૪. વીથિપરિકમ્મકથા

૧૨૬. પઠમાવજ્જનં પઞ્ચ-દસન્નં પરતો ભવે;

દુતિયાવજ્જનં હોતિ, એકવીસતિતો પરં.

૧૨૭. એકમ્હા પઞ્ચવિઞ્ઞાણં, પઞ્ચમ્હા સમ્પટિચ્છનં;

સુખસન્તીરણં હોતિ, પઞ્ચવીસતિતો પરં.

૧૨૮. સત્તતિંસતિતો હોતિ, ઉપેક્ખાતીરણદ્વયં;

વોટ્ઠબ્બનસરૂપાનં, દ્વિન્નં કામજવા પરં.

૧૨૯. મગ્ગાભિઞ્ઞા પરં દ્વિન્નં, તિણ્ણન્નં લોકિયપ્પના;

ફલા ચતુન્નં પઞ્ચન્નં, ઉપરિટ્ઠફલદ્વયં.

૧૩૦. ભવન્તિ ચત્તાલીસમ્હા, સુખપાકા દ્વિહેતુકા;

તથેકચત્તાલીસમ્હા, ઉપેક્ખાય સમાયુતા.

૧૩૧. હોન્તિ સત્તતિતો કામે, સુખપાકા તિહેતુકા;

દ્વાસત્તતિમ્હા જાયન્તિ, ઉપેક્ખાસહિતા પન.

૧૩૨. એકૂનસટ્ઠિતો રૂપ-પાકા પાકા અરૂપિનો;

કમાટ્ઠચત્તાલીસમ્હા, તથેકદ્વિતિહીનતો.

૧૩૩. પુબ્બસઙ્ગહમિચ્ચેવં, વિગણેત્વા વિચક્ખણો;

પરસઙ્ગહસઙ્ખ્યાદિં, વિભાવેય્ય વિસારદો.

૧૩૪. પઞ્ચદ્વારાવજ્જનતો, દસ ચિત્તાનિ દીપયે;

સેસાવજ્જનતો પઞ્ચચત્તાલીસન્તિ ભાસિતં.

૧૩૫. પઞ્ચવિઞ્ઞાણતો પાપવિપાકા સમ્પટિચ્છના;

પરમેકં દ્વયં પુઞ્ઞવિપાકા સમ્પટિચ્છના.

૧૩૬. સન્તીરણા દ્વિહેતુમ્હા, પાકા દ્વાદસ જાયરે;

તિહેતુકામપાકમ્હા, એકવીસતિ લબ્ભરે.

૧૩૭. રૂપાવચરપાકમ્હા, પરમેકૂનવીસતિ;

નવટ્ઠારૂપપાકમ્હા, સત્ત છાપિ યથાક્કમં.

૧૩૮. પટિઘમ્હા તુ સત્તેવ, સિતમ્હા તેરસેરિતા;

પાપપુઞ્ઞદ્વિહેતુમ્હા, એકવીસતિ ભાવયે.

૧૩૯. દ્વિહેતુકામક્રિયતો, અટ્ઠારસ ઉપેક્ખકા;

સત્તરસ સુખોપેતા, વિભાવેય્ય વિચક્ખણો.

૧૪૦. કામપુઞ્ઞતિહેતુમ્હા, તેત્તિંસેવ ઉપેક્ખકા;

તેપઞ્ઞાસ સુખોપેતા, ભવન્તીતિ પકાસિતં.

૧૪૧. તિહેતુકામક્રિયતો, ચતુવીસતિપેક્ખકા;

સુખિતમ્હા તુ દીપેય્ય, પઞ્ચવીસતિ પણ્ડિતો.

૧૪૨. દસરૂપજવમ્હેકા-દસદ્વાદસ તેરસ;

યથાક્કમં પઞ્ચદસ, આરુપ્પા પરિદીપયે.

૧૪૩. ફલમ્હા ચુદ્દસેવાહુ, મગ્ગમ્હા તુ સકં ફલં;

પરં સઙ્ગહમિચ્ચેવં, વિગણેય્ય વિસારદો.

૧૪૪. પુબ્બાપરસમોધાન-મિતિ ઞત્વા તતો પરં;

વત્થુવીથિસમોધાનં, યથાસમ્ભવમુદ્દિસે.

૧૪૫. પઞ્ચ વત્થૂનિ નિસ્સાય, કમતો પઞ્ચમાનસા;

તેત્તિંસ પન નિસ્સાય, હદયં માનસા સિયું.

૧૪૬. કામપાકમનોધાતુ-હસિતુપ્પાદમાનસા;

દોસમૂલાનિ મગ્ગો ચ, રૂપજ્ઝાનાવ સબ્બથા.

૧૪૭. દસાવસેસાપુઞ્ઞાનિ, કામપુઞ્ઞમહાક્રિયા;

વોટ્ઠબ્બારૂપજવનં, સત્ત લોકુત્તરાનિ ચ.

૧૪૮. દ્વેચત્તાલીસ ચિત્તાનિ, પઞ્ચવોકારભૂમિયં;

નિસ્સાય હદયં હોન્તિ, અરૂપે નિસ્સયં વિના.

૧૪૯. આરુપ્પપાકા ચત્તારો, અનિસ્સાયેતિ સબ્બથા;

વિત્થારેનટ્ઠધા ભિન્નં, સઙ્ખેપા તિવિધં ભવે.

૧૫૦. તેચત્તાલીસ નિસ્સાય, અનિસ્સાય ચતુબ્બિધં;

નિસ્સિતાનિસ્સિતા સેસા, દ્વેચત્તાલીસ માનસા.

૧૫૧. પઞ્ચ ચિત્તપ્પના હોન્તિ, કમેનેકેકવીથિયં;

મનોધાતુત્તિકં નામ, પઞ્ચદ્વારિકમીરિતં.

૧૫૨. સુખતીરણવોટ્ઠબ્બ-પરિત્તજવના પન;

એકતિંસાપિ જાયન્તે, છસુ વીથીસુ સમ્ભવા.

૧૫૩. મહાપાકા પનટ્ઠાપિ, ઉપેક્ખાતીરણદ્વયં;

છસુ દ્વારેસુ જાયન્તિ, દસ મુત્તા ચ વીથિયા.

૧૫૪. ચુતિસન્ધિભવઙ્ગાનં, વસા પાકા મહગ્ગતા;

નવ વીથિવિમુત્તાતિ, દસધા વીથિસઙ્ગહો.

૧૫૫. એકદ્વારિકચિત્તાનિ, પઞ્ચછદ્વારિકા તથા;

છદ્વારિકવિમુત્તા ચ, વિમુત્તાતિ ચ સબ્બથા.

૧૫૬. છત્તિંસ તયેકતિંસ, દસ ચેવ નવેતિ ચ;

ઞત્વા વીથિસમોધાનં, ગોચરઞ્ચ સમુદ્દિસે.

૧૫૭. કમતો પઞ્ચવિઞ્ઞાણા, લોકુત્તરમહગ્ગતા;

અભિઞ્ઞાવજ્જિતા સબ્બા, પઞ્ચતાલીસ માનસા.

૧૫૮. યથાસમ્ભવતો હોન્તિ, રૂપાદેકેકગોચરા;

પઞ્ચગોચરમીરેન્તિ, મનોધાતુત્તિકં પન.

૧૫૯. સન્તીરણમહાપાકા, પરિત્તજવનાનિ ચ;

વોટ્ઠબ્બનમભિઞ્ઞા ચ, તેચત્તાલીસ સમ્ભવા.

૧૬૦. છારમ્મણેસુ હોન્તીતિ, અટ્ઠધા તિવિધા પુન;

એકારમ્મણચિત્તાનિ, પઞ્ચછારમ્મણાનિ ચ.

૧૬૧. સઙ્ખેપા માનસા પઞ્ચ-ચત્તાલીસ તયો તથા;

તેચત્તાલીસ ચેવેતિ, સત્તધાપિ સિયું કથં.

૧૬૨. કામપાકમનોધાતુ-હસિતુપ્પાદમાનસા;

પઞ્ચવીસ યથાયોગં, પરિત્તારમ્મણા મતા.

૧૬૩. કસિણુગ્ઘાટિમાકાસં, પઠમારુપ્પમાનસં;

તસ્સેવ નત્થિભાવં તુ, તતિયારુપ્પકં તથા.

૧૬૪. આલમ્બિત્વા પવત્તન્તિ, આરુપ્પા કમતો તતો;

દુતિયઞ્ચ ચતુત્થઞ્ચ, છ મહગ્ગતગોચરા.

૧૬૫. અપ્પમાણસમઞ્ઞા તે, નિબ્બાને પન ગોચરે;

અટ્ઠ લોકુત્તરા ધમ્મા, નિયમેન વવત્થિતા.

૧૬૬. કસિણાસુભકોટ્ઠાસે,

આનાપાને ચ યોગિનો;

પટિભાગનિમિત્તમ્હિ,

અપ્પમઞ્ઞાનુયુઞ્જતો.

૧૬૭. સત્તપણ્ણત્તિયઞ્ચેવ, રૂપજ્ઝાનં પવત્તતિ;

યથાવુત્તનિમિત્તમ્હિ, સેસમારુપ્પકન્તિ ચ.

૧૬૮. અભિઞ્ઞાવજ્જિતા એકવીસ મહગ્ગતા સબ્બા;

સબ્બે પણ્ણત્તિસઙ્ખાતે, નવત્તબ્બે પવત્તરે.

૧૬૯. જાયન્તાકુસલા ઞાણવિપ્પયુત્તજવા તથા;

અપ્પમાણં વિના વીસ, પરિત્તાદીસુ તીસુપિ.

૧૭૦. તિહેતુકામપુઞ્ઞાનિ, પુઞ્ઞાભિઞ્ઞા ચ પઞ્ચિમે;

ચતૂસુપિ પવત્તન્તિ, અરહત્તદ્વયં વિના.

૧૭૧. ક્રિયાભિઞ્ઞા ચ વોટ્ઠબ્બં, ક્રિયાકામે તિહેતુકા;

છ સબ્બત્થાપિ હોન્તીતિ, સત્તધા માનસા ઠિતા.

૧૭૨. એકતિચ્ચતુકોટ્ઠાસગોચરા તિવિધા પન;

સમસટ્ઠિ તથા વીસ, કમેનેકાદસેતિ ચ.

૧૭૩. પઞ્ચદ્વારેસુ પઞ્ચાપિ, પચ્ચુપ્પન્નાવ ગોચરા;

તેકાલિકા નવત્તબ્બા, મનોદ્વારે યથારહં.

૧૭૪. અજ્ઝત્તા ચ બહિદ્ધા ચ, પઞ્ચદ્વારેસુ ગોચરા;

મનોદ્વારે નવત્તબ્બો, નત્થિભાવોપિ લબ્ભતિ.

૧૭૫. પઞ્ચદ્વારેસુ પઞ્ચન્ન-મેકમેકો ચ ગોચરો;

છાપિ આરમ્મણા હોન્તિ, મનોદ્વારમ્હિ સબ્બથા.

૧૭૬. પઞ્ચદ્વારેસુ ગહિતં, તદઞ્ઞમ્પિ ચ ગોચરં;

મનોદ્વારે વવત્થાનં, ગચ્છતીતિ હિ દેસિતં.

૧૭૭. અતીતા વત્તમાના ચ, સમ્ભવા કામસન્ધિયા;

છદ્વારગહિતા હોન્તિ, તિવિધા તેપિ ગોચરા.

૧૭૮. કમ્મનિમિત્તમેવેકં, મનોદ્વારે ઉપટ્ઠિતં;

નવત્તબ્બમતીતઞ્ચ, ધમ્મારમ્મણસઙ્ગહં.

૧૭૯. આલમ્બિત્વા યથાયોગં, પટિસન્ધિમહગ્ગતા;

અન્તે ચુતિ ભવે મજ્ઝે, ભવઙ્ગમ્પિ પવત્તતીતિ.

ઇતિ ચિત્તવિભાગે વીથિપરિકમ્મકથા નિટ્ઠિતા.

ચતુત્થો પરિચ્છેદો.