૧૪. ભૂમિનિદ્દેસો

ભૂમિયોતિ –

૧૩૬. સમ્મુતુસ્સાવનન્તા ચ, ગોનિસાદી ગહાપતિ;

કપ્પિયા ભૂમિયો યાસુ, વુત્થં પક્કઞ્ચ કપ્પતિ.

૧૩૭. વાસત્થાય કતે ગેહે, સઙ્ઘિકે વેકસન્તકે;

કપ્પિયા કુટિ લદ્ધબ્બા, સહસેય્યપ્પહોનકે.

૧૩૮. ગેહે સઙ્ઘસ્સ વેકસ્સ, કરમાનેવમીરયં;

પઠમિટ્ઠકથમ્ભાદિં, ઠપેય્યુસ્સાવનન્તિકા;

‘‘કપ્પિયકુટિં કરોમ, કપ્પિયકુટિં કરોમા’’તિ.

૧૩૯. યેભુય્યેનાપરિક્ખિત્તો, આરામો સકલોપિ વા;

વુચ્ચતે ‘‘ગોનિસાદી’’તિ, સમ્મુતી સઙ્ઘસમ્મતા.

૧૪૦. ભિક્ખું ઠપેત્વા અઞ્ઞેહિ, દિન્નો તેસંવ સન્તકો;

અત્થાય કપ્પકુટિયા, ગેહો ગહપતી મતો.

૧૪૧. અકપ્પકુટિયા વુત્થસપ્પિઆદીહિ મિસ્સિતં;

વજેય્ય અન્તોવુત્થત્તં, પુરિમં કાલિકદ્વયં.

૧૪૨. તેહેવ ભિક્ખુના પક્કં, કપ્પતે યાવજીવિકં;

નિરામિસંવ સત્તાહં, સામિસે સામપાકતા.

૧૪૩. ઉસ્સાવનન્તિકા યેહિ, થમ્ભાદીહિ અધિટ્ઠિતા;

તેસુયેવાપનીતેસુ, તદઞ્ઞેસુપિ તિટ્ઠતિ.

૧૪૪. સબ્બેસુ અપનીતેસુ, ભવે જહિતવત્થુકા;

ગોનિસાદી પરિક્ખિત્તે, સેસા છદનવિબ્ભમાતિ.