૨૭. અસંવાસનિદ્દેસવણ્ણના

૧૯૮. ઉક્ખિત્તોતિ કમ્મનાનાસંવાસકસઙ્ખાતો આપત્તિયા અદસ્સને, અપ્પટિકમ્મે, પાપિકાય દિટ્ઠિયા અપ્પટિનિસ્સગ્ગે ઉક્ખિત્તકો. અનુપસમ્પન્નોતિ સિક્ખમાનસામણેરસામણેરિસિક્ખાપચ્ચક્ખાતસઙ્ખાતો અનુપસમ્પન્નો. છિન્નમૂલકોતિ અન્તિમવત્થુઅજ્ઝાપન્નો. ઉક્ખિત્તકેસુ ‘‘ધમ્મવાદિનો એતે’’તિ ઉપ્પન્નાય લદ્ધિયા નાનાભૂતો સંવાસો એતસ્સાતિ નાનાસંવાસો, ઉક્ખિત્તાનુવત્તકસઙ્ખાતો લદ્ધિનાનાસંવાસકો. સીમતો નિગ્ગતા નિસ્સીમા, સીમન્તરિકા બહિસીમા ચ, તત્થ હત્થપાસે ચેપિ ઠિતો, સીમાનાનાસંવાસકો નિસ્સીમટ્ઠિતો. વેહાયસે આકાસે ઠિતો વેહાયસણ્ઠિતો બિન્દાગમેન. તત્થ ‘‘નાનાસંવાસો ચા’’તિઆદિના સમાહારદ્વન્દેપિ ક્વચિ નપુંસકલિઙ્ગં બ્યભિચરતીતિ નપુંસકત્તાભાવો યથા ‘‘મગ્ગામગ્ગો’’તિ. એકકમ્મં એકુદ્દેસો સમસિક્ખતાતિ અયં તિવિધોપિ સંવાસો નામ. સો યેસં નત્થિ, તે અસંવાસા. એતે હત્થપાસતો બહિકરણવસેન વજ્જેતબ્બા. એતેસુ હિ તિવિધે ઉક્ખિત્તકે સતિ ઉપોસથાદિકં કમ્મં કરોન્તસ્સ પાચિત્તિયં, ઇતરેસુ દુક્કટન્તિ.

અસંવાસનિદ્દેસવણ્ણના નિટ્ઠિતા.