૮. વિસાખસુત્તવણ્ણના

૪૮. અટ્ઠમે વાક્કરણચાતુરિયતો વચનગુણહેતૂનં પૂરિયા પોરી, પોરિયં ભવાતિ પોરી, તાય પોરિયા. તેનાહ ‘‘પરિપુણ્ણવાચાયા’’તિ, અક્ખરપદપરિપુણ્ણાય વાચાયાતિ અત્થો. અપલિબુદ્ધાયાતિ પિત્તાદીહિ ન વિબદ્ધાય અનનુબુન્ધિતાય. અનેલગલાયાતિ અનેલાય અગલાય નિદ્દોસાય અગળિતપદબ્યઞ્જનાય ચ. થેરસ્સ હિ કથયતો પદં વા બ્યઞ્જનં વા ન પરિહાયતિ. તેનાહ ‘‘અનેલગલાયાતિ નિદ્દોસાય ચેવ અગળિતાય ચા’’તિઆદિ. તત્થ નિદ્દોસાયાતિ અત્થતો ચ બ્યઞ્જનતો ચ વિગતદોસાય. અપતિતપદબ્યઞ્જનાયાતિ અવિરહિતપદબ્યઞ્જનાય. અથ વા અનેલગલાયાતિ ન એલં દોસં ગલતીતિ અનેલગલા. અવિચ્છિન્નવાચાય અનેલગલાય યથા દન્ધમનુસ્સા મુખેન ખેળં ગળન્તેન વાચં ભાસન્તિ, ન એવરૂપાય. અથ ખો નિદ્દોસાય વિસદવાચાયાતિ અત્થો. વિવટ્ટપ્પકાસિની વાચા ન કદાચિ વિવટ્ટમુત્તાતિ કત્વા આહ ‘‘વિવટ્ટપરિયાપન્નાયા’’તિ, વિવટ્ટં અમુઞ્ચિત્વા પવત્તાયાતિ અત્થો. વિવટ્ટપ્પકાસિની હિ વાચા વિવટ્ટં પરિચ્છિજ્જ આપાદેન્તી પવત્તતિ. નવલોકુત્તરધમ્મો સબ્બધમ્મેહિ સમુસ્સિતટ્ઠેન અબ્ભુગ્ગતટ્ઠેન ચ ધજો નામાતિ આહ ‘‘અબ્ભુગ્ગતટ્ઠેના’’તિઆદિ. સેસમેત્થ સુવિઞ્ઞેય્યમેવ.

વિસાખસુત્તવણ્ણના નિટ્ઠિતા.