન્નકં વિના;

કાયં નહાયં ઘંસેય્ય, કુટ્ટે થમ્ભે તરુમ્હિ વા.

૬૬. કુરુવિન્દકસુત્તેન, અઞ્ઞમઞ્ઞસ્સ કાયતો;

અગિલાનો બહારામે, ચરેય્ય સઉપાહનો.

૬૭. ઉપાહનં યો ધારેતિ, સબ્બનીલાદિકમ્પિ ચ;

નિમિત્તં ઇત્થિયા રત્તો, મુખં વા ભિક્ખદાયિયા.

૬૮. ઉજ્ઝાનસઞ્ઞી અઞ્ઞસ્સ, પત્તં વા અત્તનો મુખં;

આદાસાદિમ્હિ પસ્સેય્ય, ઉચ્ચાસનમહાસને.

૬૯. નિસજ્જાદિં કરોન્તસ્સ, દુક્કટં વન્દનેપિ ચ;

ઉક્ખિત્તાનુપસમ્પન્ન-નાનાસંવાસકાદિનં.

૭૦. એકતો પણ્ડકિત્થીહિ, ઉભતોબ્યઞ્જનેન વા;

દીઘાસને નિસીદેય્ય, અદીઘે આસને પન.

૭૧. અસમાનાસનિકેન, મઞ્ચપીઠે સયેય્ય વા;

કુલસઙ્ગહત્થં દદતો, ફલપુપ્ફાદિકમ્પિ ચ.

૭૨. ગન્થિમાદિં કરે કારે, જિનવારિતપચ્ચયે;

પરિભુઞ્જેય્ય અબ્યત્તો, અનિસ્સાય વસેય્ય વા.

૭૩. અનુઞ્ઞાતેહિ અઞ્ઞસ્સ, ભેસજ્જં વા કરે વદે;

કરે સાપત્તિકો ભિક્ખુ, ઉપોસથપ્પવારણં.

૭૪. દ્વારબન્ધાદિકે ઠાને, પરિવત્તકવાટકં;

અપિધાય વિનાભોગં, નિયોગં વા સયે દિવા.

૭૫. ધઞ્ઞિત્થિરૂપરતનં, આવુધિત્થિપસાધનં;

તૂરિયભણ્ડં ફલં રુક્ખે, પુબ્બણ્ણાદિઞ્ચ આમસે.

૭૬. સસિત્થોદકતેલેહિ, ફણહત્થફણેહિ વા;

કેસમોસણ્ઠનેકસ્મિં, ભાજને ભોજનેપિ ચ.

૭૭. એકત્થરણપાવુરણા, સયેય્યું દ્વેકમઞ્ચકે;

દન્તકટ્ઠઞ્ચ ખાદેય્ય, અધિકૂનં પમાણતો.

૭૮. યોજેતિ વા યોજાપેતિ, નચ્ચં ગીતઞ્ચ વાદિતં;

દસ્સનં સવનં તેસં, કરોન્તસ્સ ચ દુક્કટં.

૭૯. વીહાદિરોપિમે ચાપિ, બહિપાકારકુટ્ટકે;

વચ્ચાદિછડ્ડનાદિમ્હિ, દીઘકેસાદિધારણે.

૮૦. નખમટ્ઠકરણાદિમ્હિ, સમ્બાધે લોમહારણે;

પરિકમ્મકતં ભૂમિં, અક્કમે સઉપાહનો.

૮૧. અધોતઅલ્લપાદેહિ, સઙ્ઘિકં મઞ્ચપીઠકં;

પરિકમ્મકતં ભિત્તિં, આમસન્તસ્સ દુક્કટં.

૮૨. સઙ્ઘાટિયાપિ પલ્લત્થે, દુપ્પરિભુઞ્જેય્ય ચીવરં;

અકાયબન્ધનો ગામં, વજે કત્વાન વચ્ચકં.

૮૩. નાચમેય્ય દકે સન્તે, સમાદેય્ય અકપ્પિયે;

દેસનારોચનાદિમ્હિ, સભાગાપત્તિયાપિ ચ.

૮૪. ન વસે વસ્સં વિસંવાદે, સુદ્ધચિત્તે પટિસ્સવં;

વસ્સં વસિત્વા ગમને, અનનુઞ્ઞાતકિચ્ચતો.

૮૫. વિનાપદં તરુસ્સુદ્ધં, પોરિસમ્હાભિરૂહણે;

અપરિસ્સાવનોદ્ધાનં, વજે તં યાચતો ન દે.

૮૬. અત્તનો ઘાતને ઇત્થિ-રૂપાદિં કારયેય્ય વા;

હિત્વા માલાદિકં ચિત્તં, જાતકાદિં સયં કરે.

૮૭. ભુઞ્જન્તમુટ્ઠપે તસ્સ, સાલાદીસુ નિસીદતો;

વુડ્ઢાનં પન ઓકાસં, અદત્વા વાપિ દુક્કટં.

૮૮. યાનાદિમભિરૂહેય્ય, કલ્લકો રતનત્તયં;

આરબ્ભ વદે દવઞ્ઞ-પરિસાયોપલાલને.

૮૯. કાયાદિં વિવરિત્વાન, ભિક્ખુનીનં ન દસ્સયે;

વાચે લોકાયતં પલિતં, ગણ્હેય્ય ગણ્હાપેય્ય વા.

૯૦. યત્થ કત્થચિ પેળાયં, ભુઞ્જતો પત્તહત્થકો;

વાતપાનકવાટં વા, પણામે સોદકમ્પિ ચ.

૯૧. ઉણ્હેય્ય પટિસામેય્ય, અતિઉણ્હેય્ય વોદકં;

ઠપેય્ય ભૂમિયં પત્તં, અઙ્કે વા મઞ્ચપીઠકે.

૯૨. મિડ્ઢન્તે પરિભણ્ડન્તે, પાદે છત્તે ઠપેતિ વા;

ચલકાદિં ઠપે પત્તં, પત્તે વા હત્થધોવને.

૯૩. પત્તેન નીહરન્તસ્સ, ઉચ્છિટ્ઠમુદકમ્પિ ચ;

અકપ્પિયમ્પિ પત્તં વા, પરિભુઞ્જેય્ય દુક્કટં.

૯૪. વદે ‘‘જીવા’’તિ ખિપિતે, ન સિક્ખતિ અનાદરો;

પરિમણ્ડલકાદિમ્હિ, સેખિયે દુક્કટં સિયા.

૯૫. યો ભણ્ડગારે પયુતોવ ભણ્ડકં,

માતૂન પાચિત્તિયમસ્સ ગોપયે;

દવાય હીનેનપિ જાતિઆદિના,

વદેય્ય દુબ્ભાસિતમુત્તમમ્પિ યોતિ.