૪. નિબ્બાનવિભાગો

૨૩. મૂલવિસુદ્ધિકથા

૮૯૫. ઇત્થં ચિત્તં ચેતસિકં, રૂપઞ્ચેવાતિ સઙ્ખતા;

વુત્તા અસઙ્ખતં દાનિ, નિબ્બાનન્તિ પવુચ્ચતિ.

૮૯૬. સીલવિસુદ્ધિ આદિમ્હિ, તતો ચિત્તવિસુદ્ધિ ચ;

દિટ્ઠિવિસુદ્ધિનામા ચ, કઙ્ખાવિતરણાપિ ચ.

૮૯૭. તતો પરં મગ્ગામગ્ગ-ઞાણદસ્સનનામિકા;

તથા પટિપદાઞાણ-દસ્સના ઞાણદસ્સનં.

૮૯૮. ઇચ્ચાનુક્કમતો વુત્તા, સત્ત હોન્તિ વિસુદ્ધિયો;

સત્તમાનુત્તરા તત્થ, પુબ્બભાગા છ લોકિયા.

૮૯૯. સંવરો પાતિમોક્ખો ચ, તથેવિન્દ્રિયસંવરો;

આજીવપારિસુદ્ધિ ચ, સીલં પચ્ચયનિસ્સિતં.

૯૦૦. ઇતિ સીલવિસુદ્ધીતિ, સુદ્ધમેતં પવુચ્ચતિ;

ચતુપારિસુદ્ધિસીલં, ધુતઙ્ગપરિવારિતં.

૯૦૧. કસિણાનિ દસાસુભા, દસાનુસ્સતિયો પન;

અપ્પમઞ્ઞા ચ સઞ્ઞા ચ, વવત્થારુપ્પકાતિ ચ.

૯૦૨. સમથક્કમ્મટ્ઠાનાનિ, તાલીસટ્ઠકથાનયે;

પાળિયં તુ વિભત્તાનિ, અટ્ઠતિંસાતિ વણ્ણિતં.

૯૦૩. પથવાપો ચ તેજો ચ,

વાયો નીલઞ્ચ પીતકં;

લોહિતોદાતમાકાસં,

આલોકકસિણન્તિ ચ.

૯૦૪. કસિણાનિ દસેતાનિ, વુત્તાનટ્ઠકથાનયે;

અટ્ઠેવ પાળિયં હિત્વા, અન્તે તુ કસિણદ્વયં.

૯૦૫. ઉદ્ધુમાતં વિનીલઞ્ચ, વિપુબ્બકં વિખાયિતં;

વિચ્છિદ્દકઞ્ચ વિક્ખિત્તં, હતવિક્ખિત્તલોહિતં.

૯૦૬. પુળવકં અટ્ઠિકઞ્ચેતિ, અસુભા દસ દેસિતા;

રૂપકાયવિભાગાય, દસકાયવિપત્તિયા.

૯૦૭. બુદ્ધે ધમ્મે ચ સઙ્ઘે ચ, સીલે ચાગે ચ અત્તના;

દેવતોપસમાયઞ્ચ, સત્તાનુસ્સતિયો કમા.

૯૦૮. મરણસ્સતિ નામેકા, તથા કાયગતાસતિ;

આનાપાનસ્સતિચ્ચેવં, દસાનુસ્સતિયો મતા.

૯૦૯. મેત્તા કરુણા મુદિતા, ઉપેક્ખાતિ ચતુબ્બિધા;

વુત્તા બ્રહ્મવિહારા ચ, અપ્પમઞ્ઞાતિ તાદિના.

૯૧૦. એકાહારે પટિક્કૂલ-સઞ્ઞા નામેકમેવ તુ;

ચતુધાતુવવત્થાનં, ચતુધાતુપરિગ્ગહો.

૯૧૧. આકાસાનઞ્ચાયતનં, વિઞ્ઞાણઞ્ચમથાપરં;

આકિઞ્ચઞ્ઞં તથા નેવ-સઞ્ઞાનાસઞ્ઞનામકં.

૯૧૨. ઇચ્ચાનુક્કમતો વુત્તા, અરૂપજ્ઝાનિકા પન;

અરૂપકમ્મટ્ઠાનાનિ, ચત્તારોપિ પકિત્તિતા.

૯૧૩. કસિણાસુભકોટ્ઠાસે, આનાપાને ચ સબ્બથા;

દિસ્વા સુત્વા ફુસિત્વા વા, પરિકમ્મં તુ કુબ્બતો.

૯૧૪. ઉગ્ગહો નામ સમ્ભોતિ, નિમિત્તં તત્થ યુઞ્જતો;

પટિભાગો તમારબ્ભ, તત્થ વત્તતિ અપ્પના.

૯૧૫. સાધુ સત્તા સુખી હોન્તુ, દુક્ખા મુચ્ચન્તુ પાણિનો;

અહો સત્તા સુખપ્પત્તા, હોન્તુ યદિચ્છકાતિ ચ.

૯૧૬. ઉદ્દિસ્સ વા અનોદિસ્સ, યુઞ્જતો સત્તગોચરે;

અપ્પમઞ્ઞા પનપ્પેન્તિ, અનુપુબ્બેન વત્તિકા.

૯૧૭. કસિણુગ્ઘાટિમાકાસે, પઠમારુપ્પમાનસે;

તસ્સેવ નત્થિભાવે ચ, તતિયારુપ્પકેતિ ચ.

૯૧૮. યુઞ્જન્તસ્સ પનેતેસુ, ગોચરેસુ ચતૂસુપિ;

અપ્પેન્તિ અનુપુબ્બેન, આરુપ્પાપિ ચતુબ્બિધા.

૯૧૯. આનાપાનઞ્ચ કસિણં, પઞ્ચકજ્ઝાનિકં તહિં;

પઠમજ્ઝાનિકા વુત્તા, કોટ્ઠાસાસુભભાવના.

૯૨૦. સુખિતજ્ઝાનિકા તિસ્સો, અપ્પમઞ્ઞા ચ હેટ્ઠિમા;

ઉપેક્ખારુપ્પકા પઞ્ચ, ઉપેક્ખાઝાનિકાતિ ચ.

૯૨૧. એકા દસેકા દસ ચ, તયો પઞ્ચેતિ સબ્બથા;

પરિકમ્મવસા તિંસ, છ કોટ્ઠાસા યથાક્કમં.

૯૨૨. પઞ્ચકાદિસુખોપેક્ખા, ઝાનભેદા ચતુબ્બિધા;

એકચ્ચતુપઞ્ચઝાન-વસેન તિવિધા સિયું.

૯૨૩. રૂપારૂપવસા દ્વે ચ, અપ્પનાતો પુનેકધા;

ઇચ્ચેવમપ્પના કમ્મ-ટ્ઠાનભેદા સમિસ્સિતા.

૯૨૪. દ્વે ચ સઞ્ઞાવવત્થાના, અટ્ઠાનુસ્સતિયોતિ ચ;

સેસા દસ પવુચ્ચન્તિ, ઉપચારસમાધિકા.

૯૨૫. પરિકમ્મોપચારાનુલોમગોત્રભુતો પરં;

પઞ્ચમં વા ચતુત્થં વા, જવનં હોતિ અપ્પના.

૯૨૬. અપ્પનાજવનં સબ્બં, લોકુત્તરમહગ્ગતં;

તિહેતુકપરિત્તાનિ, પુરિમાનિ યથારહં.

૯૨૭. આવજ્જના ચ વસિતા, તંસમાપજ્જના તથા;

અધિટ્ઠાના ચ વુટ્ઠાના, પચ્ચવેક્ખણ પઞ્ચમા.

૯૨૮. વસિતાહિ વસીભૂતા, ઇતિ કત્વાન પઞ્ચહિ;

ભાવેન્તસ્સ પનપ્પેન્તિ, ઉપરૂપરિ અપ્પના.

૯૨૯. યુઞ્જન્તસ્સ તુ વુટ્ઠાય, કસિણજ્ઝાનપઞ્ચમા;

પઞ્ચાભિઞ્ઞા હિ અપ્પેન્તિ, રૂપસદ્દાદિગોચરે.

૯૩૦. લોકુત્તરા પનપ્પેન્તિ, સબ્બે નિબ્બાનગોચરે;

અનિચ્ચદુક્ખાનત્તાતિ, ભૂમિધમ્મે વિપસ્સતો.

૯૩૧. તત્થ ચ પાદકજ્ઝાનં, સમ્મટ્ઠજ્ઝાનમેવ વા;

અજ્ઝાસયો ચ વુટ્ઠાન-ગામિની ચ વિપસ્સના.

૯૩૨. મગ્ગાનં ઝાનભેદાય, યથાયોગં નિયામતા;

યથાસકં ફલાનં તુ, મગ્ગા હોન્તિ નિયામતા.

૯૩૩. મગ્ગાનન્તરમેવાથ, ભૂમિધમ્મે વિપસ્સતો;

ફલસમાપત્તિયમ્પિ, અપ્પેતિ ફલમાનસં.

૯૩૪. અનુપુબ્બસમાપત્તિં, સમાપજ્જિસ્સ વુટ્ઠિતો;

ઝાનધમ્મે વિપસ્સિત્વા, તત્થ તત્થેવ પણ્ડિતો.

૯૩૫. ચતુત્થારુપ્પમપ્પેત્વા, એકદ્વિજવનાપરં;

નિરોધં નામ ફુસતિ, સમાપત્તિમચિત્તકં.

૯૩૬. અરહા વા અનાગામી, પઞ્ચવોકારભૂમિયં;

યથાસકં ફલુપ્પાદો, વુટ્ઠાનન્તિ તતો મતો.

૯૩૭. અપ્પનાપરિયોસાને, સિયા સબ્બત્થ સમ્ભવા;

ભવઙ્ગપાતો તં છેત્વા, જાયતે પચ્ચવેક્ખણા.

૯૩૮. ઇતિ વુત્તાનુસારેન, અપ્પનાનયસઙ્ગહં;

યથાયોગં વિભાવેય્ય, તત્થ તત્થ વિચક્ખણો.

૯૩૯. ચિત્તવિસુદ્ધિ નામાયં, ચિત્તસંક્લેસસોધનો;

ઉપચારપ્પનાભેદો, સમથો પુબ્બભાગિયોતિ.

ઇતિ નિબ્બાનવિભાગે મૂલવિસુદ્ધિકથા નિટ્ઠિતા.

તેવીસતિમો પરિચ્છેદો.