૫. ઉપોસથવગ્ગો
૧-૮. સંખિત્તૂપોસથસુત્તાદિવણ્ણના
૪૧-૪૮. પઞ્ચમસ્સ પઠમાદીસુ નત્થિ વત્તબ્બં. છટ્ઠે (સં. નિ. ટી. ૧.૧.૧૬૫) પઞ્ચ અઙ્ગાનિ એતસ્સાતિ પઞ્ચઙ્ગં, પઞ્ચઙ્ગમેવ પઞ્ચઙ્ગિકં, તસ્સ પઞ્ચઙ્ગિકસ્સ. મહતી દદ્દરી વીણાવિસેસોપિ આતતમેવાતિ ‘‘ચમ્મપરિયોનદ્ધેસૂ’’તિ વિસેસનં કતં. એકતલતૂરિયં કુમ્ભથુનદદ્દરિકાદિ. ઉભયતલં ભેરિમુદિઙ્ગાદિ. ચમ્મપરિયોનદ્ધં હુત્વા વિનિબદ્ધં આતતવિતતં. સબ્બસો પરિયોનદ્ધં નામ ચતુરસ્સઅમ્બણં પણવાદિ ચ. ગોમુખીઆદીનમ્પિ એત્થેવ સઙ્ગહો દટ્ઠબ્બો. વંસાદીતિ આદિ-સદ્દેન સઙ્ખાદીનં સઙ્ગહો. સમ્માદીતિ સમ્મતાળકંસતાળસિલાસલાકતાળાદિ. તત્થ સમ્મતાળં નામ દન્તમયતાળં. કંસતાળં લોહમયં. સિલામયં અયોપત્તેન ચ વાદનતાળં સિલાસલાકતાળં. સુમુચ્છિતસ્સાતિ સુટ્ઠુ પટિયત્તસ્સ. પમાણેતિ નાતિદળ્હનાતિસિથિલસઙ્ખાતે મજ્ઝિમે મુચ્છનાપમાણે. છેકોતિ પટુ પટ્ઠો. સો ચસ્સ પટુભાવો મનોહરોતિ આહ ‘‘સુન્દરો’’તિ. રઞ્જેતુન્તિ રાગં ઉપ્પાદેતું. ખમતેવાતિ રોચતેવ. ન નિબ્બિન્દતીતિ ન તજ્જેતિ, સોતસુખભાવતો પિયાયિતબ્બોવ હોતિ.
ભત્તારં નાતિમઞ્ઞતીતિ સામિકં મુઞ્ચિત્વા અઞ્ઞં મનસાપિ ન પત્થેતિ. ઉટ્ઠાહિકાતિ ઉટ્ઠાનવીરિયસમ્પન્ના. અનલસાતિ નિક્કોસજ્જા. સઙ્ગહિતપરિજ્જનાતિ સમ્માનનાદીહિ ચેવ છણાદીસુ પેસેતબ્બ-પિયભણ્ડાદિપણ્ણાકારપેસનાદીહિ ચ સઙ્ગહિતપરિજના. ઇધ પરિજનો નામ સામિકસ્સ ચેવ અત્તનો ચ ઞાતિજનો. સમ્ભતન્તિ કસિવણિજ્જાદીનિ કત્વા આભતધનં. સત્તમટ્ઠમાનિ ઉત્તાનત્થાનિ.
સંખિત્તૂપોસથસુત્તાદિવણ્ણના નિટ્ઠિતા.
૯-૧૦. પઠમઇધલોકિકસુત્તાદિવણ્ણના
૪૯-૫૦. નવમે ઇધલોકવિજયાયાતિ ઇધલોકવિજિનનત્થાય અભિભવત્થાય. યો હિ દિટ્ઠધમ્મિકં અનત્થં પરિવજ્જનવસેન અભિભવતિ, તતો એવ તદત્થં સમ્પાદેતિ, સો ઇધલોકવિજયાય પટિપન્નો નામ હોતિ પચ્ચત્થિકનિગ્ગણ્હનતો સદત્થસમ્પાદનતો ચ. તેનાહ ‘‘અયંસ લોકો આરદ્ધો હોતી’’તિ. (પસંસાવહતો તયિદં પસંસાવહનં કિત્તિસદ્દેન ઇધલોકે સદ્દાનં ચિત્તતોસનવિદ્ધેય્યભાવાપાદનેન ચ હોતીતિ દટ્ઠબ્બં.) સુસંવિહિતકમ્મન્તોતિ યાગુભત્તપચનકાલાદીનિ અનતિક્કમિત્વા તસ્સ તસ્સ સાધુકં કરણેન સુટ્ઠુ સંવિહિતકમ્મન્તો. પરલોકવિજયાયાતિ પરલોકસ્સ વિજિનનત્થાય અભિભવત્થાય. યો હિ સમ્પરાયિકં અનત્થં પરિવજ્જનવસેન અભિભવતિ, તતો એવ તદત્થં સમ્પાદેતિ, સો પરલોકવિજયાય પટિપન્નો નામ હોતિ. સેસં સબ્બત્થ ઉત્તાનમેવ.
પઠમઇધલોકિકસુત્તાદિવણ્ણના નિટ્ઠિતા.
ઉપોસથવગ્ગવણ્ણના નિટ્ઠિતા.
પઠમપણ્ણાસકં નિટ્ઠિતં.