(૮) ૩. અપણ્ણકવગ્ગો

૧-૨. પધાનસુત્તાદિવણ્ણના

૭૧-૭૨. તતિયવગ્ગસ્સ પઠમે યવતિ તેન ફલં મિસ્સિતં વિય હોતીતિ યોનિ, એકન્તિકં કારણં. અસ્સાતિ યથાવુત્તસ્સ ભિક્ખુનો. પરિપુણ્ણન્તિ અવિકલં અનવસેસં. આસવે ખેપેતીતિ આસવક્ખયો, અગ્ગમગ્ગો. ઇધ પન અરહત્તફલં અધિપ્પેતન્તિ આહ ‘‘અરહત્તત્થાયા’’તિ. દુતિયં ઉત્તાનમેવ.

પધાનસુત્તાદિવણ્ણના નિટ્ઠિતા.

૩-૫. સપ્પુરિસસુત્તાદિવણ્ણના

૭૩-૭૫. તતિયે પઞ્હત્થાય અભિનીતોતિ પઞ્હકરણત્થાય અભિમુખં નીતો. અલમ્બિતં કત્વાતિ અલમ્બં કત્વા, અયમેવ વા પાઠો, વિપલમ્બં અકત્વાતિ અત્થો. અવજાનાતીતિ અવઞ્ઞં કરોતિ, નિન્દતીતિ અત્થો. ચતુત્થપઞ્ચમે નત્થિ વત્તબ્બં.

સપ્પુરિસસુત્તાદિવણ્ણના નિટ્ઠિતા.

૬. કુસિનારસુત્તવણ્ણના

૭૬. છટ્ઠે નગરં પવિસિતુકામા ઉય્યાનતો ઉપેચ્ચ વત્તન્તિ ગચ્છન્તિ એતેનાતિ ઉપવત્તનં. યથેવ હિ કલમ્બનદિતીરતો રાજમાતુવિહારદ્વારેન થૂપારામં ગન્તબ્બં હોતિ, એવં હિરઞ્ઞવતિકાય પારિમતીરતો સાલવનં ઉય્યાનં, યથા અનુરાધપુરસ્સ થૂપારામો દક્ખિણપચ્છિમદિસાય, એવં તં ઉય્યાનં કુસિનારાય દક્ખિણપચ્છિમદિસાય હોતિ. યથા થૂપારામતો દક્ખિણદ્વારેન નગરં પવિસનમગ્ગો પાચીનમુખો ગન્ત્વા ઉત્તરેન નિવત્તતિ, એવં ઉય્યાનતો સાલપન્તિ પાચીનમુખા ગન્ત્વા ઉત્તરેન નિવત્તા, તસ્મા તં ‘‘ઉપવત્તન’’ન્તિ વુચ્ચતિ. અન્તરેતિ દ્વિન્નં સાલરુક્ખાનં વેમજ્ઝે. તત્થ હિ પઞ્ઞાપિયમાનસ્સ મઞ્ચસ્સ એકા સાલપન્તિ સીસભાગે હોતિ, એકા પાદભાગે. તત્રપિ એકો તરુણસાલો સીસભાગસ્સ આસન્નો હોતિ, એકો પાદભાગસ્સ. અપિચ યમકસાલા નામ મૂલખન્ધવિટપપત્તેહિ અઞ્ઞમઞ્ઞં સંસિબ્બિત્વા ઠિતસાલાતિપિ વદન્તિ.

દ્વેળ્હકન્તિ દ્વિધાગાહો, અનેકંસગ્ગાહોતિ અત્થો. વિમતીતિ સંસયાપત્તીતિ આહ ‘‘વિનિચ્છિતું અસમત્થતા’’તિ. તં વો વદામીતિ તં સંસયવન્તં ભિક્ખું સન્ધાય વો તુમ્હે વદામીતિ. નિક્કઙ્ખભાવપચ્ચક્ખકરણન્તિ બુદ્ધાદીસુ તેસં ભિક્ખૂનં નિક્કઙ્ખભાવસ્સ પચ્ચક્ખકારિયા યાથાવતો તમત્થં પટિવિજ્ઝિત્વા ઠિતં સબ્બઞ્ઞુતઞ્ઞાણમેવ. એત્થાતિ એતસ્મિં અત્થે.

કુસિનારસુત્તવણ્ણના નિટ્ઠિતા.

૭. અચિન્તેય્યસુત્તવણ્ણના

૭૭. સત્તમે લોકચિન્તાતિ લોકસન્નિવેસપ્પટિસંયુત્તા વીમંસા. તેનાહ ‘‘કેન નુ ખો ચન્દિમસૂરિયા’’તિઆદિ. નાળિકેરાદયોતિ આદિ-સદ્દેન અવુત્તાનં ઓસધિતિણવનપ્પતિઆદીનં સઙ્ગહો. એવરૂપા લોકચિન્તાતિ એદિસા વુત્તસદિસા અઞ્ઞાપિ સા લોકચિન્તા.

અચિન્તેય્યસુત્તવણ્ણના નિટ્ઠિતા.

૮. દક્ખિણસુત્તવણ્ણના

૭૮. અટ્ઠમે દાનસઙ્ખાતાય દક્ખિણાયાતિ દેય્યધમ્મસઙ્ખાતાય દક્ખિણાય. વિસુદ્ધિ નામ મહાજુતિકતા. સા પન મહપ્ફલતાય વેદિતબ્બાતિ આહ ‘‘મહપ્ફલભાવેના’’તિ. વિસુજ્ઝતીતિ ન કિલિસ્સતિ, અમલિના મહાજુતિકા મહાવિપ્ફારા હોતીતિ અત્થો. સુચિધમ્મોતિ રાગાદિઅસુચિવિધમનેન સુચિસભાવો. લામકધમ્મોતિ હીનસભાવો પાપકિરિયાય. અકુસલધમ્મા હિ એકન્તનિહીના. જૂજકો સીલવા કલ્યાણધમ્મો ન હોતિ, તસ્સ મહાબોધિસત્તસ્સ અત્તનો પુત્તદાનં દાનપારમિયા મત્થકં ગણ્હન્તં મહાપથવિકમ્પનસમત્થં જાતં. સ્વાયં દાયકગુણોતિ આહ ‘‘વેસ્સન્તરમહારાજા કથેતબ્બો’’તિઆદિ. ઉદ્ધરતીતિ બહુલં પાપકમ્મવસેન લદ્ધબ્બવિનિપાતતો ઉદ્ધરતિ, તસ્મા નત્થિ મય્હં કિઞ્ચિ ચિત્તસ્સ અઞ્ઞત્થત્તન્તિ અધિપ્પાયો.

પેતદક્ખિણન્તિ પેતે ઉદ્દિસ્સ દાતબ્બદક્ખિણં. પાપિતકાલેયેવાતિ ‘‘ઇદં દાનં અસુકસ્સ પેતસ્સ હોતૂ’’તિ તંઉદ્દિસનવસેન પત્તિયા પાપિતકાલેયેવ. અસ્સાતિ પેતસ્સ. પાપુણીતિ ફલસમ્પત્તિલભાપનવસેન પાપુણિ. અયઞ્હિ પેતે ઉદ્દિસ્સ દાને ધમ્મતા. તદા કોસલરઞ્ઞો પરિચ્ચાગવસેન અતિવિય દાનજ્ઝાસયતં બુદ્ધપ્પમુખસ્સ ચ સઙ્ઘસ્સ ઉક્કંસગતગુણવિસિટ્ઠતં સન્ધાયાહ ‘‘અસદિસદાનં કથેતબ્બ’’ન્તિ.

દક્ખિણસુત્તવણ્ણના નિટ્ઠિતા.

૯-૧૦. વણિજ્જસુત્તાદિવણ્ણના

૭૯-૮૦. નવમે તંસદિસાતિ યાદિસા વણિજ્જા પયુત્તા અયથાધિપ્પાયા અઞ્ઞા વા સમ્પજ્જતિ, તાદિસાવાતિ અત્થો. છેદં ગચ્છતીતિ વિનાસં પાપુણાતિ. અધિપ્પાયતો પરા વિસિટ્ઠાતિ પરાધિપ્પાયો. તેનેવાહ ‘‘અજ્ઝાસયતો અધિકતરફલા હોતી’’તિ. ચીવરાદિના પચ્ચયેન વદેય્યાસીતિ ચીવરાદિપચ્ચયહેતુ મં વદેય્યાસિ પત્થેય્યાસિ. અથ વા યદા ચીવરાદિના પચ્ચયેન અત્થો હોતિ, તદા મં યાચેય્યાસીતિ અત્થો. સેસં સુવિઞ્ઞેય્યમેવ. દસમં ઉત્તાનમેવ.

વણિજ્જસુત્તાદિવણ્ણના નિટ્ઠિતા.

અપણ્ણકવગ્ગવણ્ણના નિટ્ઠિતા.