૨. પચ્ચનીકાનુલોમવણ્ણના

૭-૧૦. ‘‘અત્તનો લદ્ધિં નિસ્સાય પટિઞ્ઞા પરવાદિસ્સા’’તિ વત્વા પુન ‘‘પરમત્થવસેન પુગ્ગલસ્સ અભાવતો પટિક્ખેપો પરવાદિસ્સા’’તિ વુત્તં. તત્રાયં પટિક્ખેપો અત્તનો લદ્ધિયા યદિ કતો, પરમત્થતો અઞ્ઞેન સચ્ચિકટ્ઠપરમત્થેન પુગ્ગલો ઉપલબ્ભતીતિ અયમસ્સ લદ્ધીતિ આપજ્જતિ. તથા ચ સતિ નાયં સમ્મુતિસચ્ચવસેન ઉપલદ્ધિં ઇચ્છન્તેન નિગ્ગહેતબ્બો. અથ અત્તનો લદ્ધિં નિગ્ગૂહિત્વા પરસ્સ લદ્ધિવસેન પટિક્ખિપતિ, પુરિમપટિઞ્ઞાય અવિરોધિતત્તા ન નિગ્ગહેતબ્બો. ન હિ અત્તનો ચ પરસ્સ ચ લદ્ધિં વદન્તસ્સ દોસો આપજ્જતીતિ. અત્તનો પન લદ્ધિયા પટિજાનિત્વા પરલદ્ધિયા પટિક્ખિપન્તેન અત્તનો લદ્ધિં છડ્ડેત્વા પરલદ્ધિ ગહિતા હોતીતિ નિગ્ગહેતબ્બોતિ અયમેત્થ અધિપ્પાયો સિયા.

પચ્ચનીકાનુલોમવણ્ણના નિટ્ઠિતા.

સુદ્ધસચ્ચિકટ્ઠવણ્ણના નિટ્ઠિતા.