૪૭. સુદ્ધિનિદ્દેસવણ્ણના

૪૫૫. દેસના સંવરો એટ્ઠિ પચ્ચવેક્ખણન્તિ ભેદતો સુદ્ધિ ચતુબ્બિધાતિ સમ્બન્ધો. ‘‘પચ્ચવેક્ખણં ભેદતો’’તિ વત્તબ્બે નિગ્ગહિતલોપો દટ્ઠબ્બો, દેસનાસુદ્ધિ સંવરસુદ્ધિ પરિયેટ્ઠિસુદ્ધિ પચ્ચવેક્ખણસુદ્ધીતિ ચતુબ્બિધાતિ વુત્તં હોતિ. તત્થ સુજ્ઝતીતિ સુદ્ધિ, યથાધમ્મં દેસનાય સુદ્ધિ દેસનાસુદ્ધિ. વુટ્ઠાનસ્સાપિ ચેત્થ દેસનાય એવ સઙ્ગહો દટ્ઠબ્બો. મૂલાપત્તીનં પન અભિક્ખુતાપટિઞ્ઞાવ દેસનાતિ હેટ્ઠા વુત્તા, સાવસ્સ પારાજિકાપન્નસ્સ વિસુદ્ધિ નામ હોતિ. અયઞ્હિ યસ્મા પારાજિકં આપન્નો, તસ્મા ભિક્ખુભાવે ઠત્વા અભબ્બો ઝાનાદીનિ અધિગન્તું. ભિક્ખુભાવો હિસ્સ સગ્ગન્તરાયો ચેવ હોતિ, મગ્ગન્તરાયો ચ. વુત્તઞ્હેતં –

‘‘સામઞ્ઞં દુપ્પરામટ્ઠં, નિરયાયૂપકડ્ઢતી’’તિ. (ધ. પ. ૩૧૧);

અપરમ્પિ વુત્તં –

‘‘સિથિલો હિ પરિબ્બજો, ભિય્યો આકિરતે રજ’’ન્તિ. (ધ. પ. ૩૧૩);

ઇચ્ચસ્સ ભિક્ખુભાવો વિસુદ્ધિ નામ ન હોતિ. યસ્મા પન ગિહિઆદિકો હુત્વા દાનસરણસીલસંવરાદીહિ સગ્ગમગ્ગં વા ઝાનવિમોક્ખમગ્ગં વા આરાધેતું ભબ્બો હોતિ, તસ્માસ્સ ગિહિઆદિભાવો વિસુદ્ધિ નામ હોતિ. અધિટ્ઠાનવિસિટ્ઠેન સંવરેન વિસુદ્ધિ સંવરવિસુદ્ધિ. ધમ્મેન સમેન પચ્ચયાનં એટ્ઠિયા સુદ્ધિ એટ્ઠિસુદ્ધિ. ચતૂસુ પચ્ચયેસુ પચ્ચવેક્ખણેન સુદ્ધિ પચ્ચવેક્ખણસુદ્ધિ. ‘‘ચતુબ્બિધા પાતી’’તિઆદીસુ પાતિમોક્ખસંવરસમ્મતન્તિ ‘‘પાતિમોક્ખસંવરો’’તિ સમ્મતં સીલં.

૪૫૬. ચિત્તાધિટ્ઠાનસંવરા સુજ્ઝતીતિ ઇન્દ્રિયસંવરો સંવરસુદ્ધીતિ વુત્તોતિ યોજના.

૪૫૭. અનેસનં પહાય ધમ્મેન ઉપ્પાદેન્તસ્સ એટ્ઠિયા સુદ્ધત્તા આજીવનિસ્સિતં એટ્ઠિસુદ્ધીતિ વુત્તન્તિ સમ્બન્ધો. ઉપ્પાદેન્તસ્સાતિ પચ્ચયે ઉપ્પાદેન્તસ્સ.

૪૫૮. પચ્ચવેક્ખણસુજ્ઝનાતિ હેતુમ્હિ પઞ્ચમીતિ.

સુદ્ધિનિદ્દેસવણ્ણના નિટ્ઠિતા.

૪૮. સન્તોસનિદ્દેસવણ્ણના

૪૫૯. પંસુકૂલં પિણ્ડિયાલોપો રુક્ખમૂલં પૂતિમુત્તભેસજ્જન્તિ ઇમે ચત્તારો પચ્ચયા અપ્પગ્ઘનકતાય અપ્પા ચેવ કસ્સચિપિ આલયાભાવેન અનવજ્જા ચ ગતગતટ્ઠાને લબ્ભમાનતાય સુલભા ચાતિ વુચ્ચન્તિ, તેનાહ ‘‘અપ્પેના’’તિઆદિ. મત્તઞ્ઞૂતિ પરિયેસનપ્પટિગ્ગહણપરિભોગવિસ્સજ્જનેસુ ચતૂસુ મત્તઞ્ઞુતાવસેન પમાણઞ્ઞૂ.

૪૬૦. કથં સન્તુટ્ઠોતિ આહ ‘‘અતીત’’ન્તિઆદિ. પચ્ચુપ્પન્નેન યાપેન્તોતિ યથાલાભયથાબલયથાસારુપ્પવસેન પચ્ચુપ્પન્નેન યથાવુત્તચતુબ્બિધપચ્ચયેન યાપેન્તોતિ.

સન્તોસનિદ્દેસવણ્ણના નિટ્ઠિતા.