૪૯. ચતુરારક્ખનિદ્દેસો

ચતુરક્ખાતિ –

૪૬૧. બુદ્ધાનુસ્સતિ મેત્તા ચ, અસુભં મરણસ્સતિ;

આરકત્તાદિનારહં, સમ્મા સામઞ્ચ બુદ્ધતો.

૪૬૨. સમ્માસમ્બુદ્ધઇતિ વાનુસ્સતિ યા પુનપ્પુનં;

નવભેદે ભગવતો, બુદ્ધાનુસ્સતિ સા ગુણે.

૪૬૩. સીમટ્ઠસઙ્ઘે સીમટ્ઠદેવતાસુ ચ ઇસ્સરે;

જને ગોચરગામમ્હિ, તત્થુપાદાય માનુસે.

૪૬૪. સબ્બસત્તેસુ સુખિતા, હોન્તાવેરાતિઆદિના;

પરિચ્છિજ્જ પરિચ્છિજ્જ, ભાવના મેત્તભાવના.

૪૬૫. વણ્ણસણ્ઠાનઓકાસ-દિસતો પરિચ્છેદતો;

વવત્થપેત્વા કેસાદિ-કોટ્ઠાસે અનુપુબ્બતો.

૪૬૬. નાતિસીઘઞ્ચ સણિકં, વિક્ખેપં પટિબાહયં;

પણ્ણત્તિં સમતિક્કમ્મ, મુઞ્ચન્તસ્સાનુપુબ્બતો.

૪૬૭. વણ્ણઆસયસણ્ઠાન-ગન્ધોકાસેહિ ભાવના;

પટિક્કૂલાતિ કોટ્ઠાસે, ઉદ્ધુમાતાદિવત્થુસુ;

ગહેત્વા અસુભાકારં, પવત્તા ભાવનાસુભં.

૪૬૮. ‘‘મરણં મે ભવિસ્સતિ, જીવિતં ઉચ્છિજ્જિસ્સતિ;

મરણં મરણં વા’’તિ, ભાવયિત્વાન યોનિસો.

૪૬૯. વધકસ્સેવુપટ્ઠાના, સમ્પત્તીનં વિપત્તિતો;

ઉપસંહરતો કાયબહુસાધારણા તથા.

૪૭૦. આયુદુબ્બલતો કાલવવત્થાનસ્સભાવતો;

અદ્ધાનસ્સ પરિચ્છેદા, ભાવના મરણસ્સતીતિ.