૭. ઉક્ખિત્તાનુવત્તિકાસિક્ખાપદવણ્ણના

તતિયે ઉક્ખિત્તન્તિ આપત્તિયા અદસ્સનાદીસુ ઉક્ખિત્તં. ધમ્મેનાતિ ભૂતેન વત્થુના. વિનયેનાતિ ચોદેત્વા સારેત્વા. સત્થુસાસનેનાતિ ઇધાપિ ચોદેત્વા સારેત્વા કરણમેવ સત્થુસાસનં નામ. અનાદરન્તિ યેન સઙ્ઘેન ઉક્ખેપનિયકમ્મં કતં, તસ્મિં વા, તત્થ પરિયાપન્નગણે વા એકપુગ્ગલે વા તસ્મિં વા કમ્મે આદરવિરહિતં, સમ્માવત્તનાય અવત્તમાનન્તિ અત્થો. અપ્પટિકારન્તિ પટિકારરહિતં, અનોસારિતન્તિ અત્થો. અકતસહાયન્તિ એકકમ્માદિકે સંવાસે સહ અયનભાવેન સમાનસંવાસકા ભિક્ખૂ સહાયા નામ, યસ્સ પન સો સંવાસો તેહિ સદ્ધિં નત્થિ ન તેન તે સહાયા કતા હોન્તિ, ઇતિ સો અકતસહાયો નામ, તં અકતસહાયં, સમાનસંવાસકભાવં અનુપગતન્તિ અત્થો. તમનુવત્તેય્યાતિ તં ઉક્ખિત્તકં ઉક્ખિત્તકભાવેયેવ ઠિતં ભિક્ખું યા ભિક્ખુની યંદિટ્ઠિકો સો હોતિ, તાય દિટ્ઠિયા ગહણભાવેન અનુવત્તેય્ય. સા ભિક્ખુની ભિક્ખુનીહિ સઙ્ઘભેદસિક્ખાપદાદીસુ વુત્તનયેન વિસું સઙ્ઘમજ્ઝે ચ વુચ્ચમાના તં વત્થું અપ્પટિનિસ્સજ્જન્તી સમનુભાસનકમ્મપરિયોસાને ઉક્ખિત્તાનુવત્તિકા નામ પારાજિકા હોતીતિ.

સાવત્થિયં થુલ્લનન્દં આરબ્ભ ઉક્ખિત્તાનુવત્તનવત્થુસ્મિં પઞ્ઞત્તં, ઞત્તિયા દુક્કટં, દ્વીહિ કમ્મવાચાહિ દ્વે થુલ્લચ્ચયા, ‘‘યસ્સા નક્ખમતિ, સા ભાસેય્યા’’તિ એવં ય્ય-કારપ્પત્તાય તતિયકમ્મવાચાય પારાજિકં, અધમ્મકમ્મે તિકદુક્કટં, સેસં સઙ્ઘભેદસિક્ખાપદાદીસુ વુત્તનયેનેવ વેદિતબ્બં.

ઉક્ખિત્તાનુવત્તિકાસિક્ખાપદવણ્ણના નિટ્ઠિતા.