(૧૦) ૫. અસુરવગ્ગો
૧-૨. અસુરસુત્તાદિવણ્ણના
૯૧-૯૨. પઞ્ચમસ્સ પઠમદુતિયાનિ ઉત્તાનત્થાનેવ.
અસુરસુત્તાદિવણ્ણના નિટ્ઠિતા.
૩. દુતિયસમાધિસુત્તવણ્ણના
૯૩. તતિયે અપ્પટિવાનીતિ ભાવપ્પધાનો નિદ્દેસોતિ આહ ‘‘અનિવત્તનતા’’તિ. ‘‘અપ્પટિવાનિતા’’તિ વત્તબ્બે ‘‘અપ્પટિવાની’’તિ વુત્તં. તથા હિ વીરિયપ્પવાહે વત્તમાને અન્તરા એવ પટિગમનં નિવત્તનં પટિવાનં, તં અસ્સ અત્થીતિ પટિવાની, ન પટિવાની અપ્પટિવાની, તસ્સ ભાવો અપ્પટિવાનિતા, અનિવત્તનાતિ અત્થો. અપ્પટિવાનીતિ વા ઇત્થિલિઙ્ગવસેનેવાયં નિદ્દેસો. અન્તરાયેવ પટિગમનં નિવત્તનં પટિવાની, ન પટિવાની અપ્પટિવાની, અનિવત્તનાતિ અત્થો.
દુતિયસમાધિસુત્તવણ્ણના નિટ્ઠિતા.
૪. તતિયસમાધિસુત્તવણ્ણના
૯૪. ચતુત્થે સણ્ઠપેતબ્બન્તિ સમ્મદેવ ઠપેતબ્બં. યથા પન ઠપિતં સણ્ઠપિતં હોતિ, તં દસ્સેતું ‘‘સન્નિસાદેતબ્બ’’ન્તિઆદિ વુત્તં. તત્થ સન્નિસાદેતબ્બન્તિ સમાધિપ્પટિપક્ખે કિલેસે સન્નિસીદાપેન્તેન ચિત્તં ગોચરજ્ઝત્તે સન્નિસીદાપેતબ્બન્તિ. એકોદિ કાતબ્બન્તિ અબ્યગ્ગભાવાપાદનેન એકગ્ગં કાતબ્બં. સમાદહિતબ્બન્તિ યથા આરમ્મણે સુટ્ઠુ અપ્પિતં હોતિ, એવં સમ્મા સમ્મદેવ આદહિતબ્બં, સુટ્ઠુ આરોપેતબ્બં સમાહિતં કાતબ્બન્તિ અત્થો.
તતિયસમાધિસુત્તવણ્ણના નિટ્ઠિતા.
૫-૬. છવાલાતસુત્તાદિવણ્ણના
૯૫-૯૬. પઞ્ચમે છવાલાતન્તિ છવાનં દડ્ઢટ્ઠાને અલાતં. તેનેવાહ ‘‘સુસાને અલાત’’ન્તિ. મજ્ઝટ્ઠાને ગૂથમક્ખિતન્તિ પમાણેન અટ્ઠઙ્ગુલમત્તં દ્વીસુ ઠાનેસુ આદિત્તં મજ્ઝે ગૂથમક્ખિતં. કટ્ઠત્થન્તિ કટ્ઠેન કાતબ્બકિચ્ચં. સેસમેત્થ ઉત્તાનમેવ. છટ્ઠં ઉત્તાનમેવ.
છવાલાતસુત્તાદિવણ્ણના નિટ્ઠિતા.
૭-૧૦. ખિપ્પનિસન્તિસુત્તાદિવણ્ણના
૯૭-૧૦૦. સત્તમે ખિપ્પનિસન્તીતિ ખિપ્પપઞ્ઞો. તેનાહ ‘‘ખિપ્પનિસામનો’’તિઆદિ. અનુરૂપધમ્મન્તિ લોકુત્તરાધિગમસ્સ અનુચ્છવિકસભાવં. કલ્યાણા સુન્દરા પરિમણ્ડલપદબ્યઞ્જના વાચા અસ્સાતિ કલ્યાણવાચો. તેનાહ ‘‘સુન્દરવચનો’’તિ. કલ્યાણં મધુરં વાક્કરણં ઉદાહારઘોસો અસ્સાતિ કલ્યાણવાક્કરણો. ગુણપરિપુણ્ણભાવેન પૂરે પુણ્ણભાવે ભવાતિ પોરી, તાય પોરિયા. તેનાહ ‘‘ગુણપરિપુણ્ણાયા’’તિ. પુરે ભવત્તા પોરિયા નાગરિકિત્થિયા સુખુમાલત્તનેન સદિસાતિ પોરી, તાય પોરિયા. ‘‘સુખુમાલત્તનેના’’તિ ઇમિના તસ્સા વાચાય મુદુસણ્હભાવો વુત્તો. અપલિબુદ્ધાયાતિ પિત્તસેમ્હાદીહિ ન પલિવેઠિતાય. અદોસાયાતિ સન્દિદ્ધવિલમ્બિતાદિદોસરહિતાય અગળિતપદબ્યઞ્જનાયાતિ અપતિતપદબ્યઞ્જનાય અવિરહિતપદબ્યઞ્જનાય. ઉભયમેતં અનેલગલાયાતિ ઇમસ્સેવ અત્થવચનં. અનેલગલાયાતિ હિ અનેલાય ચેવ અગલાય ચાતિ અત્થો. અત્થં વિઞ્ઞાપેતું સમત્થાયાતિ આદિમજ્ઝપરિયોસાનં પાકટં કત્વા ભાસિતત્થસ્સ વિઞ્ઞાપનસત્થાય. અટ્ઠમનવમદસમાનિ ઉત્તાનત્થાનેવ.
ખિપ્પનિસન્તિસુત્તાદિવણ્ણના નિટ્ઠિતા.
અસુરવગ્ગવણ્ણના નિટ્ઠિતા.
દુતિયપણ્ણાસકં નિટ્ઠિતં.