વીસતિમો પરિચ્છેદો

૨૦. કલાપકથા

૭૫૪. ઇતિ વુત્તપ્પકારેન, સબ્બં રૂપમ્પિ પિણ્ડિતં;

સહવુત્તિનિયામેન, એકવીસવિધં કથં.

૭૫૫. કમ્મં ચિત્તોતુકાહારસમુટ્ઠાના યથાક્કમં;

નવ છ ચતુરો દ્વે ચ, કલાપા એકવીસતિ.

૭૫૬. જીવિતઞ્ચાવિનિબ્ભોગ-રૂપાનિ ચ યથાક્કમં;

ચક્ખાદિકેહિ યોજેત્વા, દસકા અટ્ઠ દીપિતા.

૭૫૭. ચક્ખુસોતઘાનજિવ્હાદસકા ચ ચતુબ્બિધા;

કાયિત્થિપુમ્ભાવવત્થુદસકા ચ તથાપરે.

૭૫૮. જીવિતેનાવિનિબ્ભોગરૂપાનિ નવકન્તિ ચ;

નવેતે કમ્મજા નામ, કલાપા સમુદીરિતા.

૭૫૯. અવિનિબ્ભોગરૂપાનિ, સુદ્ધટ્ઠકમથાપરં;

કાયવિઞ્ઞત્તિનવકં, કાયવિઞ્ઞત્તિયા સહ.

૭૬૦. વચીવિઞ્ઞત્તિદસકં, સદ્દેન સહવુત્તિતો;

લહુતાદેકાદસકં, તિણ્ણન્નં સહ સમ્ભવા.

૭૬૧. કાયવિઞ્ઞત્તિલહુતાદીહિ દ્વાદસકં ભવે;

વચીવિઞ્ઞત્તિલહુતાદીહિ તેરસકં તથા.

૭૬૨. ઇતિ ચિત્તસમુટ્ઠાના, કલાપા છ પકાસિતા;

રૂપાકારવિકારમ્પિ, સઙ્ગહેત્વા યથારહં.

૭૬૩. સુદ્ધટ્ઠકં તુ પઠમં, સદ્દેન નવકં ભવે;

લહુતાદેકાદસકં, લહુતાદીહિ તીહિપિ.

૭૬૪. સદ્દેન લહુતાદીહિ, તથા દ્વાદસકન્તિ ચ;

કલાપા ઉતુસમ્ભૂતા, ચતુધાવ પકિત્તિતા.

૭૬૫. સુદ્ધટ્ઠકઞ્ચ પઠમં, આહારજમથાપરં;

લહુતાદેકાદસકં, ઇતિ દ્વે ઓજજા મતા.

૭૬૬. કલાપાનં પરિચ્છેદલક્ખણત્તા વિચક્ખણા;

ન કલાપઙ્ગમિચ્ચાહુ, આકાસં લક્ખણાનિ ચ.

૭૬૭. તત્થ ચેકૂનનવુતિ, તેસટ્ઠિ ચ યથાક્કમં;

તાલીસેકૂનવીસા ચ, કલાપઙ્ગાનિ તાનિ ચ.

૭૬૮. લક્ખણાકાસરૂપાનિ, કલાપેસુ તહિં તહિં;

પઞ્ચ પઞ્ચેતિ રૂપાનિ, તિસતં સોળસાધિકં.

૭૬૯. અગહીતગ્ગહણેન, અટ્ઠવીસવિધાનિપિ;

રૂપકોટ્ઠાસનામેન, પઞ્ચવીસતિ ભાવયે.

૭૭૦. ભૂતત્તયં તુ ફોટ્ઠબ્બં, કત્વાપચયસન્તતિં;

જાતિમેકઞ્ચ કત્વા વા, વિનાથ હદયં તહિં.

૭૭૧. ધમ્મસઙ્ગણિયં હેતં, રૂપકણ્ડે સરૂપતો;

વત્થુરૂપં ન નિદ્દિટ્ઠં, પટ્ઠાને દેસિતં તુ તં.

૭૭૨. દ્વે સદ્દનવકા ચેવ,

તયો સુદ્ધટ્ઠકાપિ ચ;

દ્વે દ્વે ચિત્તોતુસમ્ભૂતા,

એકો આહારજોતિ ચ.

૭૭૩. તેસમુટ્ઠાનિકા પઞ્ચ, કમ્મજાનિ નવેતિ ચ;

રૂપરૂપવસેનેતે, કલાપા ચુદ્દસેરિતા.

૭૭૪. દસકેસ્વેવ સઙ્ગય્હ, જીવિતનવકં તહિં;

ભાવદ્દસકમેકં વા, કત્વા વત્થું વિના તથા.

૭૭૫. સદ્દા ચિત્તોતુજા દ્વેવ, તેસમુટ્ઠાનિકા તયો;

સુદ્ધટ્ઠકા ચ સત્તેવ, કમ્મજા દસકાનિ ચ.

૭૭૬. છન્નવૂતિવિધં તત્થ, રૂપં ભાસન્તિ પણ્ડિતા;

અગહીતગ્ગહણેન, અટ્ઠારસવિધં ભવે.

૭૭૭. તેસમેવ કલાપાનં, સત્તકચ્છક્કપઞ્ચકા;

ચતુક્કા ચ તિકદ્વિકા, એકકા ચ યથારહં.

૭૭૮. દ્વે સત્ત નવ છ તયો, તયોપિ ચ યથાક્કમં;

ચત્તારોતિ ચતુત્તિંસ, સહવુત્તિકરાસયો.

૭૭૯. ચક્ખુસોતઘાનજિવ્હા-કાયવત્થુવસા સિયું;

ઇત્થિપુમ્ભાવદસકસહિતા સત્તકા દ્વિધા.

૭૮૦. ચક્ખુસોતઘાનહીના, પચ્ચેકં દ્વે સભાવકા;

અભાવતો ભાવહીનો, ઇત્થં છક્કાપિ સત્તધા.

૭૮૧. ચક્ખુસોતવિહીના ચ,

ચક્ખુઘાનવિહીનકા;

સોતઘાનવિહીના ચ,

સભાવા દ્વે તયો તયો.

૭૮૨. ચક્ખાદેકેકતો હીના,

તિવિધાપિ અભાવતો;

ઇચ્ચેવં પઞ્ચકા નામ,

નવકા રાસયો સિયું.

૭૮૩. ચક્ખાદિત્તયહીનાવ, એકતો દ્વે સભાવકા;

ચક્ખાદિત્તયતો દ્વીહિ, તયો હીના અભાવકા.

૭૮૪. રૂપલોકે ચક્ખુસોત-વત્થુજીવિતનવકા;

ચત્તારોવ કલાપાતિ, ચતુક્કા છ યથારહં.

૭૮૫. જિવ્હાકાયવત્થુવસા,

અભાવો દ્વે સભાવકા;

કાયભાવવત્થુવસા,

ઇતિ હોન્તિ તયો તિકા.

૭૮૬. કાયવત્થુવસેનેકો, દ્વે ચ ચિત્તોતુસમ્ભવા;

સદ્દનવકટ્ઠકાતિ, દુકા ચ તિવિધા સિયું.

૭૮૭. જીવિતનવકઞ્ચેકં, તેસમુટ્ઠાનિકાનિ ચ;

સુદ્ધટ્ઠકાનિ તીણીતિ, ચત્તારો એકકા સિયું.

૭૮૮. ચતુત્તિંસ પનિચ્ચેતે, સન્ધિયઞ્ચ પવત્તિયં;

રૂપરૂપકલાપાનં, રાસયો હોન્તિ સમ્ભવા.

૭૮૯. સત્તતિ સટ્ઠિમિચ્ચેવમાદિના ચ યથારહં;

કલાપરાસિરૂપાનિ, તત્થ તત્થ વિભાવયે.

૭૯૦. સોળસ પઞ્ચદસેતિઆદિભેદવસાપિ ચ;

અગહીતગ્ગહણેન, તત્થ તત્થ વિનિદ્દિસે.

૭૯૧. ચતુચત્તાલીસસતં, કલાપા હોન્તિ પિણ્ડિતા;

છબ્બીસ તત્થ રૂપાનિ, સહસ્સઞ્ચ ચતુસ્સતં.

૭૯૨. ઇચ્ચાપાયચતુક્કે ચ, કામે સુગતિસત્તકે;

રૂપે ચ પઞ્ચદસકે, અસઞ્ઞાપાયભૂમિયં.

૭૯૩. ચતુકોટ્ઠાસિકેસ્વેવ, સત્તવીસવિધેસુપિ;

જાતિટ્ઠાનેસુ સત્તાનં, સન્ધિયઞ્ચ પવત્તિયં.

૭૯૪. ઇન્દ્રિયબદ્ધસન્તાને, તથાનિન્દ્રિયકમ્હિ ચ;

બહિસઙ્ખારસન્તાને, મતકાયે ચ સમ્ભવા.

૭૯૫. લબ્ભમાનકલાપા ચ, કલાપાનઞ્ચ રાસયો;

તત્થ વિત્થારસઙ્ખેપા, રૂપાનં ગણનાપિ ચ.

૭૯૬. એત્થ રૂપા અવુત્તા હિ, યથાવુત્તાનુસારતો;

વિત્થારેત્વાન વિઞ્ઞેય્યા, સબ્બથાપિ ચ વિઞ્ઞુનાતિ.

ઇતિ રૂપવિભાગે કલાપકથા નિટ્ઠિતા.

વીસતિમો પરિચ્છેદો.