૧. અચેલકસિક્ખાપદવણ્ણના

અચેલકવગ્ગસ્સ પઠમે એતેસં અચેલકાદીનં અઞ્ઞતિત્થિયાનં યંકિઞ્ચિ આમિસં એકપ્પયોગેન દેન્તસ્સ એકં પાચિત્તિયં, અવચ્છિન્દિત્વા અવચ્છિન્દિત્વા દેન્તસ્સ પયોગે પયોગે પાચિત્તિયં.

વેસાલિયં આયસ્મન્તં આનન્દં આરબ્ભ પરિબ્બાજિકાય દ્વે પૂવે દાનવત્થુસ્મિં પઞ્ઞત્તં, અસાધારણપઞ્ઞત્તિ, અનાણત્તિકં, તિકપાચિત્તિયં, ઉદકદન્તપોનં દેન્તસ્સ, અતિત્થિયે તિત્થિયસઞ્ઞિસ્સ, વેમતિકસ્સ ચ દુક્કટં. અતિત્થિયે અતિત્થિયસઞ્ઞિસ્સ, અનુપસમ્પન્નેન દાપેન્તસ્સ, તેસં સન્તિકે ભાજનં નિક્ખિપિત્વા ‘‘ઇદં ગણ્હથા’’તિ ભણન્તસ્સ, તેસં વા નિક્ખિત્તભાજને દેન્તસ્સ, બાહિરલેપં દેન્તસ્સ, ઉમ્મત્તકાદીનઞ્ચ અનાપત્તિ. અઞ્ઞતિત્થિયતા, અનનુઞ્ઞાતતા, અજ્ઝોહરણીયં અજ્ઝોહરણત્થાય સહત્થા અનિક્ખિત્તભાજને દાનન્તિ ઇમાનેત્થ તીણિ અઙ્ગાનિ. સમુટ્ઠાનાદીનિ એળકલોમસદિસાનીતિ.

અચેલકસિક્ખાપદવણ્ણના નિટ્ઠિતા.