૬. સુરાપાનવગ્ગો

૧. સુરાપાનસિક્ખાપદવણ્ણના

‘‘સુરા’’તિ વા ‘‘ન વટ્ટતી’’તિ વા જાનિત્વા પિવને અકુસલમેવાતિ લિખિતં. અકુસલચિત્તન્તિ યેભુય્યેન તં સન્ધાય કિર વુત્તં. અથ કસ્મા વિનયટ્ઠકથાયં ‘‘અકુસલેનેવ પાતબ્બતાયા’’તિ (પાચિ. અટ્ઠ. ૩૨૯) વુત્તન્તિ ચે? સચિત્તકપક્ખે અકુસલેનેવ પાતબ્બતાયાતિ.

સુરાપાનસિક્ખાપદવણ્ણના નિટ્ઠિતા.

૨. અઙ્ગુલિપતોદકસિક્ખાપદવણ્ણના

કાયસંસગ્ગસઙ્ઘાદિસેસાપત્તિભાવે સમાનેપિ ભિક્ખુનિયાપિ અનુપસમ્પન્નેપિ દુક્કટં, ઉપસમ્પન્ને એવ પાચિત્તિયન્તિ એવં પુગ્ગલાપેક્ખં દસ્સેતું ‘‘અઙ્ગુલિપતોદકે પાચિત્તિય’’ન્તિ વુત્તં. સતિ કરણીયેતિ એત્થ પુરિસં સતિ કરણીયે આમસતોતિ અધિપ્પાયો, ન ઇત્થિં.

અઙ્ગુલિપતોદકસિક્ખાપદવણ્ણના નિટ્ઠિતા.

૩. હસધમ્મસિક્ખાપદવણ્ણના

‘‘ચિક્ખલ્લં વા’’તિ વચનતો સક્ખરમ્પિ ખિપનકીળાય કીળતો દુક્કટમેવ. ઉપરિગોપ્ફકે પાચિત્તિયં, અઞ્ઞત્થ દુક્કટન્તિ પાચિત્તિયવત્થુઅત્થવસેન ‘‘ઉદકે હસધમ્મે પાચિત્તિય’’ન્તિ વુત્તં.

ઇદં સઞ્ઞાવિમોક્ખં ચે, તિકપાચિત્તિયં કથં;

કીળિતંવ અકીળાતિ, મિચ્છાગાહેન તં સિયા.

એત્તાવતા કથં કીળા, ઇતિ કીળાયં એવાયં;

અકીળાસઞ્ઞી હોતેત્થ, વિનયત્થં સમાદયે.

એકન્તાકુસલો યસ્મા, કીળાયાભિરતમનો;

તસ્મા અકુસલં ચિત્તં, એકમેવેત્થ લબ્ભતીતિ. (વજિર. ટી. પાચિત્તિય ૩૩૬);

હસધમ્મસિક્ખાપદવણ્ણના નિટ્ઠિતા.

૪. અનાદરિયસિક્ખાપદવણ્ણના

તસ્સ વચનન્તિ ‘‘અયં ઉક્ખિત્તકો વા વમ્ભિતો વા ગરહિતો વા ઇમસ્સ વચનં અકતં ભવિસ્સતી’’તિ અનાદરિયં કરોતિ. ધમ્મન્તિ કથાયં ધમ્મો નસ્સેય્ય વા વિનસ્સેય્ય વા અન્તરધાયેય્ય વા, તં વા અસિક્ખિતુકામો અનાદરિયં કરોતિ. ‘‘લોકવજ્જં અતિક્કમિત્વા ‘ઇદં અમ્હાકં આચરિયુગ્ગહો’તિ વદન્તસ્સ ન વટ્ટતી’’તિ (વજિર. ટી. પાચિત્તિય ૩૪૪) લિખિતં.

અનાદરિયસિક્ખાપદવણ્ણના નિટ્ઠિતા.

૬. જોતિસિક્ખાપદવણ્ણના

‘‘વિસિબ્બનાપેક્ખો’’તિ વુત્તત્તા અઞ્ઞસ્સ વટ્ટતિ, અઞ્ઞેસઞ્ચ.

જોતિનેકમનેકે વા, જાલેન્તિ મુનયો સહ;

એકો સોપેતિ નાનેકો, અધિપ્પાયવિસેસતો.

જોતિસિક્ખાપદવણ્ણના નિટ્ઠિતા.

૮. દુબ્બણ્ણકરણસિક્ખાપદવણ્ણના

મોરક્ખિમણ્ડલમઙ્ગુલપિટ્ઠીનન્તિ ન એકન્તતો, અધિકં, ઓરઞ્ચાતિ વદન્તિ. એકકોણેપિ વટ્ટતિ, એવં યત્થ કત્થચિ એકબિન્દુપિ વટ્ટતીતિ.

દુબ્બણ્ણકરણસિક્ખાપદવણ્ણના નિટ્ઠિતા.

૯. વિકપ્પનસિક્ખાપદવણ્ણના

‘‘સમુટ્ઠાનાદીનિ પઠમકથિનસદિસાનિ, ઇદં પન કિરિયાકિરિય’’ન્તિ પાઠો. એત્થ પરિભોગેન કાયકમ્મં. અપચ્ચુદ્ધરણેન વચીકમ્મં.

વિકપ્પનસિક્ખાપદવણ્ણના નિટ્ઠિતા.

૧૦. અપનિધાનસિક્ખાપદવણ્ણના

સસૂચિકે સૂચિઘરે સૂચિગણનાય આપત્તિયોતિ પોરાણા.

અપનિધાનસિક્ખાપદવણ્ણના નિટ્ઠિતા.

સુરાપાનવગ્ગો છટ્ઠો.