છબ્બિસતિમો પરિચ્છેદો

૨૬. વુટ્ઠાનવિસુદ્ધિકથા

૧૦૧૯. તસ્સેવં પટિપન્નસ્સ, સિખાપત્તા વિપસ્સના;

વુટ્ઠાનગામિની નામ, યદા હોતિ તદા પન.

૧૦૨૦. પરિકમ્મોપચારાનુલોમગોત્રભુતો પરં;

મગ્ગો તતો ફલં હોતિ, ભવઙ્ગા પચ્ચવેક્ખણા.

૧૦૨૧. પરિકમ્મોપચારાનુલોમસઙ્ખાતગોચરા;

મગ્ગસ્સાવજ્જનં હુત્વા, નિબ્બાને હોતિ ગોત્રભુ.

૧૦૨૨. ચતુત્થં પઞ્ચમં વાથ, છટ્ઠં વાપિ યથારહં;

અપ્પેતિ મગ્ગજવનં, નિબ્બાને સકિમેવ તં.

૧૦૨૩. તતો ફલાનિ તીણિ દ્વે, એકં વાથ યથાક્કમં;

મગ્ગાવસેસનિરોધમગ્ગવુટ્ઠાનવીથિયં.

૧૦૨૪. તતો ભવઙ્ગપાતોવ,

તં છેત્વા પચ્ચવેક્ખણા;

તિસ્સો પઞ્ચવિધા હોન્તિ,

યથાયોગં તથા હિ ચ.

૧૦૨૫. મગ્ગં ફલઞ્ચ નિબ્બાનં, અવસ્સં પચ્ચવેક્ખતિ;

હીને કિલેસે સેસે ચ, પચ્ચવેક્ખતિ વા ન વા.

૧૦૨૬. તતો ચ પુન સઙ્ખારે, વિપસ્સન્તો યથા પુરે;

અપ્પેતિ અનુપુબ્બેન, સેસમગ્ગફલાનિ ચ.

૧૦૨૭. તત્થ વુચ્ચન્તિ નિબ્બાન-ફલમગ્ગવિપસ્સના;

સુઞ્ઞતા ચાનિમિત્તા ચ, તથાપણિહિતાનિ ચ.

૧૦૨૮. સુઞ્ઞતાવિપસ્સનાદિનામેન હિ વિપસ્સતિ;

વિમોક્ખમુખભૂતાતિ, તિવિધા ભાજિતા તથા.

૧૦૨૯. સુઞ્ઞતાદિકનામેન, વિમોક્ખા તિવિધા મતા;

નિબ્બાનફલમગ્ગા ચ, સમાપત્તિસમાધયો.

૧૦૩૦. તત્થેવ પઠમભૂમિં, પત્તો અરિયપુગ્ગલો;

સત્તક્ખત્તુપરમો સો, સોતાપન્નોતિ વુચ્ચતિ.

૧૦૩૧. પત્તો દુતિયભૂમિઞ્ચ, સકદાગામિનામકો;

સકિમેવ ઇમં લોકં, આગન્ત્વા હોતિ માનુસં.

૧૦૩૨. પત્તો તતિયભૂમિઞ્ચ, અનાગામીતિ વુચ્ચતિ;

બ્રહ્મલોકા અનાગન્ત્વા, ઇધકામોપપત્તિયા.

૧૦૩૩. પત્તો ચતુત્થભૂમિઞ્ચ, અરહા અગ્ગપુગ્ગલો;

દિટ્ઠેવ ધમ્મે દુક્ખગ્ગિં, નિબ્બાપેતીતિ વુચ્ચતિ.

૧૦૩૪. ઇતિ મગ્ગફલટ્ઠાનં, વસા અરિયપુગ્ગલા;

દ્વિધાપિ ચતુધા યુગ્ગા, અટ્ઠ હોન્તિ વિભાગતો.

૧૦૩૫. ઉભતોભાગવિમુત્ત-

વિભાગાદિવસા પન;

વિભત્તા હોન્તિ સત્તેતે,

યથાયોગં તથા હિ ચ.

૧૦૩૬. સદ્ધાધુરસ્સાનિચ્ચતો, વુટ્ઠાનં દુક્ખતોપિ ચ;

પઞ્ઞાધુરસ્સાનત્તતો, ઇતિ દીપેન્તિ પણ્ડિતા.

૧૦૩૭. સદ્ધાનુસારિ આદિમ્હિ, મજ્ઝે સદ્ધાવિમુત્તકો;

અન્તે પઞ્ઞાવિમુત્તોવ, તસ્મા સદ્ધાધુરો સિયા.

૧૦૩૮. ધમ્માનુસારિ આદિમ્હિ, દિટ્ઠિપ્પત્તો તતોપરિ;

અન્તે પઞ્ઞાવિમુત્તોવ, હોતિ પઞ્ઞાધુરોપિ ચ.

૧૦૩૯. સમથયાનિકા ચેવ, રૂપાનુત્તરપાદકા;

વિપસ્સનાયાનિકા ચ, સબ્બે સુક્ખવિપસ્સકા.

૧૦૪૦. ધુરવુટ્ઠાનભેદેન, હોન્તિ પઞ્ચેવ સબ્બથા;

આરુપ્પપાદકા ચાપિ, આદિમ્હિ દુવિધા તથા.

૧૦૪૧. છસુ ઠાનેસુ મજ્ઝકે, કાયસક્ખીતિ ભાજિતા;

ઉભતોભાગવિમુત્તો, અરહત્તે પતિટ્ઠિતો.

૧૦૪૨. ઇત્થં વુત્તયાનધુર-વુટ્ઠાનાનં વિભાગતો;

મગ્ગપ્ફલભૂમિયો ચ, સત્તટ્ઠારિયપુગ્ગલા.

૧૦૪૩. તત્થ ચાનુત્તરઞાણં, સચ્ચાનં પટિવેધકં;

સમુચ્છેદપ્પહાનેન, ક્લેસાનુસયસોધનં.

૧૦૪૪. ચતુમગ્ગવિભાગેન, વુટ્ઠાનન્તિ પકિત્તિતં;

ઞાણદસ્સનવિસુદ્ધિ, નામ હોતિ તથાપિ ચ.

૧૦૪૫. મગ્ગો ચ પરિજાનાતિ, દુક્ખં તેભૂમકં તથા;

યથાયોગં પજહતિ, તણ્હાસમુદયમ્પિ ચ.

૧૦૪૬. નિરોધં સચ્છિકરોતિ, મગ્ગસચ્ચમનુત્તરં;

ભાવનાવીથિમોતિણ્ણો, ભાવેતીતિ પવુચ્ચતિ.

૧૦૪૭. દિટ્ઠિગ્ગતવિચિકિચ્છા-સીલબ્બતમસેસતો;

અપાયગમનીયઞ્ચ, રાગદોસાદિકત્તયં.

૧૦૪૮. તદેકટ્ઠે કિલેસે ચ, સહજાતપ્પહાનતો;

પજહાતિ સોતાપત્તિ-મગ્ગો પઠમભૂમિકો.

૧૦૪૯. તદેકટ્ઠે પજહતિ, રાગદોસાદિકેપિ ચ;

થૂલે તુ સકદાગામિ-મગ્ગો દુતિયભૂમિકો.

૧૦૫૦. પજહાતિ અનાગામિ-મગ્ગો નિરવસેસતો;

કામરાગબ્યાપાદે ચ, તદેકટ્ઠે ચ સમ્ભવા.

૧૦૫૧. રૂપારૂપરાગમાનુ-દ્ધચ્ચાવિજ્જાતિ પઞ્ચકં;

અગ્ગમગ્ગો પજહતિ, ક્લેસે સેસે ચ સબ્બથા.

૧૦૫૨. ઇતિ સચ્ચપટિવેધં, ક્લેસક્ખયફલાવહં;

મગ્ગઞાણં પકાસેન્તિ, વિસુદ્ધિં સત્તમં બુધા.

૧૦૫૩. છબ્બિસુદ્ધિકમેનેવં, સબ્બથાય વિસુદ્ધિયા;

સત્તમાયાનુપત્તબ્બં, નિબ્બાનન્તિ પવુચ્ચતિ.

૧૦૫૪. ક્લેસક્ખયકરં તાણં, સંસારાતિક્કમં પરં;

પારિમં તીરમભયં, સબ્બસઙ્ખારનિસ્સટં.

૧૦૫૫. તેનમ્મદનિમ્મદનં, પિપાસવિનયાદિના;

ક્લેસસંસારસઙ્ખાર-પટિપક્ખનિદસ્સિતં.

૧૦૫૬. અજરામરમચ્ચન્ત-મનુપ્પાદમસઙ્ખતં;

અનુત્તરમસઙ્ખારં, અનન્તમતુલઞ્ચ તં.

૧૦૫૭. પરમત્થમનોપમ્મં, સન્તિ અપ્પટિમં સુખં;

નિરોધસચ્ચ નિબ્બાનં, એકન્તં અમતં પદં.

૧૦૫૮. સોપાદિસેસનિબ્બાન-ધાતુ ચેવ તથાપરા;

અનુપાદિસેસા ચેતિ, દુવિધા પરિયાયતો.

૧૦૫૯. સુઞ્ઞતં ચાનિમિત્તઞ્ચ, તથાપણિહિતન્તિ ચ;

અત્તાદિગાહાભાવેન, તિવિધાપિ ચ ભાજિતં.

૧૦૬૦. ક્લેસસંસારસઙ્ખાર-પચ્ચનીકવિભાગતો;

ભવક્ખયાદિભેદેહિ, બહુધાપિ પવુચ્ચતિ.

૧૦૬૧. તદેવમચ્ચુતં ધમ્મં, લોકુત્તરમકાલિકં;

વાનાભાવા વાનાતીતો, ‘‘નિબ્બાન’’ન્તિ પકિત્તિતં.

ઇતિ નિબ્બાનવિભાગે વુટ્ઠાનવિસુદ્ધિકથા નિટ્ઠિતા.

છબ્બીસતિમો પરિચ્છેદો.

નિટ્ઠિતો ચ સબ્બથાપિ નિબ્બાનવિભાગો.