૧. સહધમ્મિકસિક્ખાપદવણ્ણના

સહધમ્મિકવગ્ગસ્સ પઠમે સહધમ્મિકં વુચ્ચમાનોતિ ઇમસ્સત્થો દુબ્બચસિક્ખાપદે વુત્તો. એતસ્મિં સિક્ખાપદેતિ એતસ્મિં સિક્ખાપદે યં વુત્તં, તં ન તાવ સિક્ખિસ્સામીતિ અત્થો. પાચિત્તિયન્તિ એત્થ પન અનાદરિયભયા લેસેન એવં વદન્તસ્સ વાચાય વાચાય પાચિત્તિયં વેદિતબ્બં. સિક્ખમાનેનાતિ ઓવાદં સિરસા સમ્પટિચ્છિત્વા સિક્ખિતુકામેનેવ હુત્વા. અઞ્ઞાતબ્બન્તિ આજાનિતબ્બં. પરિપુચ્છિતબ્બન્તિ ‘‘ઇમસ્સ કો અત્થો’’તિ પરિપુચ્છિતબ્બં. પરિપઞ્હિતબ્બન્તિ ચિન્તેતબ્બં તુલયિતબ્બં.

કોસમ્બિયં છન્નત્થેરં આરબ્ભ એવં ભણનવત્થુસ્મિં પઞ્ઞત્તં, સાધારણપઞ્ઞત્તિ, અનાણત્તિકં, તિકપાચિત્તિયં, અનુપસમ્પન્ને તિકદુક્કટં, ઉભોહિપિ ‘‘ઇદં ન સલ્લેખાયા’’તિઆદિના (પાચિ. ૪૩૬) નયેનેવ અપ્પઞ્ઞત્તેન વુચ્ચમાનસ્સાપિ એવં વદતો દુક્કટમેવ. ‘‘જાનિસ્સામિ સિક્ખિસ્સામી’’તિ ભણન્તસ્સ, ઉમ્મત્તકાદીનઞ્ચ અનાપત્તિ. ઉપસમ્પન્નસ્સ પઞ્ઞત્તેન વચનં, અસિક્ખિતુકામતાય એવં વચનન્તિ ઇમાનેત્થ દ્વે અઙ્ગાનિ. સમુટ્ઠાનાદીનિ અદિન્નાદાનસદિસાનિ, ઇદં પન દુક્ખવેદનન્તિ.

સહધમ્મિકસિક્ખાપદવણ્ણના નિટ્ઠિતા.