૧-૪. સારજ્જસુત્તાદિવણ્ણના

૧૦૧-૪. તતિયસ્સ પઠમે નત્થિ વત્તબ્બં. દુતિયે પિણ્ડપાતાદિઅત્થાય ઉપસઙ્કમિતું યુત્તટ્ઠાનં ગોચરો, વેસિયા ગોચરો અસ્સાતિ વેસિયાગોચરો, મિત્તસન્થવવસેન ઉપસઙ્કમિતબ્બટ્ઠાનન્તિ અત્થો. વેસિયા નામ રૂપૂપજીવિનિયો, તા મિત્તસન્થવવસેન ન ઉપસઙ્કમિતબ્બા સમણભાવસ્સ અન્તરાયકરત્તા, પરિસુદ્ધાસયસ્સપિ ગરહાહેતુતો, તસ્મા દક્ખિણાદાનવસેન સતિં ઉપટ્ઠપેત્વા ઉપસઙ્કમિતબ્બં. વિધવા વુચ્ચન્તિ મતપતિકા, પવુત્થપતિકા વા. થુલ્લકુમારિયોતિ મહલ્લિકા અનિવિદ્ધા કુમારિયો. પણ્ડકાતિ નપુંસકા. તે હિ ઉસ્સન્નકિલેસા અવૂપસન્તપરિળાહા લોકામિસનિસ્સિતકથાબહુલા, તસ્મા ન ઉપસઙ્કમિતબ્બા. ભિક્ખુનિયો નામ ઉસ્સન્નબ્રહ્મચરિયા. તથા ભિક્ખૂપિ. અઞ્ઞમઞ્ઞં વિસભાગવત્થુભાવતો સન્થવવસેન ઉપસઙ્કમને કતિપાહેનેવ બ્રહ્મચરિયન્તરાયો સિયા, તસ્મા ન ઉપસઙ્કમિતબ્બા, ગિલાનપુચ્છનાદિવસેન ઉપસઙ્કમને સતોકારિના ભવિતબ્બં. તતિયચતુત્થાનિ ઉત્તાનત્થાનેવ.

સારજ્જસુત્તાદિવણ્ણના નિટ્ઠિતા.