૭. નહાનસિક્ખાપદવણ્ણના

સત્તમે નહાયેય્યાતિ યો ભિક્ખુ મજ્ઝિમદેસે નહાનદિવસતો પટ્ઠાય અદ્ધમાસે અપુણ્ણે અઞ્ઞત્ર સમયા ‘‘નહાયિસ્સામી’’તિ ચુણ્ણં વા મત્તિકં વા અભિસઙ્ખરોતિ, તસ્સ તતો પટ્ઠાય સબ્બપ્પયોગેસુ દુક્કટં, નહાનપરિયોસાને પાચિત્તિયં. સમયેસુ પરિવેણસમ્મજ્જનમત્તમ્પિ કમ્મસમયો, અદ્ધયોજનં ગન્તુકામસ્સ, ગચ્છતો, ગતસ્સ વા અદ્ધાનગમનસમયો, સરજેન વાતેન ઓકિણ્ણસ્સ દ્વીસુ વા તીસુ વા ઉદકફુસિતેસુ કાયે પતિતેસુ વાતવુટ્ઠિસમયોતિ વેદિતબ્બો. સેસં ઉત્તાનમેવ.

રાજગહે સમ્બહુલે ભિક્ખૂ આરબ્ભ ન મત્તં જાનિત્વા નહાયનવત્થુસ્મિં પઞ્ઞત્તં, ‘‘અઞ્ઞત્ર સમયા’’તિ અયમેત્થ છબ્બિધા અનુપઞ્ઞત્તિ, સાધારણપઞ્ઞત્તિ, અનાણત્તિકં, તિકપાચિત્તિયં, અતિરેકદ્ધમાસે ઊનકસઞ્ઞિનો, વેમતિકસ્સ વા દુક્કટં. અતિરેકસઞ્ઞિસ્સ, સમયે વા નહાયન્તસ્સ, યો વા નદીપારં ગચ્છન્તો વાલુકં ઉક્કિરિત્વા કતઆવાટેસુપિ નહાયતિ, તસ્સ, પચ્ચન્તિમે જનપદે સબ્બેસં, આપદાસુ, ઉમ્મત્તકાદીનઞ્ચ અનાપત્તિ. મજ્ઝિમદેસો, ઊનકદ્ધમાસે નહાનં, સમયાનં વા નદીપારગમનસ્સ વા આપદાનં વા અભાવોતિ ઇમાનેત્થ તીણિ અઙ્ગાનિ. સમુટ્ઠાનાદીનિ એળકલોમસદિસાનેવાતિ.

નહાનસિક્ખાપદવણ્ણના નિટ્ઠિતા.