૨૬. સમાનાસનિકનિદ્દેસવણ્ણના

૧૯૫. તિવસ્સન્તરમેકમાસનં ભિક્ખૂનં અનુઞ્ઞાતન્તિ સમ્બન્ધો. તત્થ એકસ્મિં આસને મઞ્ચાદિકે દ્વિન્નં આસનં નિસીદનં એકમાસનં. મ-કારો સન્ધિજો. કીદિસન્તિ આહ ‘‘તિવસ્સન્તર’’ન્તિ. તિણ્ણં વસ્સાનમન્તરમેતસ્સાતિ તિવસ્સન્તરો, દ્વીહિ વસ્સેહિ મહન્તતરો વા દહરતરો વા ભિક્ખુ, સો અસ્સ અત્થીતિ તિવસ્સન્તરં, તિવસ્સન્તરવન્તન્તિ અત્થો. યો પન એકેન વસ્સેન મહન્તતરો વા દહરતરો વા એકવસ્સોયેવ વા, તબ્બન્તતાય વત્તબ્બમેવ નત્થિ. અથ વા તિવસ્સન્તરન્તિ કરણત્થે ઉપયોગવચનં, તિવસ્સન્તરેન સદ્ધિન્તિ અત્થો. તમેવ સમત્થેતિ ‘‘સત્તવસ્સે’’ચ્ચાદિના.

૧૯૬. મુનિ અનુઞ્ઞાસીતિ સમ્બન્ધો. સબ્બેહેવાતિ સમાનાસનિકઅસમાનાસનિકેહિ સબ્બેહેવ સદ્ધિં.

૧૯૭. દીઘાસનં દસ્સેતિ ‘‘અન્ત’’ન્તિઆદિના. યં તિણ્ણં નિસીદિતું પહોતિ, તં અન્તં દીઘાસનન્તિ સમ્બન્ધો. અન્તન્તિ પચ્છિમં. અદીઘાસને પન સમાનાસનિકા નિસીદિતું લબ્ભન્તીતિ દસ્સેન્તો ‘‘મઞ્ચકે’’તિઆદિમાહ. સબ્બત્થ અયથાકરણતો દુક્કટન્તિ.

સમાનાસનિકનિદ્દેસવણ્ણના નિટ્ઠિતા.