૪. પાચિત્તિયનિદ્દેસો

૩૦. સમ્પજાનમુસાવાદે, પાચિત્તિયમુદીરિતં;

ભિક્ખુઞ્ચ ઓમસન્તસ્સ, પેસુઞ્ઞહરણેપિ ચ.

૩૧. ઠપેત્વા ભિક્ખુનિં ભિક્ખું, અઞ્ઞેન પિટકત્તયં;

પદસોધમ્મં ભણન્તસ્સ, પાચિત્તિયમુદીરિતં.

૩૨. અનુપસમ્પન્નેનેવ, સયિત્વાન તિરત્તિયં;

પાચિત્તિ સહસેય્યાય, ચતુત્થત્થઙ્ગતે પુન.

૩૩. ઇત્થિયા એકરત્તમ્પિ, સેય્યં કપ્પયતોપિ વા;

દેસેન્તસ્સ વિના વિઞ્ઞું, ધમ્મઞ્ચ છપ્પદુત્તરિં.

૩૪. દુટ્ઠુલ્લં ભિક્ખુનો વજ્જં, ભિક્ખુસમ્મુતિયા વિના;

અભિક્ખુનો વદન્તસ્સ, પાચિત્તિયમુદીરિતં.

૩૫. ખણેય્ય વા ખણાપેય્ય, પથવિઞ્ચ અકપ્પિયં;

ભૂતગામં વિકોપેય્ય, તસ્સ પાચિત્તિયં સિયા.

૩૬. અજ્ઝોકાસે તુ મઞ્ચાદિં, કત્વા સન્થરણાદિકં;

સઙ્ઘિકં યાતિ પાચિત્તિ, અકત્વાપુચ્છનાદિકં.

૩૭. સઙ્ઘિકાવસથે સેય્યં, કત્વા સન્થરણાદિકં;

અકત્વાપુચ્છનાદિં યો, યાતિ પાચિત્તિ તસ્સપિ.

૩૮. જાનં સપ્પાણકં તોયં, પાચિત્તિ પરિભુઞ્જતો;

અઞ્ઞાતિકા ભિક્ખુનિયા, ઠપેત્વા પારિવત્તકં.

૩૯. ચીવરં દેતિ પાચિત્તિ, ચીવરં સિબ્બતોપિ ચ;

અતિરિત્તં અકારેત્વા, પવારેત્વાન ભુઞ્જતો.

૪૦. ભિક્ખું આસાદનાપેક્ખો, પવારેતિ પવારિતં;

અનતિરિત્તેન ભુત્તે તુ, પાચિત્તિયમુદીરિતં.

૪૧. સન્નિધિભોજનં ભુઞ્જે, વિકાલે યાવકાલિકં;

ભુઞ્જતો વાપિ પાચિત્તિ, અગિલાનો પણીતકં.

૪૨. વિઞ્ઞાપેત્વાન ભુઞ્જેય્ય, સપ્પિભત્તાદિકમ્પિ ચ;

અપ્પટિગ્ગહિતં ભુઞ્જે, દન્તકટ્ઠોદકં વિના.

૪૩. તિત્થિયસ્સ દદે કિઞ્ચિ, ભુઞ્જિતબ્બં સહત્થતો;

નિસજ્જં વારહો કપ્પે, માતુગામેન ચેકતો.

૪૪. સુરામેરયપાનેપિ, પાચિત્તિયમુદીરિતં;

અઙ્ગુલિપતોદકે ચાપિ, હસધમ્મેપિ ચોદકે.

૪૫. અનાદરેપિ પાચિત્તિ, ભિક્ખું ભીસયતોપિ વા;

ભયાનકં કથં કત્વા, દસ્સેત્વા વા ભયાનકં.

૪૬. ઠપેત્વા પચ્ચયં કિઞ્ચિ, અગિલાનો જલેય્ય વા;

જોતિં જલાપયેય્યાપિ, તસ્સ પાચિત્તિયં સિયા.

૪૭. કપ્પબિન્દુમનાદાય, નવચીવરભોગિનો;

હસાપેક્ખસ્સ પાચિત્તિ, ભિક્ખુનો ચીવરાદિકં.

૪૮. અપનેત્વા નિધેન્તસ્સ, નિધાપેન્તસ્સ વા પન;

જાનં પાણં મારેન્તસ્સ, તિરચ્છાનગતમ્પિ ચ.

૪૯. છાદેતુકામો છાદેતિ, દુટ્ઠુલ્લં ભિક્ખુનોપિ ચ;

ગામન્તરગતસ્સાપિ, સંવિધાયિત્થિયા સહ.

૫૦. ભિક્ખું પહરતો વાપિ, તલસત્તિકમુગ્ગિરે;

ચોદેતિ વા ચોદાપેતિ, ગરુકામૂલકેનપિ.

૫૧. કુક્કુચ્ચુપ્પાદને ચાપિ, ભણ્ડનત્થાયુપસ્સુતિં;

સોતું ભણ્ડનજાતાનં, યાતિ પાચિત્તિયં સિયા.

૫૨. સઙ્ઘસ્સ લાભં પરિણામિતં તુ,

નામેતિ યો તં પરપુગ્ગલસ્સ;

પુચ્છં અકત્વાપિ ચ સન્તભિક્ખું,

પાચિત્તિ ગામસ્સ ગતે વિકાલેતિ.