(૧૬) ૧. ઇન્દ્રિયવગ્ગો

૧-૫. ઇન્દ્રિયસુત્તાદિવણ્ણના

૧૫૧-૧૫૫. ચતુત્થસ્સ પઠમાદીનિ ઉત્તાનાનેવ.

ઇન્દ્રિયસુત્તાદિવણ્ણના નિટ્ઠિતા.

૬-૮. કપ્પસુત્તાદિવણ્ણના

૧૫૬-૧૫૮. છટ્ઠે સંવટ્ટનં વિનસ્સનં સંવટ્ટો, સંવટ્ટતો ઉદ્ધં તથા ઠાયી સંવટ્ટટ્ઠાયી. વિવટ્ટનં નિબ્બત્તનં, વડ્ઢનં વા વિવટ્ટો. ‘‘તેજોસંવટ્ટો, આપોસંવટ્ટો, વાયોસંવટ્ટોતિ એવં સંવટ્ટસીમાનુક્કમેન સંવટ્ટેસુ વત્તબ્બેસુ તથા અવત્વા આપોસંવટ્ટો, તેજોસંવટ્ટો, વાયોસંવટ્ટોતિ વચનં સંવટ્ટમહાભૂતદેસનાનુપુબ્બિયા’’તિ કેચિ. ‘‘ભાવીસંવટ્ટાનુપુબ્બિયા’’તિ અપરે. આપેન સંવટ્ટો આપોસંવટ્ટો. સંવટ્ટસીમાતિ સંવટ્ટનમરિયાદા. સંવટ્ટતીતિ વિનસ્સતિ. સદાતિ સબ્બકાલં, તીસુપિ સંવટ્ટકાલેસૂતિ અત્થો. એકં બુદ્ધક્ખેત્તં વિનસ્સતીતિ એત્થ બુદ્ધક્ખેત્તં નામ તિવિધં હોતિ જાતિક્ખેત્તં, આણાક્ખેત્તં, વિસયક્ખેત્તઞ્ચ.

તત્થ જાતિક્ખેત્તં દસસહસ્સચક્કવાળપરિયન્તં હોતિ, તથાગતસ્સ પટિસન્ધિગ્ગહણાદીસુ કમ્પતિ. આણાક્ખેત્તં કોટિસતસહસ્સચક્કવાળપરિયન્તં, યત્થ રતનસુત્તં (ખુ. પા. ૬.૧ આદયો; સુ. નિ. ૨૨૪ આદયો) ખન્ધપરિત્તં (અ. નિ. ૪.૬૭; ચૂળવ. ૨૫૧) ધજગ્ગપરિત્તં (સં. નિ. ૧.૨૪૯) આટાનાટિયપરિત્તં (દી. નિ. ૩.૨૭૭-૨૭૮) મોરપરિત્તન્તિ (જા. ૧.૨.૧૭-૧૮) ઇમેસં પરિત્તાનં આનુભાવો વત્તતિ. વિસયક્ખેત્તં અનન્તાપરિમાણં, યં ‘‘યાવતા વા પનાકઙ્ખેય્યા’’તિ (અ. નિ. ૩.૮૧) વુત્તં. તત્થ યં યં તથાગતો આકઙ્ખતિ, તં તં જાનાતિ. એવમેતેસુ તીસુ બુદ્ધક્ખેત્તેસુ એકં આણાક્ખેત્તં વિનસ્સતિ, તસ્મિં પન વિનસ્સન્તે જાતિક્ખેત્તં વિનટ્ઠમેવ હોતિ, વિનસ્સન્તઞ્ચ એકતોવ વિનસ્સતિ, સણ્ઠહન્તઞ્ચ એકતોવ સણ્ઠહતિ. સેસમેત્થ વિસુદ્ધિમગ્ગસંવણ્ણનાસુ (વિસુદ્ધિ. મહાટી. ૨.૪૦૪) વુત્તનયેનેવ ગહેતબ્બં. સત્તમટ્ઠમાનિ ઉત્તાનત્થાનેવ.

કપ્પસુત્તાદિવણ્ણના નિટ્ઠિતા.

૯. ભિક્ખુનીસુત્તવણ્ણના

૧૫૯. નવમે એવં પવત્તં પચ્ચુપ્પન્નતણ્હં નિસ્સાયાતિ ‘‘કુદાસ્સુ નામાહમ્પિ આસવાનં ખયા’’તિઆદિના નયેન અનુત્તરે વિમોક્ખે પિહં ઉપ્પાદેન્તસ્સ ઉપ્પન્નતણ્હં નિસ્સાય. કથં પન લોકુત્તરધમ્મે આરબ્ભ આસા ઉપ્પજ્જતીતિ? ન ખો પનેતં એવં દટ્ઠબ્બં, ન આરમ્મણકરણવસેન તત્થ પિહા પવત્તતિ અવિસયત્તા પુગ્ગલસ્સ ચ અનધિગતભાવતો. અનુસ્સવૂપલદ્ધે પન અનુત્તરવિમોક્ખે ઉદ્દિસ્સ પિહં ઉપ્પાદેન્તો તત્થ પિહં ઉપ્પાદેતિ નામ. નાકડ્ઢતીતિ કમ્મપથભાવં અપ્પત્તતાય પટિસન્ધિં ન દેતિ. સેસં સુવિઞ્ઞેય્યમેવ.

ભિક્ખુનીસુત્તવણ્ણના નિટ્ઠિતા.

૧૦. સુગતવિનયસુત્તવણ્ણના

૧૬૦. દસમે વળઞ્જેન્તીતિ સજ્ઝાયન્તિ ચેવ વાચુગ્ગતં કરોન્તા ધારેન્તિ ચ. અવિગતતણ્હતાય તં તં પરિક્ખારજાતં બહુમ્પિ આદિયન્તીતિ બહુલા, તે એવ બાહુલિકા યથા ‘‘વેનયિકો’’તિ (મ. નિ. ૧.૨૪૬; અ. નિ. ૮.૧૧; પારા. ૮). તે પન યસ્મા પચ્ચયબહુલભાવા યુત્તપ્પયુત્તા નામ હોન્તિ, તસ્મા આહ ‘‘પચ્ચયબાહુલ્લાય પટિપન્ના’’તિ. સિથિલં ગણ્હન્તીતિ સાથલિકા, સિક્ખાય આદરગારવાભાવેન સિથિલં અદળ્હં ગણ્હન્તીતિ અત્થો. સિથિલન્તિ ચ ભાવનપુંસકનિદ્દેસો, સિથિલ-સદ્દેન વા સમાનત્થસ્સ સાથલસદ્દસ્સ વસેન સાથલિકાતિ પદસિદ્ધિ વેદિતબ્બા. અવગમનતોતિ અધોગમનતો, ઓરમ્ભાગિયભાવતોતિ અત્થો. નિબ્બીરિયાતિ ઉજ્ઝિતુસ્સાહા તદધિગમાય આરમ્ભમ્પિ અકુરુમાના.

સુગતવિનયસુત્તવણ્ણના નિટ્ઠિતા.

ઇન્દ્રિયવગ્ગવણ્ણના નિટ્ઠિતા.