(૧૩) ૩. ભયવગ્ગો

૧. અત્તાનુવાદસુત્તવણ્ણના

૧૨૧. તતિયસ્સ પઠમે અત્તાનં અનુવદન્તસ્સ ઉપ્પજ્જનકભયન્તિ અત્તાનં અનુવદન્તસ્સ પાપકમ્મિનો ઉપ્પજ્જનકભયં. દ્વત્તિંસકમ્મકારણે પટિચ્ચ ઉપ્પજ્જનકભયન્તિ અગારિકાનં વસેન વુત્તં, અનગારિકાનં પન વિનયદણ્ડં પટિચ્ચ ઉપ્પજ્જનકભયમ્પિ દણ્ડભયન્તેવ સઙ્ખં ગચ્છતિ. સેસં સુવિઞ્ઞેય્યમેવ.

અત્તાનુવાદસુત્તવણ્ણના નિટ્ઠિતા.

૨. ઊમિભયસુત્તવણ્ણના

૧૨૨. દુતિયે કોધૂપાયાસસ્સેતં અધિવચનન્તિ એત્થ કુજ્ઝનટ્ઠેન કોધો, સ્વેવ ચિત્તસ્સ કાયસ્સ ચ અતિપ્પમદ્દનમથનુપ્પાદનેહિ દળ્હઆયાસટ્ઠેન ઉપાયાસો. અનેકવારં પવત્તિત્વા અત્તના સમવેતં સત્તં અજ્ઝોત્થરિત્વા સીસં ઉક્ખિપિતું અદત્વા ઊમિસદિસતા દટ્ઠબ્બા. યથા હિ બાહિરં ઉદકં ઓતિણ્ણો ઊમીસુ ઓસીદિત્વા મરતિ, એવં ઇમસ્મિં સાસને કોધૂપાયાસે ઓસીદિત્વા વિબ્ભમતિ, તસ્મા કોધૂપાયાસો ‘‘ઊમિભય’’ન્તિ વુત્તો. ઓદરિકત્તસ્સેતં અધિવચનન્તિ યથા હિ બાહિરં ઉદકં ઓતિણ્ણો કુમ્ભીલેન ખાદિતો મરતિ, એવં ઇમસ્મિં સાસને ઓદરિકત્તેન ઓદરિકભાવેન આમિસગેધેન મિચ્છાજીવેન જીવિકકપ્પનેન નાસિતસીલાદિગુણતાય ખાદિતધમ્મસરીરો વિબ્ભમતિ, તસ્મા ઓદરિકત્તં ‘‘કુમ્ભીલભય’’ન્તિ વુત્તં.

અનુપટ્ઠિતાય સતિયાતિ કાયગતં સતિં અનુટ્ઠાપેત્વા. અસંવુતેહીતિ અપિહિતેહિ. પઞ્ચન્નેતં કામગુણાનં અધિવચનન્તિ યથા હિ બાહિરં ઉદકં ઓતિણ્ણો આવટ્ટે નિમુજ્જિત્વા મરતિ, એવં ઇમસ્મિં સાસને પબ્બજિતો પઞ્ચકામગુણાવટ્ટે નિમુજ્જિત્વા વિબ્ભમતિ. કામરાગાભિભૂતો હિ સત્તો ઇતો ચ એત્તો, એત્તો ચ ઇતોતિ એવં મનાપિયરૂપાદિવિસયસઙ્ખાતે આવટ્ટે અત્તાનં સંસારેત્વા યથા તતો બહિભૂતે નેક્ખમ્મે ચિત્તમ્પિ ન ઉપ્પાદેતિ, એવં આવટ્ટેત્વા બ્યસનાપાદનેન કામગુણાનં આવટ્ટસદિસતા દટ્ઠબ્બા.

અનુદ્ધંસેતીતિ કિલમેતિ વિલોલતિ. રાગાનુદ્ધંસિતેનાતિ રાગેન અનુદ્ધંસિતેન. માતુગામસ્સેતં અધિવચનન્તિ. યથા હિ બાહિરં ઉદકં ઓતિણ્ણો ચણ્ડમચ્છં આગમ્મ લદ્ધપ્પહારો મરતિ, એવં ઇમસ્મિં સાસને માતુગામં આરબ્ભ ઉપ્પન્નકામરાગો વિબ્ભમતિ, તસ્મા માતુગામો ‘‘સુસુકાભય’’ન્તિ વુત્તો. માતુગામો હિ યોનિસોમનસિકારરહિતં અધીરપુરિસં ઇત્થિકુત્તભૂતેહિ અત્તનો હાસભાવવિલાસેહિ અભિભુય્ય ગહેત્વા ધીરજાતિકમ્પિ અત્તનો રૂપાદીહિ સમ્પલોભનવસેન અનવસેસં અત્તનો ઉપકારધમ્મે સીલાદિકે સમ્પાદેતું અસમત્થં કરોન્તો અનયબ્યસનં પાપેતિ.

ઇમાનિ પન ચત્તારિ ભયાનિ ભાયિત્વા યથા ઉદકં અનોરોહન્તસ્સ ઉદકં નિસ્સાય ઉદકપિપાસાવિનયનં સરીરસુદ્ધિપરિળાહૂપસમો કાયઉતુગ્ગાહાપનન્તિ, એવમાદિ આનિસંસો નત્થિ, એવમેવં ઇમાનિ ચત્તારિ ભયાનિ ભાયિત્વા સાસને અપબ્બજન્તસ્સપિ ઇમં સાસનં નિસ્સાય સઙ્ખેપતો વટ્ટદુક્ખૂપસમો, વિત્થારતો પન સીલાનિસંસાદિવસેન અનેકવિધો આનિસંસો નત્થિ. યથા પન ઇમાનિ ચત્તારિ ભયાનિ અભાયિત્વા ઉદકં ઓરોહન્તસ્સ વુત્તપ્પકારો આનિસંસો હોતિ, એવં ઇમાનિ અભાયિત્વા સાસને પબ્બજન્તસ્સપિ વુત્તપ્પકારો આનિસંસો હોતિ. મહાધમ્મરક્ખિતત્થેરો પનાહ ‘‘ચત્તારિ ભયાનિ ભાયિત્વા ઉદકં અનોતરન્તો સોતં છિન્દિત્વા પરતીરં પાપુણિતું ન સક્કોતિ, અભાયિત્વા ઓતરન્તો સક્કોતિ, એવમેવં ભાયિત્વા સાસને અપબ્બજન્તોપિ તણ્હાસોતં છિન્દિત્વા નિબ્બાનપારં દટ્ઠું ન સક્કોતિ, અભાયિત્વા પબ્બજન્તો સક્કોતી’’તિ.

ઊમિભયસુત્તવણ્ણના નિટ્ઠિતા.

૩. પઠમનાનાકરણસુત્તવણ્ણના

૧૨૩. તતિયે બ્રહ્મકાયિકાનં દેવાનન્તિ એત્થ બ્રહ્માનં કાયો સમૂહોતિ બ્રહ્મકાયો, તપ્પરિયાપન્નતાય તત્થ ગતાતિ બ્રહ્મકાયિકા. એતાય ચ સબ્બસ્સપિ બ્રહ્મકાયસ્સ સમઞ્ઞાય ભવિતબ્બં. આભસ્સરાનં દેવાનન્તિઆદિના પન દુતિયજ્ઝાનભૂમિકાદીનં ઉપરિ ગહિતત્તા ગોબલીબદ્દઞ્ઞાયેન તદવસિટ્ઠાનં અયં સમઞ્ઞા, તસ્મા ‘‘બ્રહ્મકાયિકાનં દેવાન’’ન્તિ પઠમજ્ઝાનભૂમિકાનંયેવ ગહણં વેદિતબ્બં. સહ બ્યયતિ ગચ્છતીતિ સહબ્યો, સહવત્તનકો. તસ્સ ભાવો સહબ્યતા, સહપવત્તીતિ આહ ‘‘સહભાવં ઉપગચ્છતી’’તિ. કપ્પો આયુપ્પમાણન્તિ એત્થ યદિપિ બ્રહ્મપારિસજ્જાદીનં આયુનો અન્તરં અત્થિ, ઉક્કટ્ઠપરિચ્છેદેન પનેતં વુત્તન્તિ દસ્સેન્તો ‘‘પઠમજ્ઝાનં અત્થિ હીન’’ન્તિઆદિમાહ.

દ્વે કપ્પા આયુપ્પમાણન્તિ એત્થ પન હીનજ્ઝાનેન નિબ્બત્તાનં વસેન અયં પરિચ્છેદો કતોતિ દસ્સેતું ‘‘દુતિયજ્ઝાનં વુત્તનયેનેવ તિવિધં હોતી’’તિઆદિ આરદ્ધં. ચત્તારો કપ્પાતિ એત્થ પન ઉક્કટ્ઠપરિચ્છેદેન ચતુસટ્ઠિ કપ્પા વત્તબ્બાતિ દસ્સેન્તો ‘‘યં હેટ્ઠા વુત્તં ‘કપ્પો દ્વે કપ્પા’તિ, કમ્પિ આહરિત્વા અત્થો વેદિતબ્બો’’તિ આહ. કથં પનેત્થ અયમત્થો લબ્ભતીતિ આહ ‘‘કપ્પોતિ ચ ગુણસ્સપિ નામ’’ન્તિ. તત્થ પઠમં વુત્તો કપ્પો, તતો એકેન ગુણેન, એકસ્મિં વારે ગણનાયાતિ અત્થો. દ્વે કપ્પા હોન્તીતિ એકવારગણનાય કપ્પસ્સ દ્વિગુણિતત્તા દ્વે મહાકપ્પા હોન્તીતિ અત્થો. દુતિયેનાતિ દુતિયવારગણનાય. ચત્તારોતિ દુતિયવારગણનાય દ્વીસુ કપ્પેસુ દ્વિગુણિતેસુ ચત્તારો મહાકપ્પા હોન્તીતિ અત્થો. પુન તે ચત્તારો કપ્પાતિ વુત્તનયેન દ્વે વારે ગુણેત્વા યે ચત્તારો કપ્પા દસ્સિતા, પુન તે ચત્તારો કપ્પા ચતુગ્ગુણા હોન્તીતિ અત્થો. ઇદં વુત્તં હોતિ – દ્વે વારે ગુણેત્વા યે ચત્તારો કપ્પા દસ્સિતા, તેસુ ચતુક્ખત્તું ગુણિતેસુ ચતુસટ્ઠિ કપ્પા સમ્પજ્જન્તીતિ. તથા હિ ચત્તારો એકસ્મિં વારે ગુણિતા અટ્ઠ હોન્તિ, પુન તે અટ્ઠ દુતિયવારે ગુણિતા સોળસ હોન્તિ, પુન તે સોળસ તતિયવારે ગુણિતા દ્વત્તિંસ હોન્તિ, પુન તે દ્વત્તિંસ ચતુત્થવારે ગુણિતા ચતુસટ્ઠિ હોન્તિ. તેનેવાહ ‘‘ઇમેહિ ચતૂહિ ગુણેહિ ગુણિતા એકેન ગુણેન અટ્ઠ હોન્તી’’તિઆદિ. એત્થ ચ હેટ્ઠા ઉપોસથસુત્તે (અ. નિ. ૩.૭૧) –

‘‘યાનિ માનુસકાનિ પઞ્ઞાસ વસ્સાનિ, ચાતુમહારાજિકાનં દેવાનં એસો એકો રત્તિન્દિવો’’તિ –

આદિના કામાવચરદેવાનમેવ આયુપ્પમાણં દસ્સિતં. હેટ્ઠાયેવ –

‘‘તયોમે, ભિક્ખવે, પુગ્ગલા સન્તો સંવિજ્જમાના લોકસ્મિં. કતમે તયો? ઇધ, ભિક્ખવે, એકચ્ચો પુગ્ગલો સબ્બસો રૂપસઞ્ઞાનં સમતિક્કમા…પે… આકાસાનઞ્ચાયતનૂપગાનં દેવાનં સહબ્યતં ઉપપજ્જતિ. આકાસાનઞ્ચાયતનૂપગાનં, ભિક્ખવે, દેવાનં વીસતિ કપ્પસહસ્સાનિ આયુપ્પમાણ’’ન્તિ (અ. નિ. ૩.૧૧૭) –

આદિના અરૂપાવચરાનંયેવ આયુપ્પમાણં વુત્તં. ઇધ પન રૂપાવચરાનમેવ આયુપ્પમાણં દસ્સિતં. વિભઙ્ગપાળિયં (વિભ. ૧૦૨૨) પન ‘‘મનુસ્સાનં કિત્તકં આયુપ્પમાણં, વસ્સસતં અપ્પં વા ભિય્યો’’તિઆદિના દેવમનુસ્સાનઞ્ચેવ રૂપારૂપાવચરસત્તાનઞ્ચ આયુપ્પમાણં દસ્સિતં.

તત્થ સમ્માસમ્બુદ્ધેન મનુસ્સાનં દેવાનઞ્ચ આયું પરિચ્છિન્દમાનેન ચતૂસુ અપાયેસુ ભુમ્મદેવેસુ ચ આયુ ન પરિચ્છિન્નં. તં કસ્માતિ? નિરયે તાવ કમ્મમેવ પમાણં. યાવ કમ્મં ન ખીયતિ, તાવ પચ્ચન્તિ. તથા સેસઅપાયેસુ. ભુમ્મદેવાનમ્પિ કમ્મમેવ પમાણં. તત્થ નિબ્બત્તા હિ કેચિ સત્તાહમત્તં તિટ્ઠન્તિ, કેચિ અડ્ઢમાસં, કપ્પં તિટ્ઠમાનાપિ અત્થિયેવ. તત્થ મનુસ્સેસુ ગિહિભાવે ઠિતાયેવ સોતાપન્નાપિ હોન્તિ, સકદાગામિફલં અનાગામિફલં અરહત્તમ્પિ પાપુણન્તિ, તેસુ સોતાપન્નાદયો યાવજીવં તિટ્ઠન્તિ, ખીણાસવા પન પરિનિબ્બાયન્તિ વા પબ્બજન્તિ વા. કસ્મા? અરહત્તં નામ સેટ્ઠગુણં, ગિહિલિઙ્ગં હીનં, તં હીનતાય ઉત્તમં ગુણં ધારેતું ન સક્કોતિ, તસ્મા તે પરિનિબ્બાતુકામા વા હોન્તિ પબ્બજિતુકામા વા. ભુમ્મદેવા પન અરહત્તં પત્તાપિ યાવજીવં તિટ્ઠન્તિ, છસુ કામાવચરેસુ દેવેસુ સોતાપન્નસકદાગામિનો યાવજીવં તિટ્ઠન્તિ, અનાગામિના રૂપભવં ગન્તું વટ્ટતિ ખીણાસવેન પરિનિબ્બાતું. કસ્મા? નિલીયનોકાસસ્સ અભાવા. રૂપાવચરારૂપાવચરેસુ સબ્બેપિ યાવજીવં તિટ્ઠન્તિ, તત્થ રૂપાવચરે નિબ્બત્તા સોતાપન્નસકદાગામિનો ન પુન ઇધાગચ્છન્તિ, તત્થેવ પરિનિબ્બાયન્તિ. એતે હિ ઝાનઅનાગામિનો નામ.

અટ્ઠસમાપત્તિલાભીનં પન કિં નિયમેતિ? પગુણજ્ઝાનં. યદેવસ્સ પગુણં હોતિ, તેન ઉપપજ્જતિ. સબ્બેસુ પગુણેસુ કિં નિયમેતિ? નેવસઞ્ઞાનાસઞ્ઞાયતનસમાપત્તિ. એકંસેનેવ હિ સો નેવસઞ્ઞાનાસઞ્ઞાયતને ઉપપજ્જતિ. નવસુ બ્રહ્મલોકેસુ નિબ્બત્તઅરિયસાવકાનં તત્રૂપપત્તિપિ ઉપરૂપપત્તિપિ, ન હેટ્ઠૂપપત્તિ. પુથુજ્જનાનં પન તત્રૂપપત્તિપિ હોતિ, ઉપરૂપપત્તિપિ, હેટ્ઠૂપપત્તિપિ. પઞ્ચસુ સુદ્ધાવાસેસુ ચતૂસુ ચ અરૂપેસુ અરિયસાવકાનં તત્રૂપપત્તિપિ હોતિ ઉપરૂપપત્તિપિ. પઠમજ્ઝાનભૂમિયં નિબ્બત્તો અનાગામી નવ બ્રહ્મલોકે સોધેત્વા મત્થકે ઠિતો પરિનિબ્બાતિ. વેહપ્ફલં, અકનિટ્ઠં, નેવસઞ્ઞાનાસઞ્ઞાયતનન્તિ ઇમે તયો દેવલોકા સેટ્ઠભવા નામ. ઇમેસુ તીસુ ઠાનેસુ નિબ્બત્તઅનાગામિનો નેવ ઉદ્ધં ગચ્છન્તિ, ન અધો, તત્થ તત્થેવ પરિનિબ્બાયન્તીતિ ઇદં પકિણ્ણકં વેદિતબ્બં.

પઠમનાનાકરણસુત્તવણ્ણના નિટ્ઠિતા.

૪-૬. દુતિયનાનાકરણસુત્તાદિવણ્ણના

૧૨૪-૬. ચતુત્થે તે ધમ્મેતિ તે ‘‘રૂપગત’’ન્તિઆદિના નયેન વુત્તે રૂપાદયો ધમ્મે. અનિચ્ચતોતિ ઇમિના નિચ્ચપ્પટિક્ખેપતો તેસં અનિચ્ચતમાહ, તતો એવ ચ ઉદયવયવન્તતો વિપરિણામતો તાવકાલિકતો ચ તે અનિચ્ચાતિ જોતિતં હોતિ. યઞ્હિ નિબ્બત્તં હોતિ, તં ઉદયવયપરિચ્છિન્નં. જરાય મરણેન ચ તદેવ વિપરીતં, ઇત્તરક્ખણમેવ ચ હોતીતિ. દુક્ખતોતિ ઇમિના સુખપ્પટિક્ખેપતો તેસં દુક્ખતમાહ. તતો એવ ચ અભિણ્હપ્પટિપીળનતો દુક્ખવત્થુતો ચ તે દુક્ખાતિ જોતિતં હોતિ. ઉદયવયવન્તતાય હિ તે અભિણ્હપ્પટિપીળનતો નિરન્તરદુક્ખતાય દુક્ખસ્સેવ ચ અધિટ્ઠાનભૂતા. પચ્ચયયાપનીયતાય રોગમૂલતાય ચ રોગતો. દુક્ખતાસૂલયોગતો કિલેસાસુચિપગ્ઘરણતો ઉપ્પાદજરાભઙ્ગેહિ ઉદ્ધુમાતપરિપક્કપભિન્નતો ચ ગણ્ડતો. પીળાજનનતો, અન્તોતુદનતો, દુન્નીહરણતો ચ સલ્લતો. અવડ્ઢિઆવહનતો અઘવત્થુતો ચ અઘતો. અસેરિભાવજનનતો આબાધપદટ્ઠાનતાય ચ આબાધતો. અવસવત્તનતો અવિધેય્યતાય ચ પરતો. બ્યાધિજરામરણેહિ પલુજ્જનીયતાય પલોકતો. સામિનિવાસિકારકવેદકઅધિટ્ઠાયકવિરહતો સુઞ્ઞતો. અત્તપ્પટિક્ખેપટ્ઠેન અનત્તતો. રૂપાદિધમ્મા હિ ન એત્થ અત્તા અત્થીતિ અનત્તા. એવં સયમ્પિ અત્તા ન હોન્તીતિ અનત્તા. તેન અબ્યાપારતો નિરીહતો તુચ્છતો અનત્તાતિ દીપિતં હોતિ. લક્ખણત્તયમેવ સુખાવબોધનત્થં એકાદસહિ પદેહિ વિભજિત્વા ગહિતન્તિ દસ્સેતું ‘‘તત્થા’’તિઆદિ વુત્તં. પઞ્ચમછટ્ઠાનિ ઉત્તાનત્થાનેવ.

દુતિયનાનાકરણસુત્તાદિવણ્ણના નિટ્ઠિતા.

૭. પઠમતથાગતઅચ્છરિયસુત્તવણ્ણના

૧૨૭. સત્તમે વત્તમાનસમીપે વત્તમાને વિય વોહરિતબ્બન્તિ ‘‘ઓક્કમતી’’તિ આહ ‘‘ઓક્કન્તો હોતીતિ અત્થો’’તિ. દસસહસ્સચક્કવાળપત્થરણો સમુજ્જલભાવેન ઉળારો. દેવાનુભાવન્તિ દેવાનં પભાનુભાવં. દેવાનઞ્હિ પભં સો ઓભાસો અધિભવતિ, ન દેવે. તેનાહ ‘‘દેવાન’’ન્તિઆદિ. રુક્ખગચ્છાદિના કેનચિ ન હઞ્ઞતીતિ અઘા, અસમ્બાધા. તેનાહ ‘‘નિચ્ચવિવરા’’તિ. અસંવુતાતિ હેટ્ઠા ઉપરિ કેનચિ અપિહિતા. તેનાહ ‘‘હેટ્ઠાપિ અપ્પતિટ્ઠા’’તિ. તત્થ પિ-સદ્દેન યથા હેટ્ઠા ઉદકસ્સ પિધાયિકા સન્ધારિકા પથવી નત્થિ અસંવુતા લોકન્તરિકા, એવં ઉપરિપિ ચક્કવાળેસુ દેવવિમાનાનં અભાવતો અસંવુતા અપ્પતિટ્ઠાતિ દસ્સેતિ. અન્ધકારો એત્થ અત્થીતિ અન્ધકારા. ચક્ખુવિઞ્ઞાણં ન જાયતિ આલોકસ્સ અભાવતો, ન ચક્ખુનો. તથા હિ ‘‘તેનોભાસેન અઞ્ઞમઞ્ઞં સઞ્જાનન્તી’’તિ વુત્તં. જમ્બુદીપે ઠિતમજ્ઝન્હિકવેલાય પુબ્બવિદેહવાસીનં અત્થઙ્ગમવસેન ઉપડ્ઢં સૂરિયમણ્ડલં પઞ્ઞાયતિ, અપરગોયાનવાસીનં ઉગ્ગમનવસેન. એવં સેસદીપેસુપીતિ આહ ‘‘એકપ્પહારેનેવ તીસુ દીપેસુ પઞ્ઞાયન્તી’’તિ. ઇતો અઞ્ઞથા દ્વીસુ એવ દીપેસુ પઞ્ઞાયન્તિ. એકેકાય દિસાય નવનવયોજનસતસહસ્સાનિ અન્ધકારવિધમનમ્પિ ઇમિનાવ નયેન દટ્ઠબ્બં. પભાય નપ્પહોન્તીતિ અત્તનો પભાય ઓભાસિતું નાભિસમ્ભુણન્તિ. યુગન્ધરપબ્બતમત્થકસમપ્પમાણે આકાસે વિચરણતો ‘‘ચક્કવાળપબ્બતસ્સ વેમજ્ઝેન ચરન્તી’’તિ વુત્તં.

બ્યાવટાતિ ખાદનત્થં ગણ્હિતું ઉપક્કમન્તા. વિપરિવત્તિત્વાતિ વિવટ્ટિત્વા. છિજ્જિત્વાતિ મુચ્છાપવત્તિયા ઠિતટ્ઠાનતો મુચ્ચિત્વા, અઙ્ગપચ્ચઙ્ગછેદનવસેન વા છિજ્જિત્વા. અચ્ચન્તખારેતિ આતપસન્તપાભાવેન અતિસીતભાવં સન્ધાય અચ્ચન્તખારતા વુત્તા સિયા. ન હિ તં કપ્પસણ્ઠાનઉદકં સમ્પત્તિકરમહામેઘવુટ્ઠં પથવિસન્ધારકં કપ્પવિનાસકઉદકં વિય ખારં ભવિતુમરહતિ, તથા સતિ પથવીપિ વિલીયેય્ય, તેસં વા પાપકમ્મફલેન પેતાનં પકતિઉદકસ્સ પુબ્બખેળભાવાપત્તિ વિય તસ્સ ઉદકસ્સ ખારભાવાપત્તિ હોતીતિ વુત્તં ‘‘અચ્ચન્તખારે ઉદકે’’તિ.

પઠમતથાગતઅચ્છરિયસુત્તવણ્ણના નિટ્ઠિતા.

૮. દુતિયતથાગતઅચ્છરિયસુત્તવણ્ણના

૧૨૮. અટ્ઠમે આલીયન્તિ આરમિતબ્બટ્ઠેન સેવીયન્તીતિ આલયા, પઞ્ચ કામગુણા. આરમન્તીતિ રતિં વિન્દન્તિ કીળન્તિ લળન્તિ. આલીયન્તિ વા અલ્લીયન્તા અભિરમણવસેન સેવન્તીતિ આલયા, તણ્હાવિચરિતાનિ. તેહિ આલયેહિ રમન્તીતિ આલયારામા. યથેવ હિ સુસજ્જિતં પુપ્ફફલભરિતરુક્ખાદિસમ્પન્નઉય્યાનં પવિટ્ઠો રાજા તાય સમ્પત્તિયા રમતિ, સમ્મુદિતો આમોદિતપ્પમોદિતો હોતિ, ન ઉક્કણ્ઠેતિ, સાયમ્પિ નિક્ખમિતું ન ઇચ્છતિ, એવમિમેહિ કામાલયતણ્હાલયેહિ સત્તા રમન્તિ, સંસારવટ્ટે પમુદિતા અનુક્કણ્ઠિતા વસન્તિ. તેન તેસં ભગવા દુવિધમ્પિ આલયં ઉય્યાનભૂમિં વિય દસ્સેન્તો ‘‘આલયારામા’’તિઆદિમાહ. સેસમેત્થ ઉત્તાનમેવ.

દુતિયતથાગતઅચ્છરિયસુત્તવણ્ણના નિટ્ઠિતા.

૯-૧૦. આનન્દઅચ્છરિયસુત્તાદિવણ્ણના

૧૨૯-૧૩૦. નવમે પટિસન્થારધમ્મન્તિ પકતિચારિત્તવસેન વુત્તં, ઉપગતાનં પન ભિક્ખૂનં ભિક્ખુનીનઞ્ચ પુચ્છાવિસ્સજ્જનવસેન ચેવ ચિત્તરુચિવસેન ચ યથાકાલં ધમ્મં દેસેતિયેવ, ઉપાસકઉપાસિકાનં પન ઉપનિસિન્નકકથાવસેન. દસમં ઉત્તાનમેવ.

આનન્દઅચ્છરિયસુત્તાદિવણ્ણના નિટ્ઠિતા.

ભયવગ્ગવણ્ણના નિટ્ઠિતા.