સત્તરસમો પરિચ્છેદો

૧૭. દિટ્ઠિસઙ્ગહકથા

૫૯૩. યેવાપનકનામેન, ધમ્મા છન્દાદયો તથા;

ખન્ધાદયો ચ કોટ્ઠાસા, ઉદ્દિટ્ઠા હિ યથારહં.

૫૯૪. તત્થ છન્દાદયો ધમ્મા, વિભત્તાવ યથારહં;

ખન્ધાદિરાસયો વાપિ, વિઞ્ઞેય્યા દાનિ સમ્ભવા.

૫૯૫. વેદના વેદનાક્ખન્ધો, ચક્ખુસમ્ફસ્સજાદિકા;

સઞ્ઞા ચ સઞ્ઞાક્ખન્ધોતિ, છબ્બિધાપિ પકાસિતા.

૫૯૬. સઙ્ખારક્ખન્ધનામેન, સેસા ચેતસિકા મતા;

વુત્તા વિઞ્ઞાણકાયા છ, વિઞ્ઞાણક્ખન્ધનામતો.

૫૯૭. રૂપક્ખન્ધો પુનેકોવ, સમ્પયુત્તાવિયોગિનો;

અરૂપિનો ચ ચત્તારો, પઞ્ચક્ખન્ધા પવુચ્ચરે.

૫૯૮. મનાયતનનામં તુ, ચિત્તમેવ તથાપરા;

ચક્ખુવિઞ્ઞાણધાતાદિસત્તવિઞ્ઞાણધાતુયો.

૫૯૯. સબ્બે ચેતસિકા ધમ્મા, ધમ્માયતનસઙ્ગહા;

ધમ્મધાતૂતિ ચ વુત્તા, દ્વિપઞ્ઞાસાપિ સબ્બથા.

૬૦૦. સુખુમાનિ ચ રૂપાનિ, નિબ્બાનઞ્ચેત્થ ગય્હરે;

ઓળારિકાનિ રૂપાનિ, દસાયતનધાતુયો.

૬૦૧. ચક્ખુસોતઘાનજિવ્હા-કાયાયતનનામકા;

રૂપસદ્દગન્ધરસ-ફોટ્ઠબ્બાયતનાનિ ચ.

૬૦૨. દ્વાદસાયતના સબ્બે, હોન્તટ્ઠારસધાતુયો;

ખન્ધા ઠપેત્વા નિબ્બાનં, નત્થિ પણ્ણત્તિ તીસુપિ.

૬૦૩. આહારાદિ ચ કોટ્ઠાસા, પુબ્બે વુત્તનયાવ તે;

ઇતિ મિસ્સકસઙ્ખેપો, વિઞ્ઞાતબ્બો વિભાવિના.

૬૦૪. દ્વાદસાકુસલેસ્વેવ, ચુદ્દસાપિ વવત્થિતા;

યે સાવજ્જાવ તેસમ્પિ, સઙ્ગહો દાનિ નિય્યતે.

૬૦૫. કામાસવો ભવાસવો, દિટ્ઠાવિજ્જાસવાતિ ચ;

ચત્તારો આસવા વુત્તા, તયો ધમ્મા સરૂપતો.

૬૦૬. આસવા આસવટ્ઠેન,

ઓઘા વુય્હનતો તથા;

યોજેન્તીતિ ચ યોગાતિ,

તે ચત્તારો ચ દેસિતા.

૬૦૭. કામબ્ભવો ચ પટિઘો, માનો દિટ્ઠિ ચ સંસયો;

સીલબ્બતપરામાસો, ભવરાગો તથાપરો.

૬૦૮. ઇસ્સા મચ્છરિયાવિજ્જા, ઇતિ સંયોજના દસ;

અટ્ઠ ધમ્મા સરૂપેન, અભિધમ્મે પકાસિતા.

૬૦૯. ઇસ્સામચ્છરિયં હિત્વા, કત્વા માનુદ્ધવં તહિં;

ભિન્દિત્વા ભવરાગઞ્ચ, રૂપારૂપવસા દ્વિધા.

૬૧૦. પઞ્ચોરમ્ભાગિયા ચેવ, પઞ્ચુદ્ધમ્ભાગિયાતિ ચ;

દસ સંયોજના વુત્તા, સુત્તે સત્ત સરૂપતો.

૬૧૧. ગન્થા ધમ્મા ચ ચત્તારો, તયો ધમ્મા સરૂપતો;

અભિજ્ઝાકાયગન્થો ચ, બ્યાપાદો ચ પવુચ્ચતિ.

૬૧૨. સીલબ્બતપરામાસો, કાયગન્થો તથાપરો;

ઇદંસચ્ચાભિનિવેસો, ઇતિ દિટ્ઠિ વિભેદિતો.

૬૧૩. કામચ્છન્દો ચ બ્યાપાદો, થિનમિદ્ધમથાપરં;

તથા ઉદ્ધચ્ચકુક્કુચ્ચં, કઙ્ખાવિજ્જાતિ અટ્ઠિમે.

૬૧૪. ધમ્મા નિવરણા નામ, છધા ચ પન દેસિતા;

મિચ્છાદિટ્ઠિ પનેકાવ, પરામાસોતિ વુચ્ચતિ.

૬૧૫. ઉપાદાનાનિ ચત્તારિ, કામુપાદાદિનામકા;

દિટ્ઠિસીલબ્બતં અત્ત-વાદુપાદાનમેવ ચ.

૬૧૬. લોભદિટ્ઠિવસા દ્વેવ, તિવિધા દિટ્ઠિ દેસિતા;

દિટ્ઠિ સીલબ્બતમત્ત-વાદો ચેતિ મહેસિના.

૬૧૭. લોભો દોસો ચ મોહો ચ,

માનો દિટ્ઠિ ચ સંસયો;

થિનમુદ્ધચ્ચમેવાથ,

લોકનાસયુગં તથા.

૬૧૮. ઇત્થં કિલેસવત્થૂનિ, કિલેસાતિ પકાસિતા;

દસેતે તુ સમાનાવ, પરતો ચ સરૂપતો.

૬૧૯. કામરાગો ચ પટિઘો, માનો દિટ્ઠિ ચ સંસયો;

ભવરાગો અવિજ્જાતિ, છ સત્તાનુસયા મતા.

૬૨૦. ગાહા ચ પલિબોધા ચ, પપઞ્ચા ચેવ મઞ્ઞના.

તણ્હા માનો ચ દિટ્ઠિ ચ, દિટ્ઠિ તણ્હા ચ નિસ્સયા.

૬૨૧. પરામાસેકકો દ્વેવ, નિસ્સયા મઞ્ઞના તયો;

આસવોઘયોગગન્થા, ઉપાદાના ચ દુબ્બિધા.

૬૨૨. અટ્ઠ નીવરણા વુત્તા, સત્તધાનુસયા કથા;

સંયોજના કિલેસા ચ, દસેવ પરતો ઠિતા.

૬૨૩. એકદ્વિતિછસત્તટ્ઠદસકા તુ યથારહં;

ધમ્મા સરૂપતો હોન્તિ, યથાવુત્તેસુ રાસિસુ.

૬૨૪. કામરાગભવરાગા, કામાસવભવાસવા;

રૂપરાગારૂપરાગ, ઇતિ લોભો વિભેદિતો.

૬૨૫. ઇદંસચ્ચાભિનિવેસો, દિટ્ઠિ સીલબ્બતં તથા;

અત્તવાદો પરામાસો, ઇતિ દિટ્ઠિ પવુચ્ચતિ.

૬૨૬. દિટ્ઠિ પઞ્ચદસવિધા, લોભટ્ઠારસધા તહિં;

સેસા સપરરાસીહિ, સમાના દ્વાદસટ્ઠિતા.

૬૨૭. એકાદસસમુટ્ઠાને, દિટ્ઠિલોભા વવત્થિતા;

અવિજ્જા સત્તસુ વુત્તા, પટિઘો પન પઞ્ચસુ.

૬૨૮. માનો ચ વિચિકિચ્છા ચ, ચતુટ્ઠાનેસુ ઉદ્ધટો;

તીસુ દ્વીસુ ચ થીનન્તિ, અટ્ઠેતે સવિભત્તિકા.

૬૨૯. ઇસ્સામચ્છેરકુક્કુચ્ચમિદ્ધલોકવિનાસકા;

છાવિભત્તિકધમ્માતિ, અસમ્ભિન્ના ચતુદ્દસ.

૬૩૦. રૂપરાગારૂપરાગ-કામાસવભવાસવા;

હોન્તિ દિટ્ઠિવિયુત્તેસુ, પુબ્બે વુત્તનયા પન.

૬૩૧. ઇતિ સાવજ્જસઙ્ખેપં, ઞત્વા પુન વિચક્ખણો;

બોધિપક્ખિયધમ્માનં, સઙ્ગહમ્પિ વિભાવયે.

૬૩૨. યેસુ સઞ્ઞાચિત્તદિટ્ઠિ-વિપલ્લાસા યથાક્કમં;

સુભં સુખં નિચ્ચમત્તા, ઇતિ દ્વાદસધા ઠિતા.

૬૩૩. તત્થ કાયે વેદનાસુ, ચિત્તે ધમ્મેસુ ચક્કમા;

અસુભં દુક્ખમનિચ્ચમનત્તાતિ ઉપટ્ઠિતા.

૬૩૪. યથાવુત્તવિપલ્લાસપહાનાય યથારહં;

ભિન્ના વિસયકિચ્ચાનં, વસેન પન સમ્ભવા.

૬૩૫. ચત્તારો સતિપટ્ઠાના, કાયાનુપસ્સનાદયો;

ઇતિ વુત્તા પનેકાવ, સમ્માસતિ મહેસિના.

૬૩૬. ઉપ્પન્નાનુપ્પન્નપાપપહાનાનુપ્પન્નાય ચ;

અનુપ્પન્નુપ્પન્નેહિ વા, નિબ્બત્તિ અભિવુદ્ધિયા.

૬૩૭. પદહન્તસ્સ વાયામો, કિચ્ચાભોગવિભાગતો;

સમ્મપ્પધાના ચત્તારો, ઇતિ વુત્તા મહેસિના.

૬૩૮. છન્દો ચ વીરિયં ચિત્તં, વીમંસાતિ ચ તાદિના;

ચત્તારો ઇદ્ધિપાદાતિ, વિભત્તા ચતુરાધિપા.

૬૩૯. સદ્ધિન્દ્રિયઞ્ચ વીરિયં, સતિ ચેવ સમાધિ ચ;

પઞ્ઞિન્દ્રિયઞ્ચ પઞ્ચેવ, બોધિપક્ખિયસઙ્ગહે.

૬૪૦. ઇન્દ્રિયાનિન્દ્રિયટ્ઠેન, બલટ્ઠેન બલાનિ ચ;

ઇતિ ભિન્ના વિભત્તા ચ, દુવિધાપિ મહેસિના.

૬૪૧. સતી ચ ધમ્મવિચયો, તથા વીરિયપીતિયો;

પસ્સદ્ધિ ચ સમાધિ ચ, ઉપેક્ખાતિ ચ તાદિના.

૬૪૨. દેસિતા સત્ત બોજ્ઝઙ્ગા, બુજ્ઝન્તસ્સ સભાવતો;

કાયચિત્તવસા ભિન્નં, કત્વા પસ્સદ્ધિમેકકં.

૬૪૩. સમ્માદિટ્ઠિ ચ સઙ્કપ્પો, વાયામો વિરતિત્તયં;

સમ્માસતિ સમાધી ચ, મગ્ગો અટ્ઠઙ્ગિકો મતો.

૬૪૪. ઇતિ સત્તેવ સઙ્ખેપા, સત્તતિંસ પભેદતો;

એકં કત્વાન પસ્સદ્ધિં, અસમ્ભિન્ના ચતુદ્દસ.

૬૪૫. નવધા વીરિયં વુત્તં, છસુ રાસીસુ પઞ્ચસુ;

અટ્ઠધા સતિ સેસા તુ, સમાનપદરાસિકા.

૬૪૬. પઞ્ચસ્વેવ તુ પઞ્ઞા ચ, સમાધિ ચતુરાસિકો;

સદ્ધા દ્વીસુ વિભત્તાતિ, પઞ્ચેતે સવિભત્તિકા.

૬૪૭. નવા વિભત્તિકા સેસા, છન્દો ચિત્તમથાપરં;

પીતિ પસ્સદ્ધિપેક્ખા ચ, સઙ્કપ્પો વિરતિત્તયં.

૬૪૮. ઇતિ વુત્તનયા સબ્બે, બોધિપક્ખિયસઙ્ગહા;

લોકુત્તરેસુ સમ્ભોન્તિ, સબ્બથાપિ યથારહં.

૬૪૯. પુબ્બભાગે યથાયોગં, લોકિયેસુ ચ લબ્ભરે;

નિબ્બેદભાવનાકાલે, છબ્બિસુદ્ધિપવત્તિયં.

૬૫૦. ઇતિ મિસ્સકસાવજ્જા, બોધિપક્ખિયસઙ્ગહા;

યેવાપનકરાસિમ્હિ, યથાસમ્ભવતો ઠિતા.

૬૫૧. કમ્મપથા તુ સમ્ભોન્તિ, પુઞ્ઞાપુઞ્ઞેસુ સબ્બથા;

અપથા ચ સુચરિતા, તથા દુચ્ચરિતાપિ ચ.

૬૫૨. તત્થ કમ્મપથટ્ઠાને, અનભિજ્ઝાદયો પન;

ઉપચારેન વુચ્ચન્તિ, વિપાકેસુ ક્રિયેસુ વાતિ.

ઇતિ ચેતસિકવિભાગે દિટ્ઠિસઙ્ગહકથા નિટ્ઠિતા.

સત્તરસમો પરિચ્છેદો.

નિટ્ઠિતો ચ સબ્બથાપિ ચેતસિકવિભાગો.