(૮) ૩. યોધાજીવવગ્ગો

૧-૨. પઠમચેતોવિમુત્તિફલસુત્તાદિવણ્ણના

૭૧-૭૨. તતિયસ્સ પઠમે અવિજ્જાપલિઘન્તિ એત્થ અવિજ્જાતિ વટ્ટમૂલિકા અવિજ્જા, અયં પચુરજનેહિ ઉક્ખિપિતું અસક્કુણેય્યભાવતો દુક્ખિપનટ્ઠેન નિબ્બાનદ્વારપ્પવેસવિબન્ધનેન ચ ‘‘પલિઘો વિયાતિ પલિઘો’’તિ વુચ્ચતિ. તેનેસ તસ્સા ઉક્ખિત્તત્તા ‘‘ઉક્ખિત્તપલિઘો’’તિ વુત્તો. પુનબ્ભવસ્સ કરણસીલો, પુનબ્ભવં વા ફલં અરહતીતિ પોનોભવિકા, પુનબ્ભવદાયિકાતિ અત્થો. જાતિસંસારોતિ જાયનવસેન ચેવ સંસરણવસેન ચ એવંલદ્ધનામાનં પુનબ્ભવક્ખન્ધાનં પચ્ચયો કમ્માભિસઙ્ખારો. જાતિસંસારોતિ હિ ફલૂપચારેન કારણં વુત્તં. તઞ્હિ પુનપ્પુનં ઉપ્પત્તિકારણવસેન પરિક્ખિપિત્વા ઠિતત્તા ‘‘પરિખા’’તિ વુચ્ચતિ સન્તાનસ્સ પરિક્ખિપનતો. તેનેસ તસ્સ સંકિણ્ણત્તા વિકિણ્ણત્તા સબ્બસો ખિત્તત્તા વિનાસિતત્તા ‘‘સંકિણ્ણપરિખો’’તિ વુત્તો.

તણ્હાસઙ્ખાતન્તિ એત્થ તણ્હાતિ વટ્ટમૂલિકા તણ્હા. અયઞ્હિ ગમ્ભીરાનુગતટ્ઠેન ‘‘એસિકા’’તિ વુચ્ચતિ. લુઞ્ચિત્વા ઉદ્ધરિત્વા. ઓરમ્ભાગિયાનીતિ ઓરમ્ભાગજનકાનિ કામભવે ઉપપત્તિપચ્ચયાનિ કામરાગસંયોજનાદીનિ. એતાનિ હિ કવાટં વિય નગરદ્વારં ચિત્તં પિદહિત્વા ઠિતત્તા ‘‘અગ્ગળા’’તિ વુચ્ચન્તિ. તેનેસ તેસં નિગ્ગતત્તા ભિન્નત્તા ‘‘નિરગ્ગળો’’તિ વુત્તોતિ. અગ્ગમગ્ગેન પન્નો અપચિતો માનદ્ધજો એતસ્સાતિ પન્નદ્ધજો. પન્નભારોતિ ખન્ધભારકિલેસભારઅભિસઙ્ખારભારા ઓરોપિતા અસ્સાતિ પન્નભારો. વિસંયુત્તોતિ ચતૂહિ યોગેહિ સબ્બકિલેસેહિ ચ વિસંયુત્તો. અસ્મિમાનોતિ રૂપે અસ્મીતિ માનો, વેદનાય, સઞ્ઞાય, સઙ્ખારેસુ, વિઞ્ઞાણે અસ્મિમાનો. એત્થ હિ પઞ્ચપિ ખન્ધે અવિસેસતો ‘‘અસ્મી’’તિ ગહેત્વા પવત્તમાનો અસ્મિમાનોતિ અધિપ્પેતો.

નગરદ્વારસ્સ પરિસ્સયપટિબાહનત્થઞ્ચેવ સોધનત્થઞ્ચ ઉભોસુ પસ્સેસુ એસિકાથમ્ભે નિખણિત્વા ઠપેતીતિ આહ ‘‘નગરદ્વારે ઉસ્સાપિતે એસિકાથમ્ભે’’તિ. પાકારવિદ્ધંસનેનેવ પરિખાભૂમિસમકરણં હોતીતિ આહ ‘‘પાકારં ભિન્દિત્વા પરિખં વિકિરિત્વા’’તિ. ‘‘એવ’’ન્તિઆદિ ઉપમાસંસન્દનં. સન્તો સંવિજ્જમાનો કાયો ધમ્મસમૂહોતિ સક્કાયો, ઉપાદાનક્ખન્ધપઞ્ચકં. દ્વત્તિંસકમ્મકારણા દુક્ખક્ખન્ધે આગતદુક્ખાનિ. અક્ખિરોગસીસરોગાદયો. અટ્ઠનવુતિ રોગા, રાજભયાદીનિ પઞ્ચવીસતિમહાભયાનિ. દુતિયં ઉત્તાનમેવ.

પઠમચેતોવિમુત્તિફલસુત્તાદિવણ્ણના નિટ્ઠિતા.

૩-૪. પઠમધમ્મવિહારીસુત્તાદિવણ્ણના

૭૩-૭૪. તતિયે નિયકજ્ઝત્તેતિ અત્તનો સન્તાને. મેત્તાય ઉપસંહરણવસેન હિતં એસન્તેન. કરુણાય વસેન અનુકમ્પમાનેન. પરિગ્ગહેત્વાતિ પરિતો ગહેત્વા, ફરિત્વાતિ અત્થો. પરિચ્ચાતિ પરિતો કત્વા, સમન્તતો ફરિત્વા ઇચ્ચેવ અત્થો. ‘‘પટિચ્ચા’’તિપિ પાઠો. મા પમજ્જિત્થાતિ ‘‘ઝાયથા’’તિ વુત્તસમથવિપસ્સનાનં અનનુયુઞ્જનેન અઞ્ઞેન વા કેનચિ પમાદકારણેન મા પમાદં આપજ્જિત્થ. નિય્યાનિકસાસને અકત્તબ્બકરણં વિય કત્તબ્બાકરણમ્પિ પમાદોતિ. વિપત્તિકાલેતિ સત્તઅસપ્પાયાદિવિપત્તિયુત્તે કાલે. સબ્બેપિ સાસને ગુણા ઇધેવ સઙ્ગહં ગચ્છન્તીતિ આહ ‘‘ઝાયથ મા પમાદત્થ…પે… અનુસાસની’’તિ. ચતુત્થે નત્થિ વત્તબ્બં.

પઠમધમ્મવિહારીસુત્તાદિવણ્ણના નિટ્ઠિતા.

૫. પઠમયોધાજીવસુત્તવણ્ણના

૭૫. પઞ્ચમે યુજ્ઝનં યોધો, સો આજીવો એતેસન્તિ યોધાજીવા. તેનાહ ‘‘યુદ્ધૂપજીવિનો’’તિ. સન્થમ્ભિત્વા ઠાતું ન સક્કોતીતિ બદ્ધો ધિતિસમ્પન્નો ઠાતું ન સક્કોતિ. સમાગતેતિ સમ્પત્તે. બ્યાપજ્જતીતિ વિકારમાપજ્જતિ. તેનાહ ‘‘પકતિભાવં જહતી’’તિ.

રજગ્ગસ્મિન્તિ પચ્ચત્તે ભુમ્મવચનન્તિ આહ ‘‘કિં તસ્સ પુગ્ગલસ્સ રજગ્ગં નામા’’તિ. વિનિબ્બેઠેત્વાતિ ગહિતગ્ગહણં વિસ્સજ્જાપેત્વા. મોચેત્વાતિ સરીરતો અપનેત્વા.

પઠમયોધાજીવસુત્તવણ્ણના નિટ્ઠિતા.

૬. દુતિયયોધાજીવસુત્તવણ્ણના

૭૬. છટ્ઠે ચમ્મન્તિ ઇમિના ચમ્મમયં ચમ્મમિતિ સિબ્બિતં, અઞ્ઞં વા કેટકફલકાદિં સઙ્ગણ્હાતિ. ધનુકલાપં સન્નય્હિત્વાતિ ધનુઞ્ચેવ તૂણિરઞ્ચ સન્નય્હિત્વા સજ્જેત્વા. ધનુદણ્ડસ્સ જિયાયત્તભાવકરણાદિપિ હિ ધનુનો સન્નય્હનં. તેનેવાહ ‘‘ધનુઞ્ચ સરકલાપઞ્ચ સન્નય્હિત્વા’’તિ. યુદ્ધસન્નિવેસેન ઠિતન્તિ દ્વિન્નં સેનાનં બ્યૂહનસંવિધાનનયેન કતો યો સન્નિવેસો, તસ્સ વસેન ઠિતં, સેનાબ્યૂહસંવિધાનવસેન સન્નિવિટ્ઠન્તિ વુત્તં હોતિ. ઉસ્સાહઞ્ચ વાયામઞ્ચ કરોતીતિ યુજ્ઝનવસેન ઉસ્સાહં વાયામઞ્ચ કરોતિ. પરિયાપાદેન્તીતિ મરણપરિયન્તિકં અપરં પાપેન્તિ. તેનાહ ‘‘પરિયાપાદયન્તી’’તિ, જીવિતં પરિયાપાદયન્તિ મરણં પટિપજ્જાપેન્તીતિ વુત્તં હોતિ.

અરક્ખિતેનેવ કાયેનાતિઆદીસુ હત્થપાદે કીળાપેન્તો ગીવં વિપરિવત્તેન્તો કાયં ન રક્ખતિ નામ. નાનપ્પકારં દુટ્ઠુલ્લં કરોન્તો વાચં ન રક્ખતિ નામ. કામવિતક્કાદયો વિતક્કેન્તો ચિત્તં ન રક્ખતિ નામ. અનુપટ્ઠિતાય સતિયાતિ કાયગતાય સતિયા અનુપટ્ઠિતાય. રાગેન અનુગતોતિ રાગેન અનુપહતો. રાગપરેતોતિ વા રાગેન ફુટ્ઠો ફુટ્ઠવિસેન વિય સપ્પેન.

અનુદહનટ્ઠેનાતિ અનુપાયપ્પટિપત્તિયા. સમ્પતિ આયતિઞ્ચ મહાભિતાપટ્ઠેન. અનવત્થિતસભાવતાય ઇત્તરપચ્ચુપટ્ઠાનટ્ઠેન. મુહુત્તરમણીયતાય તાવકાલિકટ્ઠેન. બ્યત્તેહિ અભિભવનીયતાય સબ્બઙ્ગપચ્ચઙ્ગપલિભઞ્જનટ્ઠેન. છેદનભેદનાદિઅધિકરણભાવેન ઉગ્ઘટ્ટનસદિસતાય અધિકુટ્ટનટ્ઠેન. અવણે વણં ઉપ્પાદેત્વા અન્તો અનુપવિસનસભાવતાય વિનિવિજ્ઝનટ્ઠેન. દિટ્ઠધમ્મિકસમ્પરાયિક અનત્થનિમિત્તતાય સાસઙ્કસપ્પટિભયટ્ઠેન.

દુતિયયોધાજીવસુત્તવણ્ણના નિટ્ઠિતા.

૭-૮. પઠમઅનાગતભયસુત્તાદિવણ્ણના

૭૭-૭૮. સત્તમે વિસેસસ્સ પત્તિયા વિસેસસ્સ પાપુણનત્થં. વીરિયન્તિ પધાનવીરિયં. તં પન ચઙ્કમનવસેન કરણે ‘‘કાયિક’’ન્તિપિ વત્તબ્બતં લભતીતિ આહ – ‘‘દુવિધમ્પી’’તિ. સત્થકવાતાતિ સન્ધિબન્ધનાનિ કત્તરિયા છિન્દન્તા વિય પવત્તવાતા. તેનાહ – ‘‘સત્થં વિયા’’તિઆદિ. કતકમ્મેહીતિ કતચોરકમ્મેહિ. તે કિર કતકમ્મા યં નેસં દેવતં આયાચિત્વા કમ્મં નિપ્ફન્નં, તસ્સ ઉપકારત્થાય મનુસ્સે મારેત્વા ગલલોહિતાનિ ગણ્હન્તિ. તે ‘‘અઞ્ઞેસુ મનુસ્સેસુ મારિયમાનેસુ કોલાહલં ઉપ્પજ્જિસ્સતિ, પબ્બજિતં પરિયેસન્તો નામ નત્થી’’તિ મઞ્ઞમાના ભિક્ખૂ ગહેત્વા મારેન્તિ. તં સન્ધાયેતં વુત્તં. અકતકમ્મેહીતિ અટવિતો ગામં આગમનકાલે કમ્મનિપ્ફત્તત્થં પુરેતરં બલિકમ્મં કાતુકામેહિ. તેનેવાહ – ‘‘ચોરિકં કત્વા નિક્ખન્તા કતકમ્મા નામા’’તિઆદિ. અટ્ઠમે નત્થિ વત્તબ્બં.

પઠમઅનાગતભયસુત્તાદિવણ્ણના નિટ્ઠિતા.

૯. તતિયઅનાગતભયસુત્તવણ્ણના

૭૯. નવમે પાળિગમ્ભીરાતિ (સં. નિ. ટી. ૨.૨.૨૨૯) પાળિવસેન ગમ્ભીરા અગાધા દુક્ખોગાહા સલ્લસુત્તસદિસા. સલ્લસુત્તઞ્હિ (સુ. નિ. ૫૭૯) ‘‘અનિમિત્તમનઞ્ઞાત’’ન્તિઆદિના પાળિવસેન ગમ્ભીરં, ન અત્થગમ્ભીરં. તથા હિ તત્થ તા તા ગાથા દુવિઞ્ઞેય્યરૂપા તિટ્ઠન્તિ. દુવિઞ્ઞેય્યઞ્હિ ઞાણેન દુક્ખોગાહન્તિ કત્વા ‘‘ગમ્ભીર’’ન્તિ વુચ્ચતિ. પુબ્બાપરંપેત્થ કાસઞ્ચિ ગાથાનં દુવિઞ્ઞેય્યતાય દુક્ખોગાહમેવ, તસ્મા પાળિવસેન ગમ્ભીરં. અત્થગમ્ભીરાતિ અત્થવસેન ગમ્ભીરા મહાવેદલ્લસુત્તસદિસા, મહાવેદલ્લસુત્તસ્સ (મ. નિ. ૧.૪૪૯ આદયો) અત્થવસેન ગમ્ભીરતા પાકટાયેવ. લોકં ઉત્તરતીતિ લોકુત્તરો, સો અત્થભૂતો એતેસં અત્થીતિ લોકુત્તરા. તેનાહ – ‘‘લોકુત્તરધમ્મદીપકા’’તિ. સુઞ્ઞતાપટિસંયુત્તાતિ સત્તસુઞ્ઞધમ્મપ્પકાસકા. તેનાહ ‘‘ખન્ધધાતુઆયતનપચ્ચયાકારપ્પટિસંયુત્તા’’તિ. ઉગ્ગહેતબ્બં પરિયાપુણિતબ્બન્તિ ચ લિઙ્ગવચનવિપલ્લાસેન વુત્તન્તિ આહ ‘‘ઉગ્ગહેતબ્બે ચેવ વળઞ્જેતબ્બે ચા’’તિ. કવિનો કમ્મં કવિતા. યસ્સ પન યં કમ્મં, તં તેન કતન્તિ વુચ્ચતીતિ આહ ‘‘કવિતાતિ કવીહિ કતા’’તિ. કાવેય્યન્તિ કબ્યં, કબ્યન્તિ ચ કવિના વુત્તન્તિ અત્થો. તેનાહ ‘‘તસ્સેવ વેવચન’’ન્તિ. ચિત્તક્ખરાતિ ચિત્રાકારઅક્ખરા. ઇતરં તસ્સેવ વેવચનં. સાસનતો બહિદ્ધા ઠિતાતિ ન સાસનાવચરા. બાહિરકસાવકેહીતિ ‘‘બુદ્ધા’’તિ અપ્પઞ્ઞાતાનં યેસં કેસઞ્ચિ સાવકેહિ. સુસ્સૂસિસ્સન્તીતિ અક્ખરચિત્તતાય ચેવ સરસમ્પત્તિયા ચ અત્તમના હુત્વા સામણેરદહરભિક્ખુમાતુગામમહાગહપતિકાદયો ‘‘એસ ધમ્મકથિકો’’તિ સન્નિપતિત્વા સોતુકામા ભવિસ્સન્તિ.

તતિયઅનાગતભયસુત્તવણ્ણના નિટ્ઠિતા.

૧૦. ચતુત્થઅનાગતભયસુત્તવણ્ણના

૮૦. દસમે પઞ્ચવિધેન સંસગ્ગેનાતિ ‘‘સવનસંસગ્ગો, દસ્સનસંસગ્ગો, સમુલ્લાપસંસગ્ગો, સમ્ભોગસંસગ્ગો, કાયસંસગ્ગો’’તિ એવં વુત્તેન પઞ્ચવિધેન સંસગ્ગેન. સંસજ્જતિ એતેનાતિ સંસગ્ગો, રાગો. સવનહેતુકો, સવનવસેન વા પવત્તો સંસગ્ગો સવનસંસગ્ગો. એસ નયો સેસેસુપિ. કાયસંસગ્ગો પન કાયપરામાસો. તેસુ પરેહિ વા કથિયમાનં રૂપાદિસમ્પત્તિં અત્તના વા સિતલપિતગીતસદ્દં સુણન્તસ્સ સોતવિઞ્ઞાણવીથિવસેન ઉપ્પન્નો રાગો સવનસંસગ્ગો નામ. વિસભાગરૂપં ઓલોકેન્તસ્સ પન ચક્ખુવિઞ્ઞાણવીથિવસેન ઉપ્પન્નો રાગો દસ્સનસંસગ્ગો નામ. અઞ્ઞમઞ્ઞઆલાપસલ્લાપવસેન ઉપ્પન્નરાગો સમુલ્લાપસંસગ્ગો નામ. ભિક્ખુનો ભિક્ખુનિયા સન્તકં, ભિક્ખુનિયા ભિક્ખુસ્સ સન્તકં ગહેત્વા પરિભોગકરણવસેન ઉપ્પન્નરાગો સમ્ભોગસંસગ્ગો નામ. હત્થગ્ગાહાદિવસેન ઉપ્પન્નો રાગો કાયસંસગ્ગો નામ.

અનેકવિહિતન્તિ અન્નસન્નિધિપાનસન્નિધિવત્થસન્નિધિયાનસન્નિધિસયનસન્નિધિગન્ધસન્નિધિ- આમિસસન્નિધિવસેન અનેકપ્પકારં. સન્નિધિકતસ્સાતિ એતેન ‘‘સન્નિધિકારપરિભોગ’’ન્તિ (ધ. સ. તિકમાતિકા ૧૦) એત્થ કાર-સદ્દસ્સ કમ્મત્થતં દસ્સેતિ. યથા વા ‘‘આચયં ગામિનો’’તિ વત્તબ્બે અનુનાસિકલોપેન ‘‘આચયગામિનો’’તિ નિદ્દેસો કતો, એવં ‘‘સન્નિધિકારં પરિભોગ’’ન્તિ વત્તબ્બે અનુનાસિકલોપેન ‘‘સન્નિધિકારપરિભોગ’’ન્તિ વુત્તં, સન્નિધિં કત્વા પરિભોગન્તિ અત્થો.

‘‘સન્નિધિકતસ્સ પરિભોગ’’ન્તિ એત્થ (દી. નિ. અટ્ઠ. ૧.૧૨) પન દુવિધા કથા વિનયવસેન સલ્લેખવસેન ચ. વિનયવસેન તાવ યં કિઞ્ચિ અન્નં અજ્જ પટિગ્ગહિતં અપરજ્જુ સન્નિધિકારં હોતિ, તસ્સ પરિભોગે પાચિત્તિયં. અત્તના લદ્ધં પન સામણેરાનં દત્વા તેહિ લદ્ધં વા પાપેત્વા દુતિયદિવસે ભુઞ્જિતું વટ્ટતિ, સલ્લેખો પન ન હોતિ. પાનસન્નિધિમ્હિપિ એસેવ નયો. વત્થસન્નિધિમ્હિ અનધિટ્ઠિતાવિકપ્પિતં સન્નિધિ ચ હોતિ, સલ્લેખઞ્ચ કોપેતિ. અયં નિપ્પરિયાયકથા. પરિયાયતો પન તિચીવરસન્તુટ્ઠેન ભવિતબ્બં, ચતુત્થં લભિત્વા અઞ્ઞસ્સ દાતબ્બં. સચે યસ્સ કસ્સચિ દાતું ન સક્કોતિ, યસ્સ પન દાતુકામો હોતિ, સો ઉદ્દેસત્થાય વા પરિપુચ્છત્થાય વા ગતો, આગતમત્તે દાતબ્બં, અદાતું ન વટ્ટતિ. ચીવરે પન અપ્પહોન્તે, સતિયા વા પચ્ચાસાય અનુઞ્ઞાતકાલં ઠપેતું વટ્ટતિ. સૂચિસુત્તચીવરકારકાનં અલાભે તતોપિ વિનયકમ્મં કત્વા ઠપેતું વટ્ટતિ ‘‘ઇમસ્મિં જિણ્ણે પુન ઈદિસં કુતો લભિસ્સામી’’તિ પન ઠપેતું ન વટ્ટતિ, સન્નિધિ ચ હોતિ, સલ્લેખઞ્ચ કોપેતિ.

યાનસન્નિધિમ્હિ યાનં નામ વય્હં રથો સકટં સન્દમાનિકા પાટઙ્કીતિ. ન પનેતં પબ્બજિતસ્સ યાનં, ઉપાહનં પન યાનં. એકભિક્ખુસ્સ હિ એકો અરઞ્ઞવાસત્થાય, એકો ધોતપાદકત્થાયાતિ ઉક્કંસતો દ્વે ઉપાહનસઙ્ઘાટકા વટ્ટન્તિ, તતિયં લભિત્વા અઞ્ઞસ્સ દાતબ્બો. ‘‘ઇમસ્મિં જિણ્ણે અઞ્ઞં કુતો લભિસ્સામી’’તિ ઠપેતું ન વટ્ટતિ, સન્નિધિ ચ હોતિ, સલ્લેખઞ્ચ કોપેતિ. સયનસન્નિધિમ્હિ સયનન્તિ મઞ્ચો. એકસ્સ ભિક્ખુનો એકો સયનગબ્ભે, એકો દિવાટ્ઠાનેતિ ઉક્કંસતો દ્વે મઞ્ચા વટ્ટન્તિ. તતો ઉત્તરિં લભિત્વા અઞ્ઞસ્સ ભિક્ખુનો, ગણસ્સ વા દાતબ્બો, અદાતું ન વટ્ટતિ, સન્નિધિ ચેવ હોતિ, સલ્લેખો ચ કુપ્પતિ. ગન્ધસન્નિધિમ્હિ ભિક્ખુનો કણ્ડુકચ્છુછવિદોસાદિઆબાધે સતિ ગન્ધા વટ્ટન્તિ. ગન્ધત્થિકેન ગન્ધઞ્ચ આહરાપેત્વા તસ્મિં રોગે વૂપસન્તે અઞ્ઞેસં વા આબાધિકાનં દાતબ્બં, દ્વારે પઞ્ચઙ્ગુલિઘરધૂપનાદીસુ વા ઉપનેતબ્બં. ‘‘પુન રોગે સતિ ભવિસ્સતી’’તિ ઠપેતું ન વટ્ટતિ, ગન્ધસન્નિધિ ચ હોતિ, સલ્લેખઞ્ચ કોપેતિ.

આમિસન્તિ વુત્તાવસેસં દટ્ઠબ્બં. સેય્યથિદં – ઇધેકચ્ચો ભિક્ખુ ‘‘તથારૂપે કાલે ઉપકારાય ભવિસ્સન્તી’’તિ તિલતણ્ડુલમુગ્ગમાસનાળિકેરલોણમચ્છસપ્પિતેલકુલાલભાજનાદીનિ આહરાપેત્વા ઠપેતિ. સો વસ્સકાલે કાલસ્સેવ સામણેરેહિ યાગું પચાપેત્વા પરિભુઞ્જિત્વા ‘‘સામણેર ઉદકકદ્દમે દુક્ખં ગામં પવિસિતું, ગચ્છ અસુકકુલં ગન્ત્વા મય્હં વિહારે નિસિન્નભાવં આરોચેહિ, અસુકકુલતો દધિઆદીનિ આહરા’’તિ પેસેતિ. ભિક્ખૂહિ ‘‘કિં, ભન્તે, ગામં પવિસિસ્સામા’’તિ વુત્તેપિ ‘‘દુપ્પવેસો, આવુસો, ઇદાનિ ગામો’’તિ વદતિ. તે ‘‘હોતુ, ભન્તે, અચ્છથ તુમ્હે, મયં ભિક્ખં પરિયેસિત્વા આહરિસ્સામા’’તિ ગચ્છન્તિ. અથ સામણેરો દધિઆદીનિ આહરિત્વા ભત્તઞ્ચ બ્યઞ્જનઞ્ચ સમ્પાદેત્વા ઉપનેતિ, તં ભુઞ્જન્તસ્સેવ ઉપટ્ઠાકા ભત્તં પહિણન્તિ, તતોપિ મનાપમનાપં ભુઞ્જતિ. અથ ભિક્ખૂ પિણ્ડપાતં ગહેત્વા આગચ્છન્તિ, તતોપિ મનાપમનાપં ભુઞ્જતિયેવ. એવં ચતુમાસમ્પિ વીતિનામેતિ. અયં વુચ્ચતિ ભિક્ખુ મુણ્ડકુટુમ્બિકજીવિકં જીવતિ, ન સમણજીવિકન્તિ. એવરૂપો આમિસસન્નિધિ નામ હોતિ. ભિક્ખુનો પન વસનટ્ઠાને એકા તણ્ડુલનાળિ એકો ગુળપિણ્ડો કુડુવમત્તં સપ્પીતિ એત્તકં નિધેતું વટ્ટતિ અકાલે સમ્પત્તચોરાનં અત્થાય. તે હિ એત્તકં આમિસપટિસન્થારં અલભન્તા જીવિતા વોરોપેય્યું, તસ્મા સચે હિ એત્તકં નત્થિ, આહરાપેત્વાપિ ઠપેતું વટ્ટતિ. અફાસુકકાલે ચ યદેત્થ કપ્પિયં, તં અત્તનાપિ પરિભુઞ્જિતું વટ્ટતિ. કપ્પિયકુટિયં પન બહું ઠપેન્તસ્સપિ સન્નિધિ નામ નત્થિ.

ચતુત્થઅનાગતભયસુત્તવણ્ણના નિટ્ઠિતા.

યોધાજીવવગ્ગવણ્ણના નિટ્ઠિતા.