૧. પત્તવગ્ગો

૧. પત્તસન્નિચયસિક્ખાપદવણ્ણના

પઠમં ઉત્તાનત્થમેવ.

પત્તસન્નિચયસિક્ખાપદવણ્ણના નિટ્ઠિતા.

૨. અકાલચીવરસિક્ખાપદવણ્ણના

યં અત્તના લદ્ધં, તં નિસ્સગ્ગિયં હોતીતિ યં ચીવરં ભાજાપિતાય અત્તના લદ્ધં, તમેવ નિસ્સગ્ગિયં હોતિ, તં વિનયકમ્મં કત્વાપિ અત્તના ન લબ્ભતિ. તેનાહ ‘‘નિસ્સટ્ઠ’’ન્તિઆદિ. તત્થ નિસ્સટ્ઠં પટિલભિત્વાપીતિ ‘‘અય્યાય, દમ્મી’’તિ એવં નિસ્સટ્ઠં પટિલભિત્વાપિ. યથાદાનેયેવ ઉપનેતબ્બન્તિ યથા દાયકેહિ દિન્નં, તથેવ ઉપનેતબ્બં, અકાલચીવરપક્ખેયેવ ઠપેતબ્બન્તિ વુત્તં હોતિ.

અકાલચીવરસિક્ખાપદવણ્ણના નિટ્ઠિતા.

૩. ચીવરપરિવત્તનસિક્ખાપદવણ્ણના

મેતન્તિ મે એતં. સકસઞ્ઞાય ગહિતત્તા પાચિત્તિયઞ્ચેવ દુક્કટઞ્ચ વુત્તં, ઇતરથા ભણ્ડગ્ઘેન કારેતબ્બં.

ચીવરપરિવત્તનસિક્ખાપદવણ્ણના નિટ્ઠિતા.

૪. અઞ્ઞવિઞ્ઞાપનસિક્ખાપદવણ્ણના

પટિલાભેનાતિ પઠમવિઞ્ઞત્તિતો ઊનતરસ્સાપિ અઞ્ઞસ્સ પટિલાભેન.

તસ્મિં અપ્પહોન્તે પુન તઞ્ઞેવાતિ યં પઠમં વિઞ્ઞત્તં, થોકત્તા તસ્મિં અપ્પહોન્તે પુન તઞ્ઞેવ વિઞ્ઞાપેન્તિયાતિ અત્થો. અઞ્ઞેનપિ અત્થે સતી તિ પઠમં વિઞ્ઞત્તિતો અઞ્ઞેનપિ અત્થે સતિ. તેન સદ્ધિં અઞ્ઞઞ્ચાતિ યં પઠમં વિઞ્ઞત્તં, તેન સદ્ધિં અઞ્ઞઞ્ચ. કિં વુત્તં હોતિ? સચે પઠમં સપ્પિ વિઞ્ઞત્તં, ‘‘યમકં પચિતબ્બ’’ન્તિ ચ વેજ્જેન વુત્તત્તા તેલેનાપિ અત્થો હોતિ. તતો ‘‘તેલેનાપિ મે અત્થો’’તિ એવમાદિના અઞ્ઞઞ્ચ વિઞ્ઞાપેન્તિયાતિ વુત્તં હોતિ. આનિસંસં દસ્સેત્વાતિ ‘‘સચે કહાપણસ્સ સપ્પિ આભતં હોતિ, ઇમિના મૂલેન દ્વિગુણં તેલં લબ્ભતિ, તેલેનાપિ ચ ઇદં કિચ્ચં નિપ્પજ્જતિ, તસ્મા તેલં આહરા’’તિ એવં આનિસંસં દસ્સેત્વા.

અઞ્ઞવિઞ્ઞાપનસિક્ખાપદવણ્ણના નિટ્ઠિતા.

૫. અઞ્ઞચેતાપનસિક્ખાપદવણ્ણના

તતો અઞ્ઞં ચેતાપેય્યાતિ પઠમં ચેતાપિતતો યં કિઞ્ચિ અઞ્ઞં ચેતાપેય્ય.

અઞ્ઞચેતાપનસિક્ખાપદવણ્ણના નિટ્ઠિતા.

૬. પઠમસઙ્ઘિકચેતાપનસિક્ખાપદવણ્ણના

અઞ્ઞસ્સત્થાય દિન્નેનાતિ યં ચેતાપેતિ, તતો અઞ્ઞસ્સત્થાય દિન્નેન. અઞ્ઞુદ્દિસિકેનાતિ પુરિમસ્સેવત્થદીપનં.

સેસકં ઉપનેન્તિયાતિ યદત્થાય દિન્નો, તં ચેતાપેત્વા અવસેસં અઞ્ઞસ્સત્થાય ઉપનેન્તિયા. સામિકે અપલોકેત્વાતિ દાયકે આપુચ્છિત્વા. એવરૂપાસૂ આપદાસુ ઉપનેન્તીનન્તિ એવરૂપેસુ ઉપદ્દવેસુ અઞ્ઞસ્સ યસ્સ કસ્સચિ અત્થાય ઉપનેન્તીનં.

પઠમસઙ્ઘિકચેતાપનસિક્ખાપદવણ્ણના નિટ્ઠિતા.

૭. દુતિયસઙ્ઘિકચેતાપનસિક્ખાપદવણ્ણના

ન કેવલં તેનેવ પરિક્ખારેનાતિ આહ ‘‘સયં યાચિતકેનાપી’’તિ. વુત્તઞ્હેતં પાળિયં ‘‘ભિક્ખુનિયો તેન ચ પરિક્ખારેન સયમ્પિ યાચિત્વા ભેસજ્જં ચેતાપેત્વા પરિભુઞ્જિંસૂ’’તિ (પાચિ. ૭૬૩). માતિકાયં પન ગમ્યમાનત્તા પિ-સદ્દો નપ્પયુત્તો. ગમ્યમાનત્થસ્સ હિ સદ્દસ્સ પયોગં પતિ કામચારોતિ યુત્તિ.

દુતિયસઙ્ઘિકચેતાપનસિક્ખાપદવણ્ણના નિટ્ઠિતા.

૮-૯-૧૦. પઠમગણિકચેતાપનાદિસિક્ખાપદવણ્ણના

અટ્ઠમનવમદસમાનિ ઉત્તાનત્થાનેવ.

પઠમગણિકચેતાપનાદિસિક્ખાપદવણ્ણના નિટ્ઠિતા.

પત્તવગ્ગો પઠમો.