૧૩. સમણકપ્પનિદ્દેસો

સમણકપ્પાતિ –

૧૨૫. ભૂતગામસમારમ્ભે, પાચિત્તિ કતકપ્પિયં;

નખેન વાગ્ગિસત્થેહિ, ભવે સમણકપ્પિયં.

૧૨૬. સ મૂલખન્ધબીજગ્ગ-ફળુબીજપ્પભાવિતો;

આરમ્ભે દુક્કટં બીજં, ભૂતગામવિયોજિતં.

૧૨૭. નિબ્બટ્ટબીજં નોબીજ-મકતઞ્ચાપિ કપ્પતિ;

કટાહબદ્ધબીજાનિ, બહિદ્ધા વાપિ કારયે.

૧૨૮. એકાબદ્ધેસુ બીજેસુ, ભાજને વાપિ ભૂમિયં;

કતે ચ કપ્પિયેકસ્મિં, સબ્બેસ્વેવ કતં ભવે.

૧૨૯. નિક્ખિત્તે કપ્પિયં કત્વા, મૂલપણ્ણાનિ જાયરું;

કપ્પિયં પુન કારેય્ય, ભૂતગામો હિ સો તદા.

૧૩૦. સપણ્ણો વા અપણ્ણો વા, સેવાલોદકસમ્ભવો;

ચેતિયાદીસુ સેવાલો, નિબ્બટ્ટદ્વત્તિપત્તકો;

ભૂતગામોવ બીજમ્પિ, મૂલપણ્ણે વિનિગ્ગતે.

૧૩૧. ઘટાદિપિટ્ઠે સેવાલો, મકુળં અહિછત્તકં;

દુક્કટસ્સેવ વત્થૂનિ, ફુલ્લમબ્યવહારિકં.

૧૩૨. લાખાનિય્યાસછત્તાનિ, અલ્લરુક્ખે વિકોપિય;

ગણ્હતો તત્થ પાચિત્તિ, છિન્દતો વાપિ અક્ખરં.

૧૩૩. પીળેતું નાળિકેરાદિં, દારુમક્કટકાદિના;

છિન્દિતું ગણ્ઠિકં કાતું, તિણાદિં ન ચ કપ્પતિ.

૧૩૪. ભૂતગામં વ બીજં વા, છિન્દ ભિન્દોચિનાહિ વા;

ફાલેહિ વિજ્ઝ પચ વા, નિયમેત્વા ન ભાસયે.

૧૩૫. ઇમં કરોહિ કપ્પિયં, ઇમં ગણ્હેદમાહર;

ઇમં દેહિ ઇમં સોધેહેવં વટ્ટતિ ભાસિતુન્તિ.