૨૪. પરિગ્ગહવિસુદ્ધિકથા

૯૪૦. સીલચિત્તવિસુદ્ધીહિ, યથાવુત્તાહિ મણ્ડિતો;

પયોગાસયસમ્પન્નો, નિબ્બાનાભિરતો તતો.

૯૪૧. ખન્ધાયતનધાતાદિપ્પભેદેહિ યથારહં;

લક્ખણપચ્ચુપટ્ઠાન-પદટ્ઠાનવિભાગતો.

૯૪૨. પરિગ્ગહેત્વા સઙ્ખારે, નામરૂપં યથાકથં;

વવત્થપેન્તો તત્થેવમનુપસ્સતિ પઞ્ઞવા.

૯૪૩. નામરૂપમિદં સુદ્ધં, અત્તભાવોતિ વુચ્ચતિ;

નત્થેત્થ કોચિ અત્તા વા, સત્તો જીવો ચ પુગ્ગલો.

૯૪૪. યથાપિ અઙ્ગસમ્ભારા, હોતિ સદ્દો રથો ઇતિ;

એવં ખન્ધેસુ સન્તેસુ, હોતિ સત્તોતિ સમ્મુતિ.

૯૪૫. ખન્ધાયતનધાતૂનં, યથાયોગમનુક્કમો;

અબ્બોચ્છિન્નો પવત્તન્તો, સંસારોતિ પવુચ્ચતિ.

૯૪૬. ઇતિ નાનપ્પકારેન, તેભૂમકપરિગ્ગહો;

ભૂમિધમ્મવવત્થાનં, સુદ્ધસઙ્ખારદસ્સનં.

૯૪૭. અત્તદિટ્ઠિપહાનેન, દિટ્ઠિસંક્લેસસોધનં;

દિટ્ઠિવિસુદ્ધિ નામાતિ, ઞાણમેતં પવુચ્ચતિ.

૯૪૮. પરિગ્ગહિતસઙ્ખારો, નામરૂપમપત્થિયા;

તતો પરં યથાયોગં, પરિગ્ગણ્હતિ પચ્ચયે.

૯૪૯. દુક્ખસમુદયો તત્થ, તણ્હા સંસારનાયિકા;

સમોધાનેતિ સઙ્ખારે, તત્થ તત્થુપપત્તિયા.

૯૫૦. તણ્હાસમ્ભવમેવેતં, તસ્મા દુક્ખં પવુચ્ચતિ;

તદપ્પવત્તિ નિબ્બાનં, મગ્ગો તંપાપકોતિ ચ.

૯૫૧. ચતુસચ્ચવવત્થાન-મુખેનેવમ્પિ પચ્ચયે;

પરિગ્ગણ્હન્તિ એકચ્ચે, સઙ્ખારાનમથાપરે.

૯૫૨. આલોકાકાસવાયાપપથવિઞ્ચુપનિસ્સયં;

ભવઙ્ગપરિણામઞ્ચ, લભિત્વાવ યથારહં.

૯૫૩. છ વત્થૂનિ ચ નિસ્સાય, છ દ્વારારમ્મણાનિ ચ;

પટિચ્ચ મનસિકારં, પવત્તન્તિ અરૂપિનો.

૯૫૪. યથાસકસમુટ્ઠાનં, વિભાગેહિ ચ રૂપિનો;

પવત્તન્તિ એકચ્ચેતિ, પરિગ્ગણ્હન્તિ પચ્ચયે.

૯૫૫. અવિજ્જાપચ્ચયા હોન્તિ, સઙ્ખારા તુ તતો તથા;

વિઞ્ઞાણં નામરૂપઞ્ચ, સળાયતનનામકં.

૯૫૬. ફસ્સો ચ વેદના તણ્હા, ઉપાદાનં ભવો તતો;

જાતિ જરા મરણઞ્ચ, પવત્તતિ યથારહં.

૯૫૭. તતો સોકો પરિદેવો, દુક્ખઞ્ચેવ તથાપરં;

દોમનસ્સમુપાયાસો, સમ્ભોતિ ચ યથારહં.

૯૫૮. એતસ્સ કેવલસ્સેવં, દુક્ખક્ખન્ધસ્સ સમ્ભવો;

પટિચ્ચસમુપ્પાદોવ, નત્થઞ્ઞો કોચિ કારકો.

૯૫૯. તત્થાવિજ્જાદયો દ્વેપિ, અદ્ધાતીતો અનાગતો;

જાતાદયોપરે અટ્ઠ, પચ્ચુપ્પન્નોતિ વણ્ણિતો.

૯૬૦. પુઞ્ઞાપુઞ્ઞાનેઞ્જવસા, સઙ્ખારા તિવિધા તથા;

ભવેકદેસો કમ્મઞ્ચ, કમ્મવટ્ટન્તિ વુચ્ચતિ.

૯૬૧. અવિજ્જાતણ્હુપાદાના, ક્લેસવટ્ટમથાપરે;

વિપાકવટ્ટં સત્તાપિ, ઉપપત્તિભવોપિ ચ.

૯૬૨. અવિજ્જાસઙ્ખારાનં તુ, ગહણે ગહિતાવ તે;

તણ્હુપાદાનભવાતિ, અતીતે પઞ્ચ હેતવો.

૯૬૩. તણ્હુપાદાનભવાનં, ગહણે ગહિતાવ તે;

અવિજ્જા સઙ્ખારા ચેતિ, પચ્ચુપ્પન્નેપિ પઞ્ચકે.

૯૬૪. વિઞ્ઞાણાદિસરૂપેન, દસ્સિતં ફલપઞ્ચકં;

તથા તદેવ જાતાદિ-નામેનાનાગતન્તિ ચ.

૯૬૫. અતીતે હેતવો પઞ્ચ, ઇદાનિ ફલપઞ્ચકં;

ઇદાનિ હેતવો પઞ્ચ, આયતિં ફલપઞ્ચકં.

૯૬૬. હેતુફલં ફલહેતુ, પુન હેતુફલાનિ ચ;

તિસન્ધિ ચતુસઙ્ખેપં, વીસતાકારમબ્રવું.

૯૬૭. અત્થધમ્મપટિવેધ-દેસનાનં યથારહં;

ગમ્ભીરત્તા ચતુન્નમ્પિ, ચતુગમ્ભીરતા મતા.

૯૬૮. એકત્તનાનત્તનયા, અબ્યાપારનયોપરો;

તથેવંધમ્મતા ચેતિ, નયા વુત્તા ચતુબ્બિધા.

૯૬૯. જરામરણસોકાદિ-પીળિતાનમભિણ્હસો;

આસવાનં સમુપ્પાદા, અવિજ્જા ચ પવત્તતિ.

૯૭૦. અવિજ્જાપચ્ચયા હોન્તિ, સઙ્ખારાપિ યથા પુરે;

બદ્ધાવિચ્છેદમિચ્ચેવં, ભવચક્કમનાદિકં.

૯૭૧. તણ્હાવિજ્જાનાભિકં તં, જરામરણનેમિકં;

સેસાકારાદિઘટિકં, તિભવારથયોજિતં.

૯૭૨. તિઅદ્ધઞ્ચ તિવટ્ટઞ્ચ, તિસન્ધિઘટિકં તથા;

ચતુસઙ્ખેપગમ્ભીરનયમણ્ડિતદેસનં.

૯૭૩. વીસતાકારવિભાગં, દ્વાદસાકારસઙ્ગહં;

ધમ્મટ્ઠિતીતિ દીપેન્તિ, ઇદપ્પચ્ચયતં બુધા.

૯૭૪. પટિચ્ચસમુપ્પાદોયં, પચ્ચયાકારનામતો;

સઙ્ખેપતો ચ વિત્થારા, વિવિધાકારભેદતો.

૯૭૫. જનેતિ પચ્ચયુપ્પન્ને, અવિજ્જાદિપવત્તિયા;

અવિજ્જાદિનિરોધેન, નિરોધેતિ ચ સબ્બથા.

૯૭૬. પચ્ચયપ્પચ્ચયુપ્પન્ન-વસેનેવ પવત્તતિ;

સંસારોયન્તિ એકચ્ચે, પરિગ્ગણ્હન્તિ પચ્ચયે.

૯૭૭. સમન્તપટ્ઠાનમહાપકરણવિભાગતો;

એકચ્ચે પરિગ્ગણ્હન્તિ, ચતુવીસતિ પચ્ચયે.

૯૭૮. ઇતિ નાનપ્પકારેન, પચ્ચયાનં પરિગ્ગહો;

સપ્પચ્ચયનામરૂપં, વવત્થાનન્તિ વેદિતં.

૯૭૯. ઇદપ્પચ્ચયતાઞાણં, પચ્ચયાકારદસ્સનં;

ધમ્મટ્ઠિતિ યથાભૂતઞાણદસ્સનનામકં.

૯૮૦. કાલત્તયવિભાગેસુ, કઙ્ખાસંક્લેસસોધનં;

કઙ્ખાવિતરણા નામ, વિસુદ્ધીતિ પવુચ્ચતીતિ.

ઇતિ નિબ્બાનવિભાગે પરિગ્ગહવિસુદ્ધિકથા નિટ્ઠિતા.

ચતુવીસતિમો પરિચ્છેદો.