૧૪. ભૂમિનિદ્દેસવણ્ણના

૧૩૬. ઇદાનિ ‘‘અનુજાનામિ, ભિક્ખવે, ચતસ્સો કપ્પિયભૂમિયો ઉસ્સાવનન્તિકં ગોનિસાદિકં ગહપતિં સમ્મુતિ’’ન્તિ (મહાવ. ૨૯૫) એવં વુત્તા ચતસ્સો કપ્પિયભૂમિયો દસ્સેતું ‘‘સમ્મુતુસ્સાવનન્તા ચા’’તિઆદિમાહ. યાસૂતિ કપ્પિયભૂમીસુ (કઙ્ખા. અટ્ઠ. સન્નિધિકારકસિક્ખાપદવણ્ણના).

૧૩૭. ઇદાનિ યત્થ કપ્પિયકુટિ ઇચ્છિતબ્બા, તં દસ્સેતું ‘‘વાસત્થાયા’’તિઆદિમાહ. વાસત્થાયાતિ ઇમિના કોટ્ઠાગારભત્તસાલાચેતિયઘરસમ્મુઞ્જનીમાળકાદિ યં યં અઞ્ઞમ્પિ વાસત્થાય કરીયતિ, તત્થ તત્થ કપ્પિયકુટિકરણકિચ્ચં નત્થીતિ દીપિતં હોતિ. ભોજનસાલા પન સેનાસનમેવ, તસ્મા તત્થ કાતબ્બા એવાતિ વદન્તિ. સઙ્ઘિકેવેકસન્તકેતિ એત્થ એકસન્તકો ઉપસમ્પન્નસન્તકોવ વેદિતબ્બો.

૧૩૮. ઇદાનિ કત્તબ્બાકારં દસ્સેતું ‘‘ગેહે’’તિઆદિમાહ. તત્થ સઙ્ઘસ્સ વા એકસ્સ વા ગેહે વિહારે કરિયમાને એવં ઈરયં ‘‘કપ્પિયકુટિં કરોમ, કપ્પિયકુટિં કરોમા’’તિ વા ‘‘કપ્પિયકુટિ કપ્પિયકુટી’’તિ વા વદન્તો પઠમિટ્ઠકત્થમ્ભાદિં ઠપેય્ય, એવં કતા ઉસ્સાવનન્તિકા નામ, એવં ઉદાહરિતવચનન્તિકાતિ અત્થો.

૧૩૯. યેભુય્યેન વા અપરિક્ખિત્તો, સકલોપિ વા અપરિક્ખિત્તો આરામો ‘‘ગોનિસાદી’’તિ વુચ્ચતીતિ સમ્બન્ધો. એત્થ પન સેનાસનેસુ પરિક્ખિત્તેસુપિ આરામે અપરિક્ખિત્તે કપ્પિયકુટિકરણકિચ્ચં નત્થિ. સમ્મુતિં કરોન્તેહિ કતં પરિયોસિતં ‘‘ઇમં વિહારં અડ્ઢયોગં પાસાદં હમ્મિયં ગુહં તિણકુટિકં મણ્ડપ’’ન્તિ તેસં નામં ગહેત્વા તસ્સા કુટિયા હત્થપાસે વા ઠત્વા, તસ્સા અન્તો વા પવિસિત્વા વુત્તનયેનેવ ઞત્તિદુતિયકમ્મવાચાય સમ્મન્નિતબ્બં.

૧૪૦. ‘‘ભિક્ખું ઠપેત્વા અઞ્ઞેહી’’તિ વચનતો સેસસહધમ્મિકેહિપિ દેવમનુસ્સેહિપિ અઞ્ઞેહિ કપ્પિયકુટિયા અત્થાય દિન્નો વા તેસં સન્તકો વા ગેહો ‘‘ગહપતી’’તિ મતો ઞાતોતિ અત્થો, સઙ્ઘસન્તકઞ્ચ ભિક્ખુસન્તકઞ્ચ ઠપેત્વા સબ્બેસં ગેહો ગહપતીતિ અધિપ્પાયો.

૧૪૧. સપ્પિઆદીહિ મિસ્સિતન્તિ સપ્પિઆદીહિ પઞ્ચહિ ચ હલિદ્દિસિઙ્ગિવેરાદિયાવજીવિકેન ચાતિ અત્થો. વજેય્ય અન્તોવુત્થત્તન્તિ એત્થ યાવકાલિકયામકાલિકસઙ્ખાતં પુરિમકાલિકદ્વયં સઙ્ઘિકં વા ભિક્ખુસ્સ વા ભિક્ખુનિયા વા સન્તકં સયં કપ્પિયકુટિયા વુત્થમ્પિ ઇતરેહિ અકપ્પિયકુટિયા વુત્થેહિ મિસ્સિતં અન્તોવુત્થભાવં આગચ્છેય્યાતિ અત્થો.

૧૪૨. તેહેવાતિ અકપ્પિયકુટિયં વુત્થસપ્પિતેલાદીહિ. સામપાકતન્તિ સામંપક્કભાવં ગચ્છતીતિ અત્થો.

૧૪૩-૪. ઇમા પન કપ્પિયકુટિયો યદા જહિતવત્થુકા હોન્તિ, તં દસ્સેતું ‘‘ઉસ્સાવનન્તિકા’’તિઆદિમાહ. સચે થમ્ભે વા ભિત્તિપાદે વા પરિવત્તેન્તિ, યો યો ઠિતો, તત્થ તત્થ પતિટ્ઠાતિ, એતેનુપાયેન સબ્બેસુ પરિવત્તેસુપિ ન વિજહિતવત્થુકાવ હોતીતિ અત્થો. પરિક્ખિત્તે ગોનિસાદિ વિજહિતવત્થુકા. સેસા છદનવિબ્ભમાતિ છદનવિનાસા જહિતવત્થુકા હોન્તીતિ અધિપ્પાયો. ભૂમિવિનિચ્છયો.

ભૂમિનિદ્દેસવણ્ણના નિટ્ઠિતા.