૬. અભિક્ખુકાવાસસિક્ખાપદવણ્ણના

છટ્ઠે સચે ભિક્ખુનુપસ્સયતો અદ્ધયોજનબ્ભન્તરે ઓવાદદાયકા ભિક્ખૂ ન વસન્તિ, મગ્ગો વા અખેમો હોતિ ન સક્કા અનન્તરાયેન ગન્તું, અયં અભિક્ખુકો નામ આવાસો. તત્થ ‘‘વસ્સં વસિસ્સામી’’તિ સેનાસનપઞ્ઞાપનપાનીયઉપટ્ઠાપનાદીનિ કરોન્તિયા દુક્કટં, સહ અરુણુગ્ગમના પાચિત્તિયં. અયમેત્થ સઙ્ખેપો, વિત્થારો પન સમન્તપાસાદિકાયં (પાચિ. અટ્ઠ. ૧૪૪ આદયો) વુત્તો.

સાવત્થિયં સમ્બહુલા ભિક્ખુનિયો આરબ્ભ અભિક્ખુકે આવાસે વસ્સં વસનવત્થુસ્મિં પઞ્ઞત્તં, યત્થ પન વસ્સૂપગતા ભિક્ખૂ પક્કન્તા વા હોન્તિ વિબ્ભન્તા વા કાલઙ્કતા વા પક્ખસઙ્કન્તા વા તત્થ વસન્તિયા, આપદાસુ, ઉમ્મત્તિકાદીનઞ્ચ અનાપત્તિ. અભિક્ખુકાવાસતા, વસ્સૂપગમનં, અરુણુગ્ગમનન્તિ ઇમાનેત્થ તીણિ અઙ્ગાનિ. સમુટ્ઠાનાદીનિ એળકલોમસદિસાનેવાતિ.

અભિક્ખુકાવાસસિક્ખાપદવણ્ણના નિટ્ઠિતા.