૧૦. વોહારકથાવણ્ણના

૩૪૭. વોહારકથાયં ઉદાહુ સોતાદીનિપીતિ એકન્તલોકિયેસુ વિસયવિસયીસુ વિસયસ્સેવ લોકુત્તરભાવો, ન વિસયીનન્તિ નત્થેત્થ કારણં. યથા ચ વિસયીનં લોકુત્તરભાવો અસિદ્ધો, તથા વિસયસ્સ સદ્દાયતનસ્સ. તત્થ યથા અસિદ્ધલોકુત્તરભાવસ્સ તસ્સ લોકુત્તરતા, એવં સોતાદીનં આપન્નાતિ કિન્તિ તાનિપિ લોકુત્તરાનીતિ અત્થો દટ્ઠબ્બો.

યદિ લોકુત્તરે પટિહઞ્ઞેય્ય, લોકુત્તરો સિયાતિ અત્થો ન ગહેતબ્બો. ન હિ લોકુત્તરે પટિહઞ્ઞતીતિ પરિકપ્પિતેપિ સદ્દસ્સ લોકુત્તરભાવો અત્થીતિ અધિપ્પાયો. ‘‘લોકિયેન ઞાણેના’’તિ ઉદ્ધટં, ‘‘વિઞ્ઞાણેના’’તિ પન પાળિ, તઞ્ચ વિઞ્ઞાણં સોતસમ્બન્ધેન સોતવિઞ્ઞાણન્તિ વિઞ્ઞાયતીતિ. અનેકન્તતાતિ લોકિયેન ઞાણેન જાનિતબ્બતો લોકિયોતિ એતસ્સ હેતુસ્સ લોકિયે લોકુત્તરે ચ સમ્ભવતો અનેકન્તભાવો સિયાતિ અધિપ્પાયો.

વોહારકથાવણ્ણના નિટ્ઠિતા.