૪૦. અવેભઙ્ગિયનિદ્દેસો

અવેભઙ્ગિયન્તિ –

૩૨૨. આરામારામવત્થૂનિ, વિહારો તસ્સ વત્થુ ચ;

મઞ્ચો પીઠં ભિસિ બિબ્બો-હનાદિસયનાસનં.

૩૨૩. લોહકુમ્ભી કટાહો ચ,

લોહભાણકવારકો;

કુઠારી વાસિ ફરસુ,

કુદ્દાલો ચ નિખાદનં.

૩૨૪. વલ્લિ વેળુ તિણં પણ્ણં, મુઞ્જપબ્બજમત્તિકા;

દારુમત્તિકભણ્ડાનિ, પઞ્ચેતે અવિભાજિયા.

૩૨૫. થુલ્લચ્ચયં ભાજયતો, ભાજિતાપિ અભાજિતા;

ગરુભણ્ડાનિ વુચ્ચન્તિ, એતેવિસ્સજ્જિયાનિ ચ.

૩૨૬. વલ્લિડ્ઢબાહુમત્તાપિ, વેળુ અટ્ઠઙ્ગુલાયતો;

તિણાદિ મુટ્ઠિમત્તમ્પિ, પણ્ણં એકમ્પિ મત્તિકા.

૩૨૭. પાકતા પઞ્ચવણ્ણા વા, સુધાકઙ્ગુટ્ઠ આદિકા;

તાલપક્કપ્પમાણાપિ, દિન્ના વા તત્થજાતકા.

૩૨૮. રક્ખિતા સઙ્ઘિકા રજ્જુ-યોત્તાદીપિ અભાજિયા;

નિટ્ઠિતે ભાજિયા કમ્મે, સઙ્ઘિકે ચેતિયસ્સ વા.

૩૨૯. પત્તાદિ ભિક્ખુસારુપ્પં, તથા વિપ્પકતાકતં;

ભાજિયં લોહભણ્ડેસુ, વારકં પાદગણ્હકં.

૩૩૦. વેળુમ્હિ ભાજિયા તેલ-નાળિ કત્તરદણ્ડકો;

છત્તદણ્ડસલાકાયો, તથોપાહનદણ્ડકો.

૩૩૧. અનુઞ્ઞાતવાસિદણ્ડો, કરણ્ડો પાદગણ્હકો;

અરણઞ્જનિસિઙ્ગાદિ, ભિક્ખૂપકરણં તથા.

૩૩૨. તચ્છિતાનિટ્ઠિતં દારુભણ્ડં દન્તઞ્ચ ભાજિયં;

ભિક્ખૂપકરણે પાદઘટકો મત્તિકામયો.

૩૩૩. ભાજિયં કપ્પિયં ચમ્મં, એળચમ્મમભાજિયં;

ગરુના ગરુભણ્ડઞ્ચ, થાવરં થાવરેન ચ.

૩૩૪. થાવરં પરિવત્તેય્ય, તથા કત્વા ચ ભુઞ્જતુ;

વલ્લાદિં ફાતિકમ્મેન, ગણ્હે સેસમભાજિયન્તિ.