૭. ઉક્ખિત્તાનુવત્તિકાસિક્ખાપદવણ્ણના

સત્થુસાસનેનાતિ ઞત્તિસમ્પદાય ચેવ અનુસ્સાવનસમ્પદાય ચ. ઇધ પન ચોદનાસારણાપુબ્બકમેવ ઞત્તિઅનુસ્સાવનં સત્થુસાસનન્તિ આહ ‘‘ઇધાપી’’તિઆદિ. કરણન્તિ ઞત્તિટ્ઠપનઞ્ચેવ અનુસ્સાવનાવચનઞ્ચ. અનાદરન્તિ પુગ્ગલે ચેવ ધમ્મે ચ આદરવિરહિતં. તેનાહ ‘‘યેના’’તિઆદિ. તત્થ પરિયાપન્નગણે વાતિ તસ્મિં સઙ્ઘે પરિયાપન્ને સમ્બહુલપુગ્ગલસઙ્ખાતે ગણે વા. ‘‘સમ્માવત્તનાય અવત્તમાનન્તિ અત્થો’’તિ ઇમિના અધિપ્પાયત્થો વુત્તો. એકકમ્માદિકેતિ એકકમ્મએકુદ્દેસસમસિક્ખાતાય. સહ અયનભાવેનાતિ સહ વત્તનભાવેન. સમાનો સંવાસો એતેસન્તિ સમાનસંવાસકા.

ઇદાનિ યેન સંવાસેન તે ‘‘સમાનસંવાસકા’’તિ (પાચિ. અટ્ઠ. ૬૬૯) વુત્તા, સો સંવાસો તસ્સ ઉક્ખિત્તકસ્સ તેહિ સદ્ધિં નત્થિ, યેહિ ચ સદ્ધિં તસ્સ સો સંવાસો નત્થિ, ન તેન તે ભિક્ખૂ અત્તનો સહાયા કતા હોન્તિ, તસ્મા સો અકતસહાયો નામાતિ ઇમમત્થં દસ્સેતું ‘‘યસ્સ પના’’તિઆદિ વુત્તં. એવં પદવણ્ણનં કત્વા ઇદાનિ અત્થમત્તં દસ્સેતું ‘‘સમાનસંવાસકભાવં અનુપગતન્તિ અત્થો’’તિ વુત્તં. કિં તં અનુવત્તનન્તિ કસ્સચિ આસઙ્કા સિયાતિ તં સરૂપતો દસ્સેન્તો ‘‘યંદિટ્ઠિકો સો હોતી’’તિઆદિમાહ. તત્થ સોતિ યો ઉક્ખિત્તકો, સો.

ઉક્ખિત્તાનુવત્તિકાસિક્ખાપદવણ્ણના નિટ્ઠિતા.