૩. નિસ્સગ્ગિયનિદ્દેસો

૧૭. વિકપ્પનમધિટ્ઠાન-મકત્વા કાલચીવરં;

દસાહમતિમાપેતિ, તસ્સ નિસ્સગ્ગિયં સિયા.

૧૮. ભિક્ખુસમ્મુતિયાઞ્ઞત્ર, તિચીવરમધિટ્ઠિતં;

એકાહમતિમાપેતિ, નિસ્સગ્ગિ સમયં વિના.

૧૯. અઞ્ઞાતિકા ભિક્ખુનિયા, પુરાણચીવરં પન;

ધોવાપેતિ રજાપેતિ, આકોટાપેતિ તં સિયા.

૨૦. અઞ્ઞાતિકા ભિક્ખુનિયા, હત્થતો કિઞ્ચિ મૂલકં;

અદત્વા ચીવરાદાને, નિસ્સગ્ગિયમુદીરિતં.

૨૧. અપ્પવારિતમઞ્ઞાતિં, વિઞ્ઞાપેન્તસ્સ ચીવરં;

અઞ્ઞત્ર સમયા તસ્સ, નિસ્સગ્ગિયમુદીરિતં.

૨૨. રજતં જાતરૂપં વા, માસકં વા કહાપણં;

ગણ્હેય્ય વા ગણ્હાપેય્ય, નિસ્સગ્ગિ સાદિયેય્ય વા.

૨૩. પરિવત્તેય્ય નિસ્સગ્ગિ, રજતાદિ ચતુબ્બિધં;

કપ્પિયં કપ્પિયેનાપિ, ઠપેત્વા સહધમ્મિકે.

૨૪. વિકપ્પનમધિટ્ઠાન-મકત્વાન પમાણિકં;

દસાહમતિમાપેતિ, પત્તં નિસ્સગ્ગિયં સિયા.

૨૫. પઞ્ચબન્ધનતો ઊન-પત્તે સતિ પરં પન;

વિઞ્ઞાપેતિ નવં પત્તં, તસ્સ નિસ્સગ્ગિયં સિયા.

૨૬. પટિગ્ગહેત્વા ભુઞ્જન્તો, સપ્પિતેલાદિકં પન;

સત્તાહમતિમાપેતિ, તસ્સ નિસ્સગ્ગિયં સિયા.

૨૭. ભિક્ખુસ્સ ચીવરં દત્વા, અચ્છિન્દન્તસ્સ તં પુન;

સકસઞ્ઞાય નિસ્સગ્ગિ, અચ્છિન્દાપયતોપિ વા.

૨૮. અપ્પવારિતમઞ્ઞાતિં, સુત્તં યાચિય ચીવરં;

વાયાપેન્તસ્સ નિસ્સગ્ગિ, વિના ઞાતિપ્પવારિતે.

૨૯. જાનન્તો ભિક્ખુ સઙ્ઘસ્સ, લાભં પરિણતં પન;

અત્તનો પરિણામેતિ, તસ્સ નિસ્સગ્ગિયં સિયાતિ.