૪. પુરાણચીવરસિક્ખાપદવણ્ણના

‘‘સાકિયાનિયો વિય સુદ્ધભિક્ખુસઙ્ઘે વા’’તિ ઇદં ‘‘ભિક્ખુની નામ ઉભતોસઙ્ઘે ઉપસમ્પન્ના’’તિ (પારા. ૫૦૫) ઇમિના વિરુજ્ઝતીતિ ચે? ન, અધિપ્પાયાજાનનતો. ભિક્ખૂનં સન્તિકે ઉપસમ્પદાય પટિક્ખિત્તત્તા તદનુપ્પસઙ્ગભયા એવં વુત્તન્તિ વેદિતબ્બં.

એકેન વત્થુનાતિ યેન કેનચિ પઠમેન. અવુત્તા વા ધોવતીતિ અવુત્તા ધોવતિ, રજતિ આકોટેતીતિ અત્થો. ‘‘‘અવુત્તા’તિ વચનતો અવાદાપેત્વા ધોવનાદીસુ અનાપત્તી’’તિ લિખિતં. ઇધ ચીવરં નામ નિવાસનપારુપનૂપગમેવ. યદિ એવં ‘‘નિવાસનપારુપનૂપગમેવ વત્તબ્બ’’ન્તિ ચે? તં ન વત્તબ્બં ‘‘પુરાણચીવર’’ન્તિ ઇમિનાવ સિદ્ધત્તા. વુત્તઞ્હેતં ‘‘પુરાણચીવરં નામ સકિં નિવત્થમ્પિ સકિં પારુતમ્પી’’તિ (પારા. ૫૦૫).

પુરાણચીવરસિક્ખાપદવણ્ણના નિટ્ઠિતા.