૨. પકિણ્ણકકથા

૪૬. કુસલાનેકવીસેવ, દ્વાદસાકુસલાનિ ચ;

છત્તિંસતિ વિપાકાનિ, ક્રિયાચિત્તાનિ વીસતિ.

૪૭. કામેસુ ચતુપઞ્ઞાસ, રૂપેસુ દસ પઞ્ચ ચ;

દ્વાદસારુપ્પચિત્તાનિ, અટ્ઠાનુત્તરમાનસા.

૪૮. કામે તેવીસ પાકાનિ, પુઞ્ઞાપુઞ્ઞાનિ વીસતિ;

એકાદસ ક્રિયા ચેતિ, ચતુપઞ્ઞાસ સબ્બથા.

૪૯. પુઞ્ઞપાકક્રિયાભેદા, તયો રૂપેસુ પઞ્ચકા;

આરુપ્પેતિ ચતુક્કાનિ, સત્તવીસ મહગ્ગતા.

૫૦. ચતુમગ્ગફલાનં તુ, વસેનટ્ઠપિ ઝાનતો;

દસોભયમ્પિ મિસ્સેત્વા, તાલીસાનુત્તરા સિયું.

૫૧. પુઞ્ઞપાકક્રિયાપાપા, સન્તિ કામે મહગ્ગતે;

પાપં નત્થિ ક્રિયાપાપા, ન વિજ્જન્તિ અનુત્તરે.

૫૨. પાપાહેતુકમુત્તાનિ, અનવજ્જાનિ સબ્બથા;

એકૂનસટ્ઠિ ચિત્તાનિ, પુઞ્ઞપાકક્રિયાવસા.

૫૩. કમ્મચિત્તાનિ તેત્તિંસ, પુઞ્ઞાપુઞ્ઞાનિ સબ્બથા;

છત્તિંસ તેસં પાકાનિ, ક્રિયા વીસ ન ચોભયં.

૫૪. ચક્ખુવિઞ્ઞાણધાતાદિ, પઞ્ચવિઞ્ઞાણનામકા;

પઞ્ચદ્વારાવજ્જનઞ્ચ, દુવિધં સમ્પટિચ્છનં.

૫૫. મનોધાતુત્તયં નામ, છસત્તતિ તતો પરે;

મનોવિઞ્ઞાણધાતૂતિ, સત્તધા ધાતુભેદતો.

૫૬. મનોવિઞ્ઞાણધાતુઞ્ચ, મનોધાતુત્તયં તથા;

કત્વા મનોવિઞ્ઞાણન્તિ, છ વિઞ્ઞાણા પકિત્તિતા.

૫૭. આવજ્જનં દસ્સનઞ્ચ, સવનં ઘાયનં તથા;

સાયનં ફુસનઞ્ચેવ, સમ્પટિચ્છનતીરણં.

૫૮. વોટ્ઠબ્બનઞ્ચ જવનં, તદારમ્મણનામકં;

ભવઙ્ગં ચુતિ સન્ધીતિ, ચિત્તં ચુદ્દસધા ઠિતં.

૫૯. આવજ્જનાદયો દ્વે દ્વે, યુગા સત્ત યથાક્કમં;

તીણિ તીરણચિત્તાનિ, એકં વોટ્ઠબ્બનં મતં.

૬૦. કુસલાકુસલા સબ્બે, ફલા ચાવજ્જનં વિના;

ક્રિયા ચ પઞ્ચપઞ્ઞાસ, જવનન્તિ પવુચ્ચરે.

૬૧. સન્તીરણમહાપાકા, તદારમ્મણનામકા;

એકાદસ પવત્તન્તિ, જવનારમ્મણે યતો.

૬૨. મહગ્ગતમહાપાકા, ઉપેક્ખાતીરણદ્વયં;

ચુતિસન્ધિભવઙ્ગાનિ, ચિત્તાનેકૂનવીસતિ.

૬૩. જવનાવજ્જનાદીનિ, વોટ્ઠબ્બસુખતીરણા;

મહગ્ગતમહાપાકા, ઉપેક્ખાતીરણાતિ ચ.

૬૪. અટ્ઠસટ્ઠિ તથા દ્વે ચ, નવટ્ઠ દ્વે યથાક્કમં;

એકદ્વિતિચતુપ્પઞ્ચકિચ્ચટ્ઠાનાનિ નિદ્દિસે.

૬૫. રૂપપાકા મહાપાકા, મનોધાતુ ચ તીરણં;

રૂપં જનેન્તિ એકૂનવીસતિ નેતરદ્વયં.

૬૬. અભિઞ્ઞાવજ્જિતા સબ્બે, અપ્પનાજવના પન;

રૂપં જનેન્તિ છબ્બીસ, પણામેન્તિરિયાપથં.

૬૭. અભિઞ્ઞાદ્વયવોટ્ઠબ્બપરિત્તજવના પન;

દ્વત્તિંસ રૂપવિઞ્ઞત્તિઇરિયાપથસાધકા.

૬૮. પઞ્ચવિઞ્ઞાણમારુપ્પ-વિપાકા સબ્બસન્ધિયો;

ચુતિ ખીણાસવસ્સેતિ, સોળસેતે ન કિઞ્ચિપિ.

૬૯. રૂપં જનેન્તિ ચિત્તાનિ, સત્તસત્તતિ સબ્બથા;

અટ્ઠપઞ્ઞાસ ચિત્તાનિ, પણામેન્તિરિયાપથં.

૭૦. દ્વત્તિંસ ચતુવિઞ્ઞત્તિં, સમુટ્ઠાપેન્તિ માનસા;

ન જનેન્તિ તસ્સમ્પેકં, યથાવુત્તાનિ સોળસ.

૭૧. સોમનસ્સસહગતા, પરિત્તજવના પન;

હસનમ્પિ જનેન્તીતિ, ચતુકિચ્ચાનિ તેરસ.

૭૨. સબ્બમ્પિ પઞ્ચવોકારે, કિચ્ચમેતં પકાસિતં;

આરુપ્પે પન સબ્બમ્પિ, રૂપાયત્તં ન વિજ્જતિ.

૭૩. અસઞ્ઞીનં તુ સબ્બાનિ, ચિત્તાનેવ ન લબ્ભરે;

રૂપક્ખન્ધોવ તેસં તુ, અત્તભાવોતિ વુચ્ચતિ.

૭૪. પાણાતિપાતથેય્યાદિવસેનોપચિતં પન;

ઉદ્ધચ્ચરહિતાપુઞ્ઞં, ચતુરાપાયભૂમિયં.

૭૫. દત્વા સન્ધિં પવત્તે તુ, પઞ્ચવોકારભૂમિયં;

ઉદ્ધચ્ચસહિતઞ્ચાપિ, સત્ત પાકાનિ પચ્ચતિ.

૭૬. દાનસીલાદિભેદેન, પવત્તં કુસલં પન;

કામે માનસમુક્કટ્ઠં, ચતુક્કં તુ તિહેતુકં.

૭૭. દત્વા તિહેતુકં સન્ધિં, કામે સુગતિયં પન;

સોળસ પુઞ્ઞપાકાનિ, પવત્તે તુ વિપચ્ચતિ.

૭૮. તિહેતુકોમકં પુઞ્ઞં, ઉક્કટ્ઠઞ્ચ દ્વિહેતુકં;

દત્વા દ્વિહેતુકં સન્ધિં, કામે સુગતિયં તથા.

૭૯. પવત્તે પન ઞાણેન, સમ્પયુત્તં વિવજ્જિય;

દ્વાદસ પુઞ્ઞપાકાનિ, વિપચ્ચતિ યથારહં.

૮૦. દ્વિહેતુકોમકં પુઞ્ઞં, પટિસન્ધિમહેતુકં;

દેતિ માનુસકે ચેવ, વિનિપાતાસુરે તથા.

૮૧. અટ્ઠાહેતુકપાકાનિ, પવત્તે તુ વિપચ્ચરે;

ચત્તારિપિ ચતુક્કાનિ, પઞ્ચવોકારભૂમિયં.

૮૨. ભાવનામયપુઞ્ઞં તુ, મહગ્ગતમનુત્તરં;

યથાભૂમિનિયામેન, દેતિ પાકં યથાસકં.

૮૩. કટત્તારૂપપાકાનિ, પઞ્ચવોકારભૂમિયં;

આરુપ્પાનુત્તરે પાકં, તથા રૂપમસઞ્ઞિસુ.

૮૪. પુઞ્ઞાપુઞ્ઞાનિ કમ્માનિ, તેત્તિંસાપિ ચ યબ્બથા;

સઞ્જનેન્તિ યથાયોગં, પટિસન્ધિપવત્તિયં.

ઇતિ ચિત્તવિભાગે પકિણ્ણકકથા નિટ્ઠિતા.

દુતિયો પરિચ્છેદો.