૩. પઞ્હપુચ્છકવણ્ણના

સયં જેટ્ઠકભાવેન પવત્તનતો ચત્તારો અધિપતયો અઞ્ઞમઞ્ઞં ગરું ન કરોન્તિ. તસ્મા ‘‘ચત્તારો ઇદ્ધિપાદા ન મગ્ગાધિપતિનો’’તિ વુત્તા. તેનાહ ‘‘અઞ્ઞમઞ્ઞસ્સ પન અધિપતયો ન ભવન્તી’’તિ. એતમત્થન્તિ ‘‘અધિપતયો અઞ્ઞમઞ્ઞસ્સ અધિપતી ન ભવન્તી’’તિ એતમત્થં. અધિપતિનોતિ અધિપતિ ભવિતું સમત્થસ્સ. અધિપતિં ન કરોન્તીતિ અધિપતિં કત્વા ગરું કત્વા નપ્પવત્તન્તિ. અધિપતીનં સહભાવેતિ અધિપતિકિચ્ચકરણેન સહપવત્તિયં. ‘‘અવીમંસાધિપતિકસ્સ મગ્ગસ્સ અભાવા’’તિ ઇદં ‘‘અધિપતિતાસમત્થા ધમ્મા અધિપતિભાવેનેવ પવત્તેય્યુ’’ન્તિ દોસારોપનવસેનાહ, ન યથાધિગતવસેન. અધિપતિધમ્માનઞ્હિ પુબ્બાભિસઙ્ખારે સતિ અધિપતિભાવેન પવત્તિ, ન અઞ્ઞથાતિ સહભાવેપિ તદભાવં સન્ધાય વિસેસનં ન કત્તબ્બં સિયાતિ સક્કા વત્તું. અઞ્ઞમઞ્ઞાધિપતિકરણભાવેતિ અઞ્ઞમઞ્ઞં અધિપતિં કત્વા પવત્તિયં. વીમંસાધિપતિકત્તવચનન્તિ વીમંસાધિપતિકભાવસ્સ વચનં. ન વત્તબ્બં સિયા સબ્બેસમ્પિ અધિપતીનં સાધિપતિકત્તાતિ અધિપ્પાયો. સહભાવો પટિક્ખિત્તો એવ સાધિપતિભાવસ્સ અનેકંસિકતાવચનતો.

પઞ્હપુચ્છકવણ્ણના નિટ્ઠિતા.

ઇદ્ધિપાદવિભઙ્ગવણ્ણના નિટ્ઠિતા.