૮. કાલિકનિદ્દેસો

કાલિકા ચાતિ –

૮૪. પટિગ્ગહિતા ચત્તારો, કાલિકા યાવકાલિકં;

યામકાલિકં સત્તાહ-કાલિકં યાવજીવિકં.

૮૫. પિટ્ઠં મૂલં ફલં ખજ્જં, ગોરસો ધઞ્ઞભોજનં;

યાગુસૂપપ્પભુતયો, હોન્તેતે યાવકાલિકા.

૮૬. મધુમુદ્દિકસાલૂક-ચોચમોચમ્બજમ્બુજં;

ફારુસં નગ્ગિસન્તત્તં, પાનકં યામકાલિકં.

૮૭. સાનુલોમાનિ ધઞ્ઞાનિ, ઠપેત્વા ફલજો રસો;

મધૂકપુપ્ફમઞ્ઞત્ર, સબ્બો પુપ્ફરસોપિ ચ.

૮૮. સબ્બપત્તરસો ચેવ, ઠપેત્વા પક્કડાકજં;

સીતોદમદ્દિતોદિચ્ચ-પાકો વા યામકાલિકો.

૮૯. સપ્પિનોનીતતેલાનિ, મધુફાણિતમેવ ચ;

સત્તાહકાલિકા સપ્પિ, યેસં મંસમવારિતં.

૯૦. તેલં તિલવસેરણ્ડ-મધુસાસપસમ્ભવં;

ખુદ્દાભમરમધુકરિ-મક્ખિકાહિ કતં મધુ;

રસાદિઉચ્છુવિકતિ, પક્કાપક્કા ચ ફાણિતં.

૯૧. સવત્થુપક્કા સામં વા, વસા કાલે અમાનુસા;

અઞ્ઞેસં ન પચે વત્થું, યાવકાલિકવત્થુનં.

૯૨. હલિદ્દિં સિઙ્ગિવેરઞ્ચ, વચત્તં લસુણં વચા;

ઉસીરં ભદ્દમુત્તઞ્ચાતિવિસા કટુરોહિણી;

પઞ્ચમૂલાદિકઞ્ચાપિ, મૂલં તં યાવજીવિકં.

૯૩. બિળઙ્ગં મરિચં ગોટ્ઠ-ફલં પિપ્ફલિ રાજિકા;

તિફલેરણ્ડકાદીનં, ફલં તં યાવજીવિકં.

૯૪. કપ્પાસનિમ્બકુટજપટોલસુલસાદિનં;

સૂપેય્યપણ્ણં વજ્જેત્વા, પણ્ણં તં યાવજીવિકં.

૯૫. ઠપેત્વા ઉચ્છુનિય્યાસં,

સરસં ઉચ્છુજં તચં;

નિય્યાસો ચ તચો સબ્બો,

લોણં લોહં સિલા તથા.

૯૬. સુદ્ધસિત્થઞ્ચ સેવાલો, યઞ્ચ કિઞ્ચિ સુઝાપિતં;

વિકટાદિપ્પભેદઞ્ચ, ઞાતબ્બં યાવજીવિકં.

૯૭. મૂલં સારં તચો ફેગ્ગુ, પણ્ણં પુપ્ફં ફલં લતા;

આહારત્થ મસાધેન્તં, સબ્બં તં યાવજીવિકં.

૯૮. સબ્બકાલિકસમ્ભોગો, કાલે સબ્બસ્સ કપ્પતિ;

સતિ પચ્ચયે વિકાલે, કપ્પતે કાલિકત્તયં.

૯૯. કાલયામમતિક્કન્તા, પાચિત્તિં જનયન્તુભો;

જનયન્તિ ઉભોપેતે, અન્તોવુત્થઞ્ચ સન્નિધિં.

૧૦૦. સત્તાહકાલિકે સત્ત, અહાનિ અતિનામિતે;

પાચિત્તિ પાળિનારુળ્હે, સપ્પિઆદિમ્હિ દુક્કટં.

૧૦૧. નિસ્સટ્ઠલદ્ધં મક્ખેય્ય, નઙ્ગં નજ્ઝોહરેય્ય ચ;

વિકપ્પેન્તસ્સ સત્તાહે, સામણેરસ્સધિટ્ઠતો;

મક્ખનાદિઞ્ચ નાપત્તિ, અઞ્ઞસ્સ દદતોપિ ચ.

૧૦૨. યાવકાલિકઆદીનિ, સંસટ્ઠાનિ સહત્તના;

ગાહાપયન્તિ સબ્ભાવં, તસ્મા એવમુદીરિતં.

૧૦૩. પુરે પટિગ્ગહિતઞ્ચ, સત્તાહં યાવજીવિકં;

સેસકાલિકસમ્મિસ્સં, પાચિત્તિ પરિભુઞ્જતો.

૧૦૪. યાવકાલિકસમ્મિસ્સં, ઇતરં કાલિકત્તયં;

પટિગ્ગહિતં તદહુ, તદહેવ ચ ભુઞ્જયે.

૧૦૫. યામકાલિકસમ્મિસ્સં, સેસમેવં વિજાનિયં;

સત્તાહકાલિકમિસ્સઞ્ચ, સત્તાહં કપ્પતેતરન્તિ.