૩. વીથિસઙ્ગહકથા

૮૫. ચક્ખુસોતઘાનજિવ્હા-કાયાયતન પઞ્ચધા;

પસાદા હદયઞ્ચેતિ, છ વત્થૂનિ વિનિદ્દિસે.

૮૬. ચક્ખુસોતઘાનજિવ્હા-કાયદ્વારા ચ પઞ્ચધા;

મનોદ્વારં ભવઙ્ગન્તિ, છ દ્વારા ચિત્તવીથિયા.

૮૭. રૂપસદ્દગન્ધરસ-ફોટ્ઠબ્બા પઞ્ચ ગોચરા;

ધમ્મારમ્મણપઞ્ઞત્તિ, છ દ્વારારમ્મણક્કમા.

૮૮. નિમિત્તગતિકમ્માનિ, કમ્મમેવાથ ગોચરા;

પટિસન્ધિભવઙ્ગાનં, ચુતિયા ચ યથારહં.

૮૯. મરણાસન્નસત્તસ્સ, યથોપટ્ઠિતગોચરં;

છદ્વારેસુ તમારબ્ભ, પટિસન્ધિ ભવન્તરે.

૯૦. એકચિત્તક્ખણા હોતિ, યાવજીવં તતો પરં;

ભવઙ્ગં પરિયોસાને, ચુતિ ચેકક્ખણા ભવે.

૯૧. દુહેતાહેતુચુતિયા, કામાવચરસન્ધિયો;

તિહેતુકામચુતિયા, સબ્બાપિ પટિસન્ધિયો.

૯૨. રૂપાવચરચુતિયા, સહેતુપટિસન્ધિયો;

આરુપ્પતોપરિ કામે, તત્થ વાપિ તિહેતુકા.

૯૩. પટિસન્ધિ ભવઙ્ગઞ્ચ, એકમેવેકજાતિયં;

ચુતિ ચારમ્મણઞ્ચસ્સ, એવમેવ યથારહં.

૯૪. રૂપાદારમ્મણે ચક્ખુ-પ્પસાદાદિમ્હિ ઘટ્ટિતે;

મજ્ઝે ભવઙ્ગં છિન્દિત્વા, વીથિ નામ પવત્તતિ.

૯૫. આવજ્જપઞ્ચવિઞ્ઞાણસમ્પટિચ્છનતીરણા;

વોટ્ઠબ્બકામજવનતદારમ્મણનામકા.

૯૬. સત્તેવ ઠાનસઙ્ખેપા, પઞ્ચદ્વારિકમાનસા;

ચતુપઞ્ઞાસ સબ્બેપિ, વિત્થારેન સરૂપતો.

૯૭. આવજ્જસબ્બજવનતદારમ્મણનામકા;

સત્તસટ્ઠિ સરૂપેન, મનોદ્વારિકમાનસા.

૯૮. ઇટ્ઠે આરમ્મણે હોન્તિ, પુઞ્ઞપાકાનિ સબ્બથા;

અનિટ્ઠે પાપપાકાનિ, નિયમોયં પકાસિતો.

૯૯. તત્થાપિ અતિઇટ્ઠમ્હિ, તદારમ્મણતીરણં;

સોમનસ્સયુતં ઇટ્ઠમજ્ઝત્તમ્હિ ઉપેક્ખિતં.

૧૦૦. ગોચરેતિપરિત્તમ્હિ, અતિઅપ્પાયુકે પન;

ભવઙ્ગમેવ ચલતિ, મોઘવારોતિ સો કતો.

૧૦૧. વોટ્ઠબ્બનં પરિત્તમ્હિ, દ્વત્તિક્ખત્તું પવત્તતિ;

તતો ભવઙ્ગપાતોવ, સોપિ મોઘોતિ વુચ્ચતિ.

૧૦૨. જવનઞ્ચ મહન્તમ્હિ, જવિત્વાન તતો પરં;

ન સમ્ભોતિ તદાલમ્બં, સોપિ મોઘોતિ વુચ્ચતિ.

૧૦૩. ગોચરેતિમહન્તમ્હિ, અતિદીઘાયુકે પન;

સમ્ભોતિ ચ તદાલમ્બં, સમ્પુણ્ણોતિ પવુચ્ચતિ.

૧૦૪. ગોચરેતિમહન્તમ્હિ, તદારમ્મણસમ્ભવો;

પઞ્ચદ્વારે મનોદ્વારે, વિભૂતે પન ગોચરે.

૧૦૫. કામાવચરસત્તાનં, કામાવચરગોચરે;

પરિત્તજવનેસ્વેવ, તદારમ્મણમુદ્દિસે.

૧૦૬. નાતિતિક્ખે નાતિસીઘે, નાતિતેજુસ્સદે જવે;

સમમન્દપ્પવત્તમ્હિ, તદારમ્મણમિચ્છિતં.

૧૦૭. સુખોપેતં તદાલમ્બં, ઉપેક્ખાક્રિયતો પરં;

ન હોતુપેક્ખાસહિતં, સુખિતક્રિયતો તથા.

૧૦૮. ન હોતિ દોમનસ્સમ્હા, સોમનસ્સિકમાનસં;

તદારમ્મણમઞ્ઞઞ્ચ, ભવઙ્ગં ચુતિ વા તથા.

૧૦૯. રજ્જનાદિવસેનેત્થ, જવનાકુસલં ભવે;

કુસલં પન સમ્ભોતિ, સદ્ધાપઞ્ઞાદિસમ્ભવે.

૧૧૦. તદેવ વીતરાગાનં, ક્રિયા નામ પવુચ્ચતિ;

અવિપાકતમાપન્નં, વટ્ટમૂલપરિક્ખયા.

૧૧૧. અપ્પનાજવનં સેસં, મહગ્ગતમનુત્તરં;

છબ્બીસતિ યથાયોગં, અપ્પનાવીથિયં ભવે.

૧૧૨. પરિકમ્મં કરોન્તસ્સ, કસિણાદિકગોચરે;

સુસમાહિતચિત્તસ્સ, ઉપચારસમાધિના.

૧૧૩. પરિકમ્મોપચારાનુલોમગોત્રભુતો પરં;

પઞ્ચમં વા ચતુત્થં વા, જવનં હોતિ અપ્પના.

૧૧૪. પુથુજ્જનાન સેક્ખાનં, કામપુઞ્ઞતિહેતુતો;

તિહેતુકામક્રિયતો, વીતરાગાનમપ્પના.

૧૧૫. તત્રાપિ સુખિતજવં, સુખિતદ્વયતો પરં;

ઉપેક્ખિતમ્હા સમ્ભોતિ, ઉપેક્ખેકગ્ગતાયુતં.

૧૧૬. પઞ્ચ વારે છ વા સત્ત, પરિત્તજવનં ભવે;

સકિં દ્વે વા તદાલમ્બં, સકિમાવજ્જનાદયો.

૧૧૭. અપ્પનાજવનઞ્ચેકં, પઠમુપ્પત્તિયં પન;

તતો પરં વસીભૂતં, અહોરત્તં પવત્તતિ.

૧૧૮. સકિં દ્વે વા નિરોધસ્સ, સમાપત્તિક્ખણે પન;

ચતુત્થારુપ્પજવનં, તતો ચિત્તં નિરુજ્ઝતિ.

૧૧૯. નિરોધા વુટ્ઠહન્તસ્સ, ઉપરિટ્ઠફલદ્વયં;

પઞ્ચાભિઞ્ઞા તથા મગ્ગા, એકચિત્તક્ખણા મતા.

૧૨૦. ફલમેકદ્વયં તથા, તિસ્સો વા મગ્ગવીથિયં;

સમાપત્તિક્ખણે તમ્પિ, અહોરત્તં પવત્તતિ.

૧૨૧. પઞ્ચદ્વારે ન લબ્ભન્તિ, લોકુત્તરમહગ્ગતા;

વીથિમુત્તમનોધાતુ, પઞ્ચ ચિત્તાનિ અન્તિમે.

૧૨૨. પરિત્તાનેવ સબ્બાનિ, પઞ્ચદ્વારેસુ સમ્ભવા;

મનોદ્વારમ્હિ વોટ્ઠબ્બ-તદાલમ્બજવા સિયું.

૧૨૩. ઘાનજિવ્હાકાયવીથિ, તદારમ્મણમેવ ચ;

રૂપે નત્થિ તથારૂપે, ચક્ખુસોતાપિ વીથિયો.

૧૨૪. સબ્બાપિ વીથિયો કામે,

રૂપે તિસ્સો પકાસિતા;

એકા વીથિ પનારૂપે,

નત્થાસઞ્ઞીસુ કાચિપિ.

૧૨૫. સત્તાપિ વીથિચિત્તાનિ, કામે રૂપે છ સમ્ભવા;

અરૂપે દ્વે મનોદ્વારા-વજ્જનં જવનન્તિ ચાતિ.

ઇતિ ચિત્તવિભાગે વીથિસઙ્ગહકથા નિટ્ઠિતા.

તતિયો પરિચ્છેદો.