૭. પુત્તસુત્તવણ્ણના

૮૭. સત્તમે મ-કારો પદસન્ધિકરો ‘‘અઞ્ઞમઞ્ઞ’’ન્તિઆદીસુ વિય. નિચ્ચલસમણોતિ થિરસમણો. અભિસિઞ્ચિતબ્બોતિ અભિસેકોતિ કમ્મસાધનો અભિસેકસદ્દો. તેનાહ ‘‘અભિસેકં કાતું યુત્તો’’તિ.

બાકુલત્થેરો વિયાતિ થેરો હિ મહાયસસ્સી, તસ્સ પુત્તધીતરો નત્તુપનત્તકા સુખુમસાટકેહિ ચીવરાનિ કારેત્વા રજાપેત્વા સમુગ્ગે પક્ખિપિત્વા પહિણન્તિ. થેરસ્સ નહાનકાલે નહાનકોટ્ઠકે ઠપેન્તિ. થેરો તાનિ નિવાસેતિ ચેવ પારુપતિ ચ. તેનેવેતં વુત્તં.

ખદિરવનમગ્ગે સીવલિત્થેરો વિયાતિ સત્થરિ કિર તં મગ્ગં પટિપન્ને દેવતા ‘‘અમ્હાકં અય્યસ્સ સીવલિત્થેરસ્સ સક્કારં કરિસ્સામા’’તિ ચિન્તેત્વા એકેકયોજને વિહારં કારેત્વા એકયોજનતો ઉદ્ધં ગન્તું અદત્વા પાતોવ ઉટ્ઠાય દિબ્બાનિ યાગુઆદીનિ ગહેત્વા ‘‘અમ્હાકં અય્યો સીવલિત્થેરો કહં નિસિન્નો’’તિ વિચરન્તિ. થેરો અત્તનો અભિહટં બુદ્ધપ્પમુખસ્સ ભિક્ખુસઙ્ઘસ્સ દાપેસિ. એવં સત્થા સપરિવારો તિંસયોજનિકં કન્તારં સીવલિત્થેરસ્સ પુઞ્ઞફલં અનુભવમાનોવ અગમાસિ. તેનેવેતં વુત્તં.

અટ્ઠકનાગરસુત્તે આનન્દત્થેરો વિયાતિ અટ્ઠકનાગરકો કિર ગહપતિ થેરસ્સ ધમ્મદેસનાય પસીદિત્વા પઞ્ચસતગ્ઘનકં વિહારં કારેત્વા અદાસિ. તં સન્ધાયેતં વુત્તં.

પિલિન્દવચ્છત્થેરો વિયાતિ થેરસ્સ કિર ઇદ્ધાનુભાવેન પસન્ના મનુસ્સા સપ્પિઆદીનિ બહૂનિ ભેસજ્જાનિ અભિહરિંસુ. પકતિયાપિ ચ આયસ્મા પિલિન્દવચ્છો લાભી હોતિ પઞ્ચન્નં ભેસજ્જાનં, લદ્ધં લદ્ધં પરિસાય વિસ્સજ્જેતિ. તેનેતં વુત્તં ‘‘ગિલાનપચ્ચયં પિલિન્દવચ્છત્થેરો વિયા’’તિ.

તિણ્ણમ્પિ સન્નિપાતેન નિબ્બત્તાનીતિ પિત્તાદીનં તિણ્ણમ્પિ વિસમાનં સન્નિપાતેન જાતાનિ. અતિસીતાદિભાવેન ઉતૂનં પરિણામોતિ આહ ‘‘અતિસીતઅતિઉણ્હઉતુતો જાતાની’’તિ. પુરિમઉતુતો વિસદિસો ઉતુ ઉતુપરિણામો, તતો જાતાનિ ઉતુપરિણામજાનિ, વિસભાગઉતુતો જાતાનીતિ અત્થો. જઙ્ગલદેસવાસીનઞ્હિ અનૂપદેસે વસન્તાનં વિસભાગોવ ઉતુ ઉપ્પજ્જતિ, અનૂપદેસવાસીનઞ્ચ જઙ્ગલદેસેતિ. એવં મલયસમુદ્દતીરાદિવસેનપિ ઉતુવિસભાગતા ઉપ્પજ્જતિયેવ. તતો જાતાનિ ઉતુપરિણામજાનિ નામ.

અત્તનો પકતિચરિયાનં વિસમં કાયસ્સ પરિહરણવસેન વિસમપરિહારજાનિ. તાનિ પન અચ્ચાસનઅતિટ્ઠાનાદિના વેદિતબ્બાનીતિ આહ ‘‘અચ્ચાસનઅતિટ્ઠાનાદિકા’’તિ. આદિ-સદ્દેન મહાભારવહણસુધાકોટ્ટનઅદેસકાલચરણાદીનિ સઙ્ગણ્હાતિ. પરસ્સ ઉપક્કમતો નિબ્બત્તાનિ ઓપક્કમિકાનિ, અયં ચોરોતિ વા પારદારિકોતિ વા ગહેત્વા જણ્ણુકકપ્પરમુગ્ગરાદીહિ નિપ્પોથનઉપક્કમં પચ્ચયં કત્વા ઉપ્પન્નાનીતિ અત્થો. તેનાહ ‘‘વધબન્ધનાદિઉપક્કમેન નિબ્બત્તાની’’તિ. કેવલન્તિ બાહિરં પચ્ચયં અનપેક્ખિત્વા કેવલં, તેન વિનાતિ અત્થો. તેનાહ ‘‘પુબ્બેકતકમ્મવિપાકવસેનેવ જાતાની’’તિ.

પુત્તસુત્તવણ્ણના નિટ્ઠિતા.