૧૫. ઉપજ્ઝાચરિયવત્તનિદ્દેસો

ઉપજ્ઝાચરિયવત્તાનીતિ –

૧૪૫. નિસ્સાયુપજ્ઝાચરિયે, વસમાનો સુપેસલો;

દન્તકટ્ઠાસનં તોયં, યાગું કાલે દદે સદા.

૧૪૬. પત્તે વત્તં ચરે ગામ-પ્પવેસે ગમનાગમે;

આસને પાદપીઠે ચ, કથલોપાહનચીવરે.

૧૪૭. પરિભોજનીયપાનીય-વચ્ચપ્પસ્સાવઠાનિસુ;

વિહારસોધને વત્તં, પુન પઞ્ઞાપને તથા.

૧૪૮. ન પપ્ફોટેય્ય સોધેન્તો, પટિવાતે ચ સઙ્ગણે;

વિહારં ભિક્ખુ પાનીય-સામન્તા સયનાસનં.

૧૪૯. ન્હાને ન્હાતસ્સ કાતબ્બે, રઙ્ગપાકે ચ ધોવને;

સિબ્બને ચીવરે થેવે, રજન્તો ન વજે ઠિતે.

૧૫૦. એકચ્ચસ્સ અનાપુચ્છા, પત્તં વા ચીવરાનિ વા;

ન દદેય્ય ન ગણ્હેય્ય, પરિક્ખારઞ્ચ કિઞ્ચનં.

૧૫૧. એકચ્ચં પચ્છતો કાતું, ગન્તું વા તસ્સ પચ્છતો;

પિણ્ડપાતઞ્ચ નિન્નેતું, નીહરાપેતુમત્તનો.

૧૫૨. કિચ્ચયં પરિકમ્મં વા, કેસચ્છેદઞ્ચ અત્તનો;

કારાપેતું વ કાતું વા, અનાપુચ્છા ન વટ્ટતિ.

૧૫૩. ગામં સુસાનં નિસ્સીમં, દિસં વા ગન્તુમિચ્છતો;

અત્તનો કિચ્ચયં વાપિ, અનાપુચ્છા ન વટ્ટતિ.

૧૫૪. ઉપ્પન્નં અરતિં દિટ્ઠિં, કુક્કુચ્ચં વા વિનોદયે;

કરેય્ય વાપિ ઉસ્સુક્કં, સઙ્ઘાયત્તેસુ કમ્મસુ.

૧૫૫. ગિલાનેસુ ઉપટ્ઠેય્ય, વુટ્ઠાનં નેસમાગમે;

વત્તભેદેન સબ્બત્થ, અનાદરેન દુક્કટન્તિ.