૧૧. મગ્ગઙ્ગવિભઙ્ગો

૨. અભિધમ્મભાજનીયવણ્ણના

૪૯૦. અભિધમ્મેતિ ધમ્મસઙ્ગહે. સો હિ નિબ્બત્તિતાભિધમ્મદેસના, ન વિભઙ્ગદેસના વિય સુત્તન્તનયવિમિસ્સા. અરિયોપપદતં ન કરોતિ વિનાપિ તેનસ્સ અરિયભાવસિદ્ધિતો. તેનાહ અટ્ઠકથાયં ‘‘યથા હી’’તિઆદિ.

૪૯૩. ‘‘લોકિયકાલેના’’તિ ઇદં પુબ્બભાગભાવનાનુભાવેન કિચ્ચાતિરેકસિદ્ધીતિ દસ્સનત્થં વુત્તં. એતેસન્તિ સમ્માદિટ્ઠિઆદીનં. અપ્પહાને, પહાને ચ આદીનવાનિસંસવિભાવનાદિના વિસેસપ્પચ્ચયત્તા સમ્માદિટ્ઠિઆદીનિ મિચ્છાવાચાદીનિ પજહાપેન્તીતિ વુત્તાનિ. મિચ્છાવાચાદિતો નિવત્તિ સમ્માવાચાદિકિરિયાતિ વુત્તં ‘‘સમ્માવાચાદિકિરિયા હિ વિરતી’’તિ. સમ્માદિટ્ઠિઆદયો વિય ન કારાપકભાવેન, તંસમઙ્ગીપુગ્ગલો વિય ન કત્તુભાવેન. લોકુત્તરક્ખણેપીતિ ન કેવલં લોકિયક્ખણેયેવ, અથ ખો લોકુત્તરક્ખણેપિ.

ખન્ધોપધિં વિપચ્ચતીતિ પટિસન્ધિદાયિકં સન્ધાયાહ. તત્થ વિપચ્ચતીતિ પવત્તિવિપાકદાયિકં.

એકેકન્તિ ‘‘તત્થ કતમા સમ્માદિટ્ઠી’’તિઆદિના એકેકં અઙ્ગં પુચ્છિત્વા. તસ્સ તસ્સેવાતિ એકેકઅઙ્ગસ્સેવ, ન અઙ્ગસમુદાયસ્સ. સહ પન પુચ્છિત્વાતિ ‘‘તત્થ કતમો પઞ્ચઙ્ગિકો મગ્ગો’’તિ પુચ્છિત્વા. એકતો વિસ્સજ્જનપટિનિદ્દેસત્તાતિ યદિપિ ‘‘તત્થ કતમા સમ્માદિટ્ઠિ? યા પઞ્ઞા’’તિઆદિના (વિભ. ૪૯૫) વિસ્સજ્જનં કતં, ‘‘તત્થ કતમો પઞ્ચઙ્ગિકો મગ્ગો’’તિ (વિભ. ૪૯૪) પન એકતો કતાય પુચ્છાય વિસ્સજ્જનવસેન પટિનિદ્દેસભાવતો ન પાટિયેક્કં પુચ્છાવિસ્સજ્જનં નામ હોતિ. કસ્મા પનેત્થ પઞ્ચઙ્ગિકવારે એવ પાટિયેક્કં પુચ્છાવિસ્સજ્જનં કતં, ન અટ્ઠઙ્ગિકવારેતિ ચોદનં સન્ધાયાહ ‘‘તત્થા’’તિઆદિ. એકેકમુખાયાતિ સમ્માદિટ્ઠિઆદિમુખાય. તેન વુત્તં ‘‘અરિયં વો, ભિક્ખવે, સમ્માદિટ્ઠિં દેસેસ્સામિ સઉપનિસં સપરિક્ખાર’’ન્તિઆદિ (સં. નિ. ૫.૨૮). પુબ્બસુદ્ધિયા સિજ્ઝન્તિ. તથા હિ વુત્તં ‘‘પુબ્બેવ ખો પનસ્સ કાયકમ્મં વચીકમ્મં આજીવો સુપરિસુદ્ધો હોતી’’તિ (મ. નિ. ૩.૪૩૧), તસ્મા સમ્માવાચાદિમુખા ભાવના નત્થીતિ અધિપ્પાયો. તેનાહ ‘‘ન મગ્ગસ્સ ઉપચારેના’’તિ.

અભિધમ્મભાજનીયવણ્ણના નિટ્ઠિતા.

મગ્ગઙ્ગવિભઙ્ગવણ્ણના નિટ્ઠિતા.