૯. નવમનયો સમ્પયુત્તેનસમ્પયુત્તપદવણ્ણના

૩૧૯. સમ્પયુત્તેનસમ્પયુત્તપદવણ્ણનાયં યંખન્ધાદિવસેનાતિ સમાસપદં ઇદં દટ્ઠબ્બં, યસ્સ ખન્ધાદિનો વસેનાતિ અત્થો. તસ્સેવાતિ ચ તસ્સેવ ખન્ધાદિનોતિ અત્થો. ઇદં વુત્તં હોતિ – યં ઇધ સમ્પયુત્તં વુત્તં, તં રૂપક્ખન્ધાદીસુ અરણન્તેસુ યેન વેદનાક્ખન્ધાદિના સમ્પયુત્તં, પુન તસ્સેવ વેદનાક્ખન્ધાદિનો ખન્ધાદીહિ સમ્પયોગં પુચ્છિત્વા વિસ્સજ્જનં કતં. તઞ્હિ અત્તના સમ્પયુત્તેન સમ્પયુત્તત્તા ‘‘સમ્પયુત્તેન સમ્પયુત્ત’’ન્તિ નિદ્ધારિતન્તિ. રૂપેન વાતિ એતેન નિરોધસચ્ચઅપ્પચ્ચયઅસઙ્ખતેહિપિ અયોગો વુત્તો હોતીતિ દટ્ઠબ્બો, તથા રૂપમિસ્સકેહિ વાતિ એતેન અનુપાદિન્નઅનુપાદાનિયાદીહિ નિબ્બાનમિસ્સકેહિપિ. વક્ખતિ હિ ‘‘નિબ્બાનં પન સુખુમરૂપગતિકમેવા’’તિ. સબ્બારૂપક્ખન્ધસઙ્ગાહકેહીતિ વત્તમાનાનમેવ સમ્પયોગો લબ્ભતીતિ વત્તમાનેસુ એકમ્પિ ધમ્મં અનપનેત્વા અવિકલચતુક્ખન્ધસઙ્ગાહકેહિ અરૂપભવાદીહીતિ અત્થો. અયં પનેત્થ સઙ્ખેપો – યે સમ્પયોગં ન લભન્તિ રૂપક્ખન્ધાદયો, તે સબ્બે ન ગહિતા, ઇતરે ચ વેદનાક્ખન્ધાદયો સબ્બે ગહિતાતિ.

નવમનયસમ્પયુત્તેનસમ્પયુત્તપદવણ્ણના નિટ્ઠિતા.