૯. છત્તુપાહનવગ્ગો

૧. છત્તુપાહનસિક્ખાપદવણ્ણના

છત્તવગ્ગસ્સ પઠમે છત્તુપાહનન્તિ પદભાજને (પાચિ. ૧૧૭૮-૧૧૮૨) વુત્તલક્ખણં છત્તઞ્ચ ઉપાહનાયો ચ. ધારેય્યાતિ પરિભોગવસેન મગ્ગગમને એકપ્પયોગેનેવ દિવસમ્પિ ધારેન્તિયા એકા આપત્તિ. સચે પન તાદિસં ઠાનં પત્વા છત્તમ્પિ અપનામેત્વા ઉપાહનાપિ ઓમુઞ્ચિત્વા પુનપ્પુનં ધારેતિ, પયોગગણનાય પાચિત્તિયં.

સાવત્થિયં છબ્બગ્ગિયા ભિક્ખુનિયો આરબ્ભ છત્તુપાહનધારણવત્થુસ્મિં પઞ્ઞત્તં, ‘‘અગિલાના’’તિ અયમેત્થ અનુપઞ્ઞત્તિ, છત્તસ્સેવ ઉપાહનાનંયેવ વા ધારણે દુક્કટં, અગિલાનાય તિકપાચિત્તિયં, ગિલાનાય દ્વિકદુક્કટં. ગિલાનસઞ્ઞાય પન, આરામે આરામૂપચારે ધારેન્તિયા, આપદાસુ, ઉમ્મત્તિકાદીનઞ્ચ અનાપત્તિ. ઉભિન્નં ધારણં, અનુઞ્ઞાતકારણાભાવોતિ ઇમાનેત્થ દ્વે અઙ્ગાનિ. સમુટ્ઠાનાદીનિ એળકલોમસદિસાનીતિ.

છત્તુપાહનસિક્ખાપદવણ્ણના નિટ્ઠિતા.

૨. યાનસિક્ખાપદવણ્ણના

દુતિયે યાનેનાતિ વય્હાદિના. એત્થાપિ ઓરોહિત્વા પુનપ્પુનં અભિરુહન્તિયા પયોગગણનાય પાચિત્તિયં. અનાપત્તિયં ‘‘આરામે આરામૂપચારે’’તિ નત્થિ, સેસં પઠમે વુત્તનયેનેવ વેદિતબ્બન્તિ.

યાનસિક્ખાપદવણ્ણના નિટ્ઠિતા.

૩. સઙ્ઘાણિસિક્ખાપદવણ્ણના

તતિયે સઙ્ઘાણિન્તિ યંકિઞ્ચિ કટૂપગં. ધારેય્યાતિ કટિયં પટિમુઞ્ચેય્ય. એત્થાપિ ઓમુઞ્ચિત્વા ઓમુઞ્ચિત્વા ધારેન્તિયા પયોગગણનાય પાચિત્તિયં.

સાવત્થિયં અઞ્ઞતરં ભિક્ખુનિં આરબ્ભ સઙ્ઘાણિં ધારણવત્થુસ્મિં પઞ્ઞત્તં. આબાધપચ્ચયા કટિસુત્તં ધારેન્તિયા, ઉમ્મત્તિકાદીનઞ્ચ અનાપત્તિ. સેસં વુત્તનયેનેવ વેદિતબ્બં, ઇદં પન અકુસલચિત્તન્તિ.

સઙ્ઘાણિસિક્ખાપદવણ્ણના નિટ્ઠિતા.

૪. ઇત્થાલઙ્કારસિક્ખાપદવણ્ણના

ચતુત્થે ઇત્થાલઙ્કારન્તિ સીસૂપગાદીસુ અઞ્ઞતરં યંકિઞ્ચિ પિળન્ધનં. ઇધ તસ્સ તસ્સ વસેન વત્થુગણનાય આપત્તિ વેદિતબ્બા.

સાવત્થિયં છબ્બગ્ગિયા ભિક્ખુનિયો આરબ્ભ ઇત્થાલઙ્કારં ધારણવત્થુસ્મિં પઞ્ઞત્તં, આબાધપચ્ચયા કિઞ્ચિદેવ ધારેન્તિયા, ઉમ્મત્તિકાદીનઞ્ચ અનાપત્તિ. સેસં વુત્તસદિસમેવાતિ.

ઇત્થાલઙ્કારસિક્ખાપદવણ્ણના નિટ્ઠિતા.

૫. ગન્ધવણ્ણકસિક્ખાપદવણ્ણના

પઞ્ચમે ગન્ધવણ્ણકેનાતિ યેનકેનચિ ગન્ધેન ચ વણ્ણકેન ચ. ઇધ ગન્ધાદિયોજનતો પટ્ઠાય પુબ્બપયોગે દુક્કટં, નહાનપરિયોસાને પાચિત્તિયં. આબાધપચ્ચયા, ઉમ્મત્તિકાદીનઞ્ચ અનાપત્તિ. સેસં ચતુત્થસદિસમેવાતિ.

ગન્ધવણ્ણકસિક્ખાપદવણ્ણના નિટ્ઠિતા.

૬. વાસિતકસિક્ખાપદવણ્ણના

છટ્ઠે વાસિતકેનાતિ ગન્ધવાસિતકેન. પિઞ્ઞાકેનાતિ તિલપિટ્ઠેન. સેસં પઞ્ચમસદિસમેવાતિ.

વાસિતકસિક્ખાપદવણ્ણના નિટ્ઠિતા.

૭. ભિક્ખુનિઉમ્મદ્દાપનસિક્ખાપદવણ્ણના

સત્તમે ઉમ્મદ્દાપેય્યાતિ ઉબ્બટ્ટાપેય્ય. પરિમદ્દાપેય્યાતિ સમ્બાહાપેય્ય. એત્થ ચ હત્થં અમુઞ્ચિત્વા ઉબ્બટ્ટને એકાવ આપત્તિ, મોચેત્વા મોચેત્વા ઉબ્બટ્ટને પયોગગણનાય આપત્તિયો. સમ્બાહનેપિ એસેવ નયો.

સાવત્થિયં સમ્બહુલા ભિક્ખુનિયો આરબ્ભ ભિક્ખુનિયા ઉમ્મદ્દાપનપરિમદ્દાપનવત્થુસ્મિં પઞ્ઞત્તં, ગિલાનાય, આપદાસુ, ઉમ્મત્તિકાદીનઞ્ચ અનાપત્તિ. ઇધ મગ્ગગમનપરિસ્સમોપિ ગેલઞ્ઞં, ચોરભયાદીહિ સરીરકમ્પનાદયોપિ આપદા. સેસં ચતુત્થે વુત્તનયેનેવ વેદિતબ્બન્તિ.

ભિક્ખુનિઉમ્મદ્દાપનસિક્ખાપદવણ્ણના નિટ્ઠિતા.

૮-૯-૧૦. સિક્ખમાનઉમ્મદ્દાપનાદિસિક્ખાપદવણ્ણના

અટ્ઠમનવમદસમેસુપિ સિક્ખમાનાય સામણેરિયા ગિહિનિયાતિ એત્તકમેવ નાનં. સેસં સત્તમસદિસમેવાતિ.

સિક્ખમાનઉમ્મદ્દાપનાદિસિક્ખાપદવણ્ણના નિટ્ઠિતા.

૧૧. અનાપુચ્છાસિક્ખાપદવણ્ણના

એકાદસમે ભિક્ખુસ્સ પુરતોતિ ન અભિમુખમેવાતિ અત્થો, ઇદં પન ઉપચારં સન્ધાય કથિતન્તિ વેદિતબ્બં. તસ્મા ભિક્ખુસ્સ ઉપચારે અન્તમસો છમાયપિ ‘‘નિસીદામિ, અય્યા’’તિ અનાપુચ્છિત્વા નિસીદન્તિયા પાચિત્તિયં.

સાવત્થિયં સમ્બહુલા ભિક્ખુનિયો આરબ્ભ અનાપુચ્છા નિસીદનવત્થુસ્મિં પઞ્ઞત્તં, તિકપાચિત્તિયં, આપુચ્છિતે દ્વિકદુક્કટં. તસ્મિં આપુચ્છિતસઞ્ઞાય, ગિલાનાય, આપદાસુ, ઉમ્મત્તિકાદીનઞ્ચ અનાપત્તિ. ભિક્ખુસ્સ અનાપુચ્છા, ઉપચારે નિસજ્જા, અનુઞ્ઞાતકારણાભાવોતિ ઇમાનેત્થ તીણિ અઙ્ગાનિ. સમુટ્ઠાનાદીનિ કથિનસદિસાનિ, ઇદં પન કિરિયાકિરિયન્તિ.

અનાપુચ્છાસિક્ખાપદવણ્ણના નિટ્ઠિતા.

૧૨. પઞ્હાપુચ્છનસિક્ખાપદવણ્ણના

દ્વાદસમે અનોકાસકતન્તિ ‘‘અસુકસ્મિં નામ ઠાને પુચ્છામી’’તિ એવં અકતઓકાસં, તસ્મા સુત્તન્તે ઓકાસં કારાપેત્વા વિનયં વા અભિધમ્મં વા પુચ્છન્તિયા પાચિત્તિયં. સેસેસુપિ એસેવ નયો, સબ્બસો અકારિતે પન વત્તબ્બમેવ નત્થિ.

સાવત્થિયં સમ્બહુલા ભિક્ખુનિયો આરબ્ભ અનોકાસકતં ભિક્ખું પઞ્હં પુચ્છનવત્થુસ્મિં પઞ્ઞત્તં. તત્થ તત્થ ઓકાસં કારાપેત્વા પુચ્છન્તિયા, અનોદિસ્સ ઓકાસં કારાપેત્વા યત્થ કત્થચિ પુચ્છન્તિયા, ઉમ્મત્તિકાદીનઞ્ચ અનાપત્તિ. ભિક્ખુસ્સ અનોકાસકારાપનં, પઞ્હં પુચ્છનન્તિ ઇમાનેત્થ દ્વે અઙ્ગાનિ. સમુટ્ઠાનાદીનિ પદસોધમ્મસદિસાનિ, ઇદં પન કિરિયાકિરિયન્તિ.

પઞ્હાપુચ્છનસિક્ખાપદવણ્ણના નિટ્ઠિતા.

૧૩. અસંકચ્ચિકસિક્ખાપદવણ્ણના

તેરસમે અસંકચ્ચિકાતિ અધક્ખકઉબ્ભનાભિમણ્ડલસઙ્ખાતસ્સ સરીરસ્સ પટિચ્છાદનત્થં અનુઞ્ઞાતસંકચ્ચિકવિરહિતા. ગામં પવિસેય્યાતિ એત્થ પરિક્ખિત્તસ્સ ગામસ્સ પરિક્ખેપં, અપરિક્ખિત્તસ્સ ઉપચારં અતિક્કમન્તિયા વા ઓક્કમન્તિયા વા પઠમપાદે દુક્કટં, દુતિયે પાચિત્તિયં.

સાવત્થિયં અઞ્ઞતરં ભિક્ખુનિં આરબ્ભ અસંકચ્ચિકાય ગામં પવિસનવત્થુસ્મિં પઞ્ઞત્તં. યસ્સા પન સંકચ્ચિકચીવરં અચ્છિન્નં વા નટ્ઠં વા, તસ્સા, ગિલાનાય, આપદાસુ, ઉમ્મત્તિકાદીનઞ્ચ અનાપત્તિ. અસંકચ્ચિકતા, વુત્તપરિચ્છેદાતિક્કમો, અનુઞ્ઞાતકારણાભાવોતિ ઇમાનેત્થ તીણિ અઙ્ગાનિ. સમુટ્ઠાનાદીનિ એળકલોમસદિસાનીતિ.

અસંકચ્ચિકસિક્ખાપદવણ્ણના નિટ્ઠિતા.

છત્તુપાહનવગ્ગો નવમો.

૧૦…પે…૧૬. મુસાવાદાદિવગ્ગો

મુસાવાદાદિસિક્ખાપદવણ્ણના

ઇતો પરેસુ મુસાવાદવગ્ગાદીસુ સત્તસુ વગ્ગેસુ ભિક્ખુપાતિમોક્ખવણ્ણનાયં વુત્તનયેનેવ વિનિચ્છયો વેદિતબ્બોતિ.

સોળસમવગ્ગો.

ઉદ્દિટ્ઠા ખો અય્યાયો છસટ્ઠિસતા પાચિત્તિયા ધમ્માતિ ભિક્ખૂ આરબ્ભ પઞ્ઞત્તા સાધારણા સત્તતિ, અસાધારણા છન્નવુતીતિ એવં છસટ્ઠિસતા. સેસં સબ્બત્થ ઉત્તાનમેવાતિ.

કઙ્ખાવિતરણિયા પાતિમોક્ખવણ્ણનાય

ભિક્ખુનિપાતિમોક્ખે

સુદ્ધપાચિત્તિયવણ્ણના નિટ્ઠિતા.

તત્રાયં સઙ્ખેપતો અસાધારણસિક્ખાપદેસુ સમુટ્ઠાનવિનિચ્છયો – ગિરગ્ગસમજ્જા ચિત્તાગારસિક્ખાપદં સઙ્ઘાણી ઇત્થાલઙ્કારો ગન્ધવણ્ણકો વાસિતકપિઞ્ઞાકો ભિક્ખુનિઆદીહિ ઉમ્મદ્દનપરિમદ્દનાતિ ઇમાનિ દસ સિક્ખાપદાનિ અચિત્તકાનિ લોકવજ્જાનિ અકુસલચિત્તાનિ. અયં પનેત્થ અધિપ્પાયો, વિનાપિ ચિત્તેન આપજ્જિતબ્બત્તા અચિત્તકાનિ, ચિત્તે પન સતિ અકુસલેનેવ આપજ્જિતબ્બત્તા લોકવજ્જાનિ ચેવ અકુસલચિત્તાનિ ચાતિ. અવસેસાનિ સચિત્તકાનિ પણ્ણત્તિવજ્જાનેવ. ચોરિવુટ્ઠાપનં ગામન્તરં આરામસિક્ખાપદં ગબ્ભિનિવગ્ગે આદિતો પટ્ઠાય સત્ત, કુમારિભૂતવગ્ગે આદિતો પટ્ઠાય પઞ્ચ પુરિસાદિસંસટ્ઠં પારિવાસિકછન્દદાનં અનુવસ્સવુટ્ઠાપનં એકન્તરિકવુટ્ઠાપનન્તિ ઇમાનિ એકૂનવીસતિ સિક્ખાપદાનિ સચિત્તકાનિ પણ્ણત્તિવજ્જાનિ. અવસેસાનિ સચિત્તકાનિ લોકવજ્જાનેવાતિ.