૧. પારાજિકનિદ્દેસો

૧. સં નિમિત્તં પવેસન્તો, ભિક્ખુ મગ્ગત્તયે ચુતો;

પવેસનટ્ઠિતુદ્ધાર-પવિટ્ઠે ચેપિ સાદિયં.

૨. અદિન્નં માનુસં ભણ્ડં, થેય્યાયેકેન આદિયં;

પઞ્ચવીસાવહારેસુ, ગરુકં ચે ચુતો ભવે.

૩. આદિયન્તો હરન્તોવ-હરન્તોપિરિયાપથં;

વિકોપેન્તો તથા ઠાના, ચાવેન્તોપિ પરાજિકો.

૪. તત્થ નાનેકભણ્ડાનં, પઞ્ચકાનં વસા પન;

અવહારા દસઞ્ચેતિ, વિઞ્ઞાતબ્બા વિભાવિના.

૫. સાહત્થાણત્તિકો ચેવ, નિસ્સગ્ગો ચાત્થસાધકો;

ધુરનિક્ખેપનઞ્ચેવ, ઇદં સાહત્થપઞ્ચકં.

૬. પુબ્બસહપ્પયોગો ચ, સંવિધાહરણમ્પિ ચ;

સઙ્કેતકમ્મં નિમિત્તં, પુબ્બપ્પયોગપઞ્ચકં.

૭. થેય્યાપસય્હપરિકપ્પ-પ્પટિચ્છન્નકુસાદિકા;

અવહારા ઇમે પઞ્ચ, વિઞ્ઞાતબ્બા વિભાવિના.

૮. મનુસ્સપાણં પાણોતિ, જાનં વધકચેતસા;

જીવિતા યો વિયોજેતિ, સાસના સો પરાજિતો.

૯. ઝાનાદિભેદં હદયે અસન્તં,

અઞ્ઞપદેસઞ્ચ વિનાધિમાનં;

મનુસ્સજાતિસ્સ વદેય્ય ભિક્ખુ,

ઞાતક્ખણે તેન પરાજિકો ભવેતિ.