અટ્ઠવીસતિમો પરિચ્છેદો

૨૮. અત્થપઞ્ઞત્તિકથા

૧૦૮૪. તત્થ ચ પુબ્બાપરિય-પવત્તક્ખન્ધસમ્મતા;

વિઞ્ઞત્તિન્દ્રિયવિપ્ફાર-વિસેસોપનિબન્ધના.

૧૦૮૫. દેવયક્ખમનુસ્સાદિ-નાનાભેદા સલક્ખિકા;

સત્તપઞ્ઞત્તિ નામાયં, સ્વાયં સત્તોતિ સમ્મતો.

૧૦૮૬. વટ્ટત્તયમુપાદાય,

ખન્ધાયતનવુત્તિયા;

કારકો વેદકો વાયં,

સન્ધાવતિ ભવે ભવે.

૧૦૮૭. તસ્મા સંસારમાપન્નો, સત્તો નામ સ પુગ્ગલો;

અહમત્તાપરા ઇત્થી, પુરિસોતિ ચ કપ્પિતો.

૧૦૮૮. સ્વાયં ખન્ધાદિતો સત્તો, અઞ્ઞોતિ ચ ન વુચ્ચતિ;

ખન્ધાદિવિનિમુત્તસ્સ, સત્તસ્સેવ અભાવતો.

૧૦૮૯. ખન્ધા ખન્ધાનમેવાયં, સત્તોતિ ચ ન વુચ્ચતિ;

ખન્ધવોહારતો તસ્સ, અઞ્ઞવોહારસમ્ભવા.

૧૦૯૦. ઇચ્ચેવં ખન્ધનાનત્તે-કત્તમુત્તોપિ અત્થતો;

તબ્બિસેસાવચરિત-વોહારો ચ તુ દિસ્સતિ.

૧૦૯૧. તેનાયં પુગ્ગલો સત્તો, જાયતિજ્જિય્યતીતિ ચ;

મીયતીતિ ચ તસ્સાયં, સંસારોતિ પવુચ્ચતિ.

૧૦૯૨. મતો જાતો ચ ન સ્વેવ, ખન્ધભેદોપચારતો;

નાપરો સ્વેવ સન્તાનભેદાભાવોપચારતો.

૧૦૯૩. નાનત્તેકત્તમિચ્ચેવં, પુગ્ગલસ્સોપચારતો;

ઉચ્છેદસસ્સતત્તં વા, તસ્મા નોપેતિ પુગ્ગલો.

૧૦૯૪. ઇચ્ચાયં પુગ્ગલો નામ, સત્તો સંસારકારકો;

ખન્ધાદિકમુપાદાય, પઞ્ઞત્તોતિ પવુચ્ચતિ.

૧૦૯૫. તસ્મા પુગ્ગલસઙ્ખાતા, સંસારોપનિબન્ધના;

સત્તપઞ્ઞત્તિ નામાતિ, વિઞ્ઞાતબ્બા વિભાવિના.

૧૦૯૬. અજ્ઝત્તિકા ચ કેસાદિકોટ્ઠાસા બાહિરેસુ ચ;

ભૂમિપબ્બતપાસાણતિણરુક્ખલતાદિકા.

૧૦૯૭. ભૂતસમ્ભારનિબ્બત્તિવિભાગપરિકપ્પિતા;

તમુપાદાય સમ્ભારપઞ્ઞત્તીતિ પવુચ્ચતિ.

૧૦૯૮. ભૂતસમ્ભારસણ્ઠાનવિભાગપરિકપ્પિતા;

સણ્ઠાનપઞ્ઞત્તિ નામ, થમ્ભકુમ્ભાદિકા મતા.

૧૦૯૯. ભૂતસમ્ભારસઙ્ઘાતવિસેસપરિકપ્પિતા;

સઙ્ઘાતપઞ્ઞત્તિ નામ, રથગેહાદિકા મતા.

૧૧૦૦. ભૂતસમ્ભારવિસેસપરિણામપકપ્પિતા;

પરિણામપઞ્ઞત્તીતિ, દધિભત્તાદિકા મતા.

૧૧૦૧. ઇત્થમજ્ઝત્તબહિદ્ધા, ધમ્મા સમ્ભારસમ્ભૂતા;

સન્તાનવુત્તિ સઙ્કેતસિદ્ધા પઞ્ઞત્તિ પઞ્ચધા.

૧૧૦૨. તથા તથા સમુપ્પન્નવિકપ્પાભોગસમ્મતા;

વિકપ્પપઞ્ઞત્તિ નામ, કાલાકાસદિસાદિકા.

૧૧૦૩. તં તં નિમિત્તમાગમ્મ, તતોપટ્ઠાનકપ્પિતા;

ઉપટ્ઠાનપઞ્ઞત્તીતિ, પટિભાગાદિકા મતા.

૧૧૦૪. વિસેસાકારમત્તાપિ, અત્થન્તરપકપ્પિતા;

આકારપઞ્ઞત્તિ નામ, વિઞ્ઞત્તિલહુતાદિકા.

૧૧૦૫. તં તં કારણમાગમ્મ, તથા વોહારકપ્પિતા;

વોહારપઞ્ઞત્તિ નામ, કથિનાપત્તિઆદિકા.

૧૧૦૬. બાલો યો સો ચ મે અત્તા,

સો ભવિસ્સામિ મં ચ તુ;

નિચ્ચો ધુવો સસ્સતોતિ-

આદિકા પન સબ્બથા.

૧૧૦૭. તબ્બોહારનિમિત્તાનં, અભાવેપિ પવત્તિતો;

અભિનિવેસપઞ્ઞત્તિ, નામ તિત્થિયકપ્પિતા.

૧૧૦૮. ઇચ્ચેવં લોકસાસનતિત્થાયતનકપ્પિતા;

સન્તાનમુત્તસઙ્કેતસિદ્ધા અત્થાપિ પઞ્ચધા.

૧૧૦૯. સઙ્કાનવુત્તિસન્તાનમુત્તભેદવસા દ્વિધા;

અત્થપઞ્ઞત્તિ નામાયં, દસધા પરિદીપિતા.

૧૧૧૦. ઇતિ વુત્તપ્પકારેસુ, પઞ્ઞત્તત્થેસુ પણ્ડિતા;

પઞ્ઞત્તિમત્તં સન્ધાય, વોહરન્તિ યથાકથં.

૧૧૧૧. તદઞ્ઞે પન બાલા ચ, તિત્થિયાપિ અકોવિદા;

પઞ્ઞત્તિમતિધાવિત્વા, ગણ્હન્તિ પરમત્થતો.

૧૧૧૨. તે તથા ગહિતાકારા, અઞ્ઞાણગહિતા જના;

મિચ્છત્તાભિનિવિટ્ઠા ચ, વડ્ઢન્તિ ભવબન્ધનં.

૧૧૧૩. દુવિધેસુપિ અત્થેસુ, તસ્મા પણ્ડિતજાતિકો;

પરમત્થપઞ્ઞત્તીસુ, વિભાગમિતિ લક્ખયેતિ.

ઇતિ પઞ્ઞત્તિવિભાગે અત્થપઞ્ઞત્તિકથા નિટ્ઠિતા.

અટ્ઠવીસતિમો પરિચ્છેદો.